OYO: తొలిసారిగా ఓయోకు కళ్లుచెదిరే లాభాలు.. ఏడాదిలో ఇన్ని వందల కోట్లా? ఓలాకు భారీ నష్టాలు!

OYO Revenue: ఐపీఓకు సిద్ధమవుతున్న ప్రముఖ స్టార్టప్ సంస్థ ఓయో.. 2023-24 ఆర్థిక సంవత్సరంలో రూ. 229 కోట్ల నికర లాభాన్ని నమోదు చేసినట్లు వెల్లడించింది. ఏ ఆర్థిక సంవత్సరంలోనైనా సంస్థకు లాభం రావడం ఇదే తొలిసారి. ఈ మేరకు తాజాగా కంపెనీ యాన్యువల్ రిపోర్టులో వెల్లడించింది. అయితే ఈసారి తాము రూ. 100 కోట్ల లాభం అంచనా వేయగా.. దాన్ని మించినట్లు వివరించారు ఓయో ఫౌండర్ రితేశ్ అగర్వాల్. ఇక సర్దుబాటు చేశాక.. ఎబిటా 215 శాతం పెరిగి సుమారుగా రూ. 877 కోట్లకు చేరినట్లు తెలిపారు. 2022-23 ఆర్థిక సంవత్సరంలో చూస్తే ఇది రూ. 277 కోట్లుగానే ఉంది. అంతర్జాతీయంగా విస్తరించే ప్రణాళికల్లో భాగంగా.. ఓయో కంపెనీ కే అండ్ జే కన్సల్టింగ్‌ను కొనుగోలు చేసింది.

2023-24 ఓయో సంస్థ ఈపీఎస్ (షేరుపై ఆదాయం) రూ. 0.36 గా ఉంది. ఇది 2022-23 లో చూస్తే షేరుపై సగటున రూ. 1.93 నష్టంగా ఉండగా.. ఇప్పుడు విపరీతంగా పుంజుకుందని చెప్పొచ్చు. ఇక ఓయో అందుబాటులోని గదుల సంఖ్య అంతకుముందు 12,938 గా ఉండగా.. ఇప్పుడు అది 18,103 కు చేరినట్లు రితేశ్ చెప్పారు. ఇక కంపెనీ కార్యకలాపాల ఏకీకృత ఆదాయం రూ. 5463 కోట్ల నుంచి కొంచెం తగ్గి రూ. 5388 కోట్లకు చేరింది. ఓయో ఖర్చులు రూ. 5207 కోట్ల నుంచి 13 శాతం తగ్గి ఇప్పుడు రూ. 4500 కోట్లుగా నమోదయ్యాయి.

ఓలాకు నష్టాలు..

ఒకవైపు ఓయోకు లాభాలు పెరగ్గా.. ఇటీవలే స్టాక్ మార్కెట్లోకి ఎంట్రీ ఇచ్చిన ఓలా ఎలక్ట్రిక్ మొబిలటీ సంస్థకు మాత్రం ఏప్రిల్- జూన్ త్రైమాసికంలో నష్టాలు మరింత పెరిగాయి. ఏకీకృత ప్రాతిపదికన సమీక్షా త్రైమాసికంలో రూ. 347 కోట్ల నికర నష్టం ప్రకటించింది. అంతకుముందు ఆర్థిక సంవత్సరం ఇదే సమయంలో నష్టం రూ. 267 కోట్లుగానే ఉండేది. ఈసారి అమాంతం పెరిగింది. కార్యకలాపాల ఆదాయం మాత్రం రూ. 1243 కోట్ల నుచి రూ. 1644 కోట్లకు చేరింది.