ఫోన్ పే, గూగుల్ పేతో ఒక్కరోజులో ఒక్క ట్రాన్సాక్షన్‌పై గరిష్టంగా ఎంత పంపొచ్చు..? ఏ బ్యాంకులో ఎలా?

HDFC UPI Transaction Limit: భారతదేశంలో యూనిఫైడ్ పేమెంట్స్ ఇంటర్‌ఫేస్ (UPI) రాకతో డిజిటల్ పేమెంట్స్ ఊపందుకున్నాయని చెప్పొచ్చు. మొదటి నుంచే దీనిపై ఆసక్తి ఎక్కువైంది. యూపీఐ పేమెంట్స్ చేసేందుకు.. గూగుల్ పే, ఫోన్ పే వంటి వాటితో ఇలా యూపీఐ ట్రాన్సాక్షన్స్ జరుపుతుంటారు. దీంతో.. తక్కువ టైంలోనే ఎక్కువ మంది వినియోగిస్తున్న డిజిటల్ చెల్లింపుల సాధనంగా మారింది యూపీఐ. ఈ క్రమంలోనే యూపీఐ సేవల్ని మరింత మందికి చేరువ చేసేందుకు కొత్త కొత్త సదుపాయాల్ని ఎప్పటికప్పుడు పరిచయం చేస్తూనే ఉంది రిజర్వ్ బ్యాంక్ ఆఫ్ ఇండియా (RBI). ఇందులో భాగంగానే.. ఇంటర్నెట్ లేకున్నా పేమెంట్స్ చేసేందుకు వీలుగా యూపీఐ 123 పే, చిన్న మొత్తాల్లో పేమెంట్స్ చేసేందుకు.. యూపీఐ లైట్, యూపీఐ లేకున్నా ఒకే యూపీఐ ఐడీతో ఎక్కువ మంది వినియోగించుకునేలా యూపీఐ సర్కిల్ తీసుకొచ్చింది.

అయితే యూపీఐ పేమెంట్స్ చేసేవారి కోస.. రోజువారీగా యూపీఐ పేమెంట్ల విషయంలో.. బ్యాంకుల వారీగా పరిమితులు ఉన్నాయి. దీని ప్రకారం.. గూగుల్ పే అయినా, ఫోన్ పే అయినా నిర్దిష్ట మొత్తం వరకే.. ఒక ట్రాన్సాక్షన్‌కు అయినా.. ఒక రోజు అయినా పంపేందుకు వీలుంటుంది.

>> అతిపెద్ద ప్రైవేట్ బ్యాంకు హెచ్‌డీఎఫ్‌సీ బ్యాంకు యూపీఐ లావాదేవీలపై రోజుకు గరిష్టంగా రూ. లక్ష వరకు ట్రాన్సాక్షన్‌కే అనుమతిస్తుంది. 24 గంటల్లో అంటే ఒక రోజులో గరిష్టంగా 20 ట్రాన్సాక్షన్స్ చేసుకోవచ్చు. వీటి మొత్తం లక్ష దాటొద్దు.
ఐసీఐసీఐ బ్యాంకులో.. గరిష్ట లావాదేవీ పరిమితి రూ. లక్షగా ఉంది. రోజు మొత్తంలో అన్ని ట్రాన్సాక్షన్స్ కలిపి లక్ష రూపాయల వరకే అనుమతి ఉంది. 24 గంటల్లో గరిష్టంగా 10 ట్రాన్సాక్షన్స్ చేసుకోవచ్చు.

అతిపెద్ద ప్రైవేట్ బ్యాంక్.. స్టేట్ బ్యాంక్ ఆఫ్ ఇండియాలో ఈ యూపీఐ లిమిట్‌ను రూ. లక్షగా నిర్ణయించింది. ఇదే సమయంలో యూనియన్ బ్యాంక్ ఆఫ్ ఇండియా, పంజాబ్ నేషనల్ బ్యాంకు, యస్ బ్యాంకు, డీసీబీ, ఇండస్ ఇండ్ బ్యాంకులు వంటివి కూడా ఇదే పరిమితిని అనుసరిస్తున్నాయి.

బ్యాంక్ ఆఫ్ బరోడా డైలీ పేమెంట్స్ లిమిట్‌ రూ. లక్షగా ఉంది. ఒక్క రోజుకు గరిష్టంగా 20 లావాదేవీలు చేసుకోవచ్చు. కెనరా బ్యాంకు.. కూడా వ్యక్తిగత లావాదేవీలపై లిమిట్ రూ. లక్షగా నిర్ణయించింద. రోజుకు 20 ట్రాన్సాక్షన్స్ జరుపుకోవచ్చు. ప్రముఖ ప్రైవేట్ బ్యాంకు.. కోటక్ మహీంద్రా బ్యాంకు యూపీఐ ద్వారా రోజుకు గరిష్టంగా లక్ష వరకు పంపుకోవచ్చు. ఒక రోజులో గరిష్టంగా 10 ట్రాన్సాక్షన్స్ నిర్వహించుకోవచ్చు. క్యూఆర్ కోడ్ అప్లోడ్ చేసి.. క్యాష్ పేమెంట్స్ చేయాలంటే రూ. 2 వేల వరకు మాత్రమే పరిమితి ఉంది. యాక్సిస్ బ్యాంకులో కూడా రూ. లక్ష గరిష్ట పరిమితిగా ఉంది. ఇక యూపీఐతో చేసే టాక్స్ పేమెంట్స్ లిమిట్ లక్ష నుంచి రూ. 5 లక్షలకు పెంచింది ఆర్బీఐ.