ఏపీలో రైతులకు 48 గంటల్లో అకౌంట్‌లలో డబ్బులు జమ.. ఎంత ఇవ్వాలో కూడా ఫిక్స్!

ఆంధ్రప్రదేశ్ ప్రభుత్వం ధాన్యం సేకరణకు సిద్ధమైంది. ఈ నెల మొదటివారంలో ధాన్యం అమ్మకాలు చేపట్టనున్నారు. రాష్ట్ర ప్రభుత్వం 2024-25 ఖరీఫ్‌ సీజన్‌లో ధాన్యం కొనుగోళ్లకు సంబంధించి మార్గదర్శకాలు విడుదల చేసింది. రైతుల నుంచి ధాన్యాన్ని మద్దతు ధరకు కొనుగోలు చేయడంతోపాటు.. 48 గంటల్లోనే వారి బ్యాంకు అకౌంట్‌లలో డబ్బులు జమ చేసేందుకు అవసరమైన నిధులను ముందుగానే సమకూర్చుకునే పనిలో ఉన్నారు. రాష్ట్రంలో ప్రజాపంపిణీ అవసరాలు, ఇతర సంక్షేమ పథకాలకు 45 లక్షల టన్నుల ధాన్యం అవసరమని అంచనాలు వేశారు.. ఈ ఖరీఫ్‌లో 37 లక్షల టన్నుల ధాన్యం సేకరణ చేయాలని ప్రభుత్వం భావిస్తోంది.

రైతు సేవా కేంద్రాలు, ధాన్యం కొనుగోలు కేంద్రాల ద్వారా కేంద్రం నిబంధనలకు లోబడి వికేంద్రీకరణ విధానంలో ధాన్యాన్ని సేకరిస్తారు. ఇటీవల వ్యవసాయశాఖ ఆధ్వర్యంలో నమోదు చేసిన ఈ-పంట, ఈకేవైసీ డేటా ఆధారంగా ధాన్యం కొనుగోళ్లు జరుగుతాయి. అలాగే రాష్ట్ర పౌరసరఫరాల సంస్థ, ఏపీ మార్క్‌ఫెడ్‌లు నోడల్‌ ఏజెన్సీలుగా వ్యవహరించనున్నాయి.. జిల్లాల్లో కలెక్టర్లు, జాయింట్‌ కలెక్టర్లు ధాన్యం కొనుగోళ్లు, కస్టమ్‌ మిల్లింగ్‌ కార్యకలాపాలను పర్యవేక్షించాలని ప్రభుత్వం దిశా నిర్దేశం చేసింది. కేంద్రం నిర్దేశించిన కనీస మద్దతు ధర ప్రకారం కామన్‌ రకం ధాన్యం క్వింటాలుకు రూ.2,300 లు, గ్రేడ్‌-ఎ రకానికి రూ.2,320 చొప్పున చెల్లించాలని ప్రభుత్వం మార్గదర్శకాల్లో తెలిపింది.

గత ప్రభుత్వంలో ధాన్యం కొనుగోళ్లు చేసిన తర్వాత 21 రోజుల్లో మద్దతు ధర చెల్లిస్తామని చెప్పింది.. కానీ ఆలస్యం జరిగింది. ఆంధ్రప్రదేశ్‌లో కూటమి ప్రభుత్వం ధాన్యం అమ్మిన 48 గంటల్లోనే రైతుల అకౌంట్‌లలోని సొమ్ము జమ చేయాలని అధికారులను ఆదేశించింది. అంతేకాదు గోనె సంచుల విషయంలో రైతులు ఇబ్బందిపడ్డారు. దీంంతో ప్రస్తుత కూటమి ప్రభుత్వం ర్యాండమైజేషన్‌ విధానం నుంచి మినహాయింపునిచ్చే అంశాన్ని పరిశీలిస్తున్నట్లు తెలుస్తోంది. అంతేకాదు ప్రభుత్వం మరో కీలక నిర్ణయం తీసుకుంది.. రైతు సేవా కేంద్రాలు, ధాన్యం కొనుగోలు కేంద్రాలు, మిల్లుల దగ్గర ఒకే రకమైన మాయిశ్చర్‌ మీటర్లను వినియోగించేలా చర్యలు తీసుకుంటోంది. గతంలో ఉన్న ర్యాండమైజేషన్‌ విధానానికి బదులుగా మండల పరిధిలోని మిల్లులకు ధాన్యం తరలించేందుకు చర్యలు తీసుకుంటున్నారు అధికారులు.