పేపర్ లీకేజ్‌పై సీబీఐ తొలి ఛార్జ్‌షీట్‌లో సంచలన విషయాలు

వైద్య విద్యలో ప్రవేశాలకు నిర్వహించే నేషనల్ ఎలిజిబిలిటీ ఎంట్రన్స్ టెస్ట్ (నీట్-యూజీ) ప్రశ్నాపత్రం లీకేజ్‌పై సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) తొలి ఛార్జ్‌షీట్ దాఖలు చేసింది. ఇందులో నలుగురు అభ్యర్ధులు, ఓ జూనియర్ ఇంజినీర్, ఇద్దరు కుట్రదారులు సహా 13 మందిని నిందితులుగా చేర్చింది. నీట్ లీక్ అంశం దేశవ్యాప్తంగా తీవ్ర దుమారం రేపిన విషయం తెలిసిందే. పరీక్షను రద్దుచేసి.. మళ్లీ నిర్వహించాలని సుప్రీంకోర్టును పలువురు ఆశ్రయించగా.. అందుకు అత్యున్నత న్యాయస్థానం నిరాకరించింది. ప్రశ్నాపత్రం లీక్ అయిన మాట వాస్తవమే కానీ.. దీని ప్రభావం స్వల్పమేనని అభిప్రాయపడింది.

ఛార్జ్‌షీట్‌లో కొంత మంది అభ్యర్ధుల తల్లిదండ్రుల పేర్లను కూడా చేర్చినట్టు సీబీఐ అధికారులు తెలిపారు. ప్రస్తుతం దర్యాప్తు ప్రాథమిక దశలో ఉందని, పూర్తయిన తర్వాత అనుబంధ ఛార్జ్‌షీట్ దాఖలు చేస్తామని పేర్కొన్నారు. లీకేజ్ వ్యవహారంలో కీలక సూత్రధారులుగా వ్యవహరించిన బిహార్‌కు చెందిన నితీశ్ కుమార్, అమిత్ ఆనంద్‌లతో పాటు విద్యార్థులు ఆయుష్ కుమార్, అనురాగ్ యాదవ్, అభిషేక్ కుమార్, శివేంద్ర కుమార్‌, దనాపూర్‌కు చెందిన జూనియర్ ఇంజినీర్ సికిందర్ యాదవేందులు పేర్లు సీబీఐ ఛార్జ్‌షీట్‌లో చేర్చింది.

మొత్తం 13 నిందితులపై నేరపూరిత కుట్ర సహా పలు సెక్షన్ల కింద కేసు నమోదుచేశారు. పట్నా సమీపంలోని గోపాల్‌పూర్‌కు చెందిన నితీశ్ కుమార్‌ను ప్రధాన నిందితుడిగా పేర్కొన్న సీబీఐ.. పేపర్ లీక్‌లో అతడే కీలకంగా వ్యవహరించినట్టు నమ్ముతోంది. అమిత్ ఆనంద్, సికిందర్ యాదవేందులతో కలిసి పేపర్ లీక్ చేసి.. ఒక్కో విద్యార్ధికి రూ.30- 32 లక్షలకు అమ్మినట్టు భావిస్తోంది.

పేపర్లు కొనుగోలు చేయడానికి తన వద్ద నలుగురు విద్యార్థులు సిద్ధంగా ఉన్నారని నితీశ్, ఆనంద్‌లకు యదువేందు చెప్పినట్లు విచారణలో తేలింది. నీట్ పరీక్షకు ముందు రోజు మే 4న రాత్రి నలుగురు విద్యార్థులను అమిత్ పిలిపించి, లీకైన ప్రశ్నపత్రం సాల్వ్ చేసి సమాధానాలను గుర్తుపెట్టుకునేలా బట్టీపట్టించారని సీబీఐ ఛార్జిషీట్ పేర్కొంది.

నిందితులకు వ్యతిరేకంగా సాక్ష్యాలను సేకరించేందుకు ఫోరెన్సిక్ టెక్నిక్స్, ఆర్టిఫిషియల్ ఇంటెలిజెన్స్, సీసీటీవీ ఫుటేజీ, లొకేషన్ అనాలిసిస్ వంటి అధునాత సాంకేతికతను వాటిని ఉపయోగించిందని, వాటిని కోర్టు ముందుంచామని ఓ అధికారి తెలిపారు.

‘ఇతర నిందితులు/ అనుమానితులు, కేసులోని ఇతర అంశాలపై సీబీఐ తదుపరి దర్యాప్తును కొనసాగిస్తోంది. పలువురు ఇతర నిందితులు ఇప్పటికే కస్టడీలో ఉన్నారు. ఈ దర్యాప్తు పూర్తయిన తర్వాత, ఒకటి లేదా అంతకంటే ఎక్కువ అనుబంధ ఛార్జిషీట్లు దాఖలు చేస్తాం’ అని అధికారి తెలిపారు. ఈ వ్యవహారంపై 58 ప్రాంతాల్లో సోదాలు నిర్వహించి ఇప్పటి వరకూ 40 మందిని సీబీఐ అరెస్ట్ చేసింది. ప్రధాన నిందితుడు నితీశ్ కుమార్‌.. బిహార్ పబ్లిక్ సర్వీస్ కమిషన్ పరీక్ష పత్రం లీక్ చేశారన్న ఆరోపణలపై ఈ ఏడాది జైలుకెళ్లాడు.