నెల్లూరులో పరువు హత్య కలకలం.. అజ్ఞాత వ్యక్తి ఫోన్‌కాల్‌తో, మిస్సింగ్ కేసు హత్యకేసుగా!

నెల్లూరు జిల్లాలో పరువు హత్య కలకలంరేపింది. కూతురు ప్రేమ వివాహం చేసుకుందన్న కోపంతో తల్లిదండ్రులే దారుణంగా హతమార్చారు. ఇంటికి సమీపంలోనే పూడ్చిపెట్టి కూతురు కనిపంచడం లేదని పోలీసులకు ఫిర్యాదు చేశారు. ఇంతలోనే గుర్తు తెలియని వ్యక్తి 100కు కాల్ చేసి సమాచారం ఇవ్వడంతో ఈ మిస్టరీ వీడింది. చివరికి మిస్సింగ్ కాస్తా హత్యకేసుగా మారింది. కొడవలూరు మండలం పద్మనాభుని సత్రంలో జరిగిన ఘటన కలకలంరేపింది.

కొడవలూరు మండలం పద్మనాభునిసత్రం పల్లిపాలెంకు చెందిన తిరుమూరు వెంకటరమణయ్య, దేవసేనమ్మ దంపతులకు కుమారుడు, ఇద్దరు కుమార్తెలు సంతానం. రెండో కుమార్తె శ్రావణికి ఆరేళ్ల కిందట వివాహం చేయగా.. భర్తతో విభేదాలతో విడిపోయారు. వీరికి ఊర్లోనే కూరగాయల షాపు ఉండగా.. నార్త్ ఆములూరుకు చెందిన రబ్బానీ బాషాతో పరిచయం పెరిగింది. ఇద్దరు ప్రేమించుకుని.. 20 రోజుల కిందట కసుమూరు దర్గాలో పెళ్లి చేసుకున్నారు. ఈ విషయం తెలిసిన తల్లిదండ్రులు నార్త్‌ ఆములూరుకు వెళ్లి.. కుమార్తెపై దాడి చేసి బలవంతంగా ఇంటికి తీసుకొచ్చారు.

అయితే ఓ గుర్తు తెలియని వ్యక్తి 100కు కాల్ చేశారు.. వెంకటరమణయ్య ఇంటి సమీపంలోని ఓ ప్రాంతంలో మహిళ మృతదేహాన్ని పూడ్చి పెట్టారని సమాచారం ఇచ్చాడు. వెంటనే పోలీసులు, రెవెన్యూ అధికారులు సంఘటనా స్థలానికి చేరుకుని పరిశీలించారు.. స్థానికుల్ని ప్రశ్నించారు. అనుమానంతో శ్రావణి తల్లిదండ్రులను అదుపులోకి తీసుకుని ప్రశ్నిస్తే అసలు నిజం తెలిసింది. అనుమానాస్పద ప్రదేశంలో పోలీసులు, రెవెన్యూ, ఫోరెన్సిక్‌ అధికారుల పర్యవేక్షణలో తవ్వగా శ్రావణి మృతదేహం బయటపడింది. అక్కడి నుంచి నమూనాలు తీసుకుని.. తిరిగి అక్కడే పూడ్చిపెట్టారు. శ్రావణిఅదృశ్యం కేసును హత్య కేసుగా నమోదు చేసి దర్యాప్తు చేస్తున్నారు.

రబ్బాని ఇంటి నుంచి శ్రావణిని ఇంటికి తీసుకొచ్చిన తర్వాత తల్లిదండ్రులతో వాగ్వాదానికి దిగింది.. శ్రావణిని తల్లిదండ్రులు కొట్టడంతో తీవ్ర గాయమై చనిపోయిందని చెబుతున్నారు ఈ విషయం ఎవరికీ తెలియకుండా, అనుమానం రాకుండా.. ఇంటి పక్కనున్న ఖాళీ స్థలంలో గుంత తీసి పూడ్చిపెట్టారు. ఆ వెంటనే తన కుమార్తె కనిపించడం లేదని పోలీసులకు ఫిర్యాదు చేశారు. కుటుంబ కలహాలతోనే తల్లిదండ్రులు మందలిస్తుండగా తగలరానిచోట తగిలి శ్రావణి చనిపోయినట్లు బంధువులు చెబుతున్నారు. ఈ విషయం బయటకు రానివ్వకుండా తల్లిదండ్రులు వెంకటరమణయ్య, దేవసేనమ్మలు కుమార్తె శ్రావణి మృతదేహాన్ని ఇంటి పక్కనే ఉన్న గడ్డివామి వెనక గొయ్యితీసి పాతిపెట్టారంటున్నారు. తల్లిదండ్రులతో శ్రావణికి గత కొన్ని రోజులుగా పెళ్లి విషయంలో గొడవలు జరుగుతున్నట్లు తెలిసిందన్నారు సీఐ. అయితే శ్రావణి తమ మాట వినడం లేదని తల్లిదండ్రులే వారి ఆమెను హత్య చేసి, ఇంటి దగ్గర్లో ఉన్న గడ్డివాము దగ్గర పూడ్చి పెట్టారన్నారు. తల్లిదండ్రులు ఆమెను ఏమైనా చేసి ఉంటారేమోనని విచారణ చేస్తే ఈ విషయం బయటపడిందన్నారు.