తిరుపతి లడ్డూ టెస్టు రిపోర్టులో షాకింగ్ అంశాలు.. నెయ్యిలో జంతు కొవ్వు కలిసిందా?

తిరుమల లడ్డూ నాణ్యతపై రాజకీయ దుమారం రేగుతుండగా.. తాజాగా వెలుగులోకి వచ్చిన రిపోర్టులోని మరింత సంచలనంగా మారాయి. తిరుమల వేంకటేశ్వర స్వామి వారి లడ్డూ ప్రసాదం తయారీలో ఉపయోగించిన నెయ్యి శాంపిల్స్‌ను పరీక్షల కోసం నేషనల్ డైరీ డెవలప్‌మెంట్ బోర్డు ల్యాబొరేటరీకి పంపించారు. గుజరాత్‌లోని ఆనంద్‌లో ఉన్న ఈ ల్యాబొరేటరీకి దేశంలోనే కాకుండా ప్రపంచవ్యాప్తంగా మంచి గుర్తింపు ఉంది. తిరుమలలో ఉపయోగించిన నెయ్యికి సంబంధించి ఈ ల్యాబ్ పంపించిన టెస్టు రిపోర్టులో నెయ్యి కల్తీ అయినట్లు తేలింది. నాణ్యమైన నెయ్యి ఎస్ వాల్యూ 95.68 నుంచి 104.32 మధ్య ఉండగా.. ఒక శాంపిల్ నెయ్యి ఎస్ వాల్యూ 19.72గా వచ్చింది. మరో రెండు శాంపిల్స్‌లోనూ ఇంచుమించు 20కి అటు ఇటుగా ఎస్ వాల్యూ ఉంది. కోట్లాది మంది హిందువుల మనోభావాలతో ముడిపడి ఉన్న తిరుమల లడ్డూ ప్రసాదం కోసం వినియోగించిన నెయ్యి ఈ స్థాయిలో కల్తీకి గురయ్యిందా అనే అంశం ఇప్పుడు ఆందోళనకు గురిచేస్తోంది.

నెయ్యి కల్తీ అయ్యిందంటే.. అందులో ఏం కలిపి ఉంటారనేది వెంటనే వచ్చే మరో అనుమానం. ఏయే పదార్థాలు కలిపి కల్తీ చేసే అవకాశం ఉందో కూడా NDDB రిపోర్టులో స్పష్టంగా పేర్కొన్నారు. రిపోర్టులోని Annexure-1 లో ఏయే పదార్థాలు కలిపి కల్తీ చేసేందుకు ఆస్కారం ఉందో తెలిపారు. ఈ జాబితాలో జంతువుల కొవ్వు, చేప నూనె, జంతువుల మాంసంతో తయారు చేసిన కల్తీ నూనె కూడా ఉండటం చర్చనీయాంశంగా మారింది.

సోయాబీన్, సన్‌ఫ్లవర్, ఆలివ్, ర్యాప్‌సీడ్, లిన్‌సీడ్, గోధుమ జెర్మ్, మొక్కజొన్న జెర్మ్, పత్తి గింజలు, ఫిష్ ఆయిల్, కొబ్బరి, పామ్ కెర్నాల్ ఫ్యాట్, పామ్ ఆయిల్, బీఫ్ టాలో, లార్డ్ (Lard) లాంటి పదార్థాలతో నెయ్యిని, నూనెలను కల్తీ చేసేందుకు ఆస్కారం ఉందని ఎన్‌డీడీబీ రిపోర్టులో పేర్కొన్నారు. ఈ జాబితాలో ఫిష్ ఆయిల్, బీఫ్ టాలో, లార్డ్ ఉండటం ఆందోళన కలిగిస్తోంది. బీఫ్ టాలో అనేది గొడ్డు మాంసం నుంచి తయారు చేసే పదార్థం కాగా.. లార్డ్ అనేది పందులు, ఇతర జంతువుల కొవ్వుల నుంచి తయారుచేసే పదార్థం. తిరుమలలో ఉపయోగించిన నెయ్యిలో ఈ పదార్థాలు కూడా కలిశాయా అనేది ఇప్పుడు ఆందోళన కలిగించే అంశం.

ఈ పదార్థాలను కలిపి నెయ్యిని కల్తీ చేసేందుకు ఆస్కారం ఉందని మాత్రమే ఎన్‌డీడీబీ రిపోర్టులో ఉంది. కానీ, కచ్చితంగా అవే కలిపారని మాత్రం ఈ రిపోర్టు ఆధారంగా చెప్పలేం. అలాగని.. జంతువుల కొవ్వు కలిపి కల్తీ చేయలేదని కొట్టిపారేయలేం. ఇప్పుడిదే భక్తులను, కోట్లాది మంది హిందువులను ఆందోళనకు గురిచేస్తోంది.

మరోవైపు.. గత పాలకమండలిపై, వైఎస్సార్‌సీపీ ప్రభుత్వంపై టీడీపీ నేతలు సంచలన ఆరోపణలు చేస్తున్నారు. ‘పవిత్ర పుణ్యక్షేత్రం తిరుమలో ఇలాంటి నెయ్యిని ఉపయోగిస్తారా.. దారుణం. పురుగులు పట్టిపోతారు’ అంటూ టీడీపీ నేత ఆనం వెంకట రమణారెడ్డి మండిపడ్డారు. ‘మార్కెట్‌లో స్వచ్ఛమైన ఆవు నెయ్యి కిలో 1000 రూపాయలకు పైన ఉంటే.. మీకు రూ.320కే కిలో నెయ్యి ఇస్తామంటే ఎలా నమ్మారు?’ అంటూ ఆయన ప్రశ్నించారు.

ఈ అంశంపై సీబీఐతో విచారణ జరిపించాలని ఏపీ కాంగ్రెస్ అధ్యక్షురాలు వైఎస్ షర్మిలా రెడ్డి డిమాండ్ చేశారు. ‘చంద్రబాబు నాయుడు చేసిన ఆరోపణల్లో రాజకీయ కోణం లేకుంటే.. భావోద్వేగం మీద రాజకీయం చేసే ఉద్దేశమే లేకుంటే.. నెయ్యికి బదులు జంతువుల నూనెలు నిజంగా వాడి ఉంటే.. తక్షణమే ఉన్నత స్థాయి కమిటీ వేయాలి’ అంటూ ఆమె ఎక్స్‌లో పోస్టు చేశారు.

ఇక ఈ అంశంపై కేంద్ర మంత్రి బండి సంజయ్ కూడా స్పందించారు. తిరుమల శ్రీవారి లడ్డూలో జంతు కొవ్వు, పంది కొవ్వు ఉపయోగించడం దారుణమని బండి సంజయ్ అన్నారు. కోట్లాది మంది విశ్వాసాలతో ముడిపడి ఉన్న ఈ అంశంపై సమగ్ర విచారణ జరిపించాలని ఆయన అన్నారు.

ఆవు పాలు కాకుండా ఇతర జంతువుల పాలు ఉపయోగించి నెయ్యి తయారు చేసినా, బలహీనమైన ఆవు నుంచి పాలు సేకరించిన సందర్భంలోనూ నెయ్యి ఎస్ వాల్యూ స్వల్పంగా తక్కువ వచ్చే అవకాశం ఉందని ఎన్‌డీడీబీ తెలిపింది.