తిరుమలలో ప్రతి టీటీడీ ఉద్యోగికి ఉద్యోగికి నేమ్ బ్యాడ్జ్‌.. భక్తుల కోసం కీలక నిర్ణయం

Tirumala Name Badge System: టీటీడీ ఉద్యోగులకు సంబంధించి ఛైర్మన్ బీఆర్ నాయుడు మరో కీలక నిర్ణయం తీసుకున్నారు. త్వరలోనే టీటీడీ ఉద్యోగులకు నేమ్ బ్యాడ్జ్ ఏర్పాటు చేయాలని భావిస్తున్నామన్నారు. తిరుమలకు వచ్చే భక్తులతో కొందరు టీటీడీ ఉద్యోగులు దురుసుగా ప్రవర్తిస్తున్నట్లు తనకు తెలిసిందన్నారు. అందుకే ఈ నిర్ణయం తీసుకున్నామని.. ఉద్యోగులు భక్తుల విషయంలో బాధ్యతగా ఉండాలన్నారు. ఈ మేరకు ఈ సరికొత్త నిర్ణయంపై టీటీడీ ఛైర్మన్ బీఆర్ నాయుడు ట్వీట్ చేశారు.

టీటీడీ ఛైర్మన్ బీఆర్ నాయుడు కీలక నిర్ణయం తీసుకున్నారు. టీటీడీ ఉద్యోగులందరికీ త్వరలోనే నేమ్‌ బ్యాడ్జ్‌ ఏర్పాటు చేయాలని భావిస్తున్నట్లు తెలిపారు. ఈ నిర్ణయానికి కారణాలను వివరించారు.. కొందరు టీటీడీ ఉద్యోగులు భక్తుల పట్ల దురుసుగా ప్రవర్తిస్తున్నారని తన దృష్టికి వచ్చింది అన్నారు. భక్తుల పట్ల దురుసుగా ప్రవర్తించే టీటీడీ ఉద్యోగులపై చర్యలకు వెనుకాడబోను అన్నారు. ఈ నేమ్‌ బ్యాడ్జ్‌ ఇవ్వడం ద్వారా భక్తుల పట్ల అమర్యాదగా వ్యవహరించిన వారిని గుర్తించే అవకాశం ఉంటుంది అంటున్నారు.

తిరుమల శ్రీనివాసుని దర్శనం కోసం సుదూర ప్రాంతాల నుంచి వచ్చే భక్తుల పట్ల బాధ్యతాయుతంగా.. అంకితభావంతో టీటీడీ ఉద్యోగులు ప్రవర్తించేందుకు ఈ బ్యాడ్జ్‌ విధానం ఉపయోగకరంగా ఉంటుందని భావిస్తున్నాను అన్నారు. టీటీడీ అన్ని విభాగాల్లో పనిచేసే ప్రతీ ఉద్యోగికి ఈ నేమ్‌ బ్యాడ్జ్‌ త్వరలోనే ఇచ్చేందుకు ప్రయత్నం చేస్తాను అన్నారు. తిరుమల శ్రీవారి దర్శనానికి ప్రతిరోజూ దేశ, విదేశాల నుంచి భక్తులు తరలివస్తుంటారు.. అయితే కొందరు టీటీడీ ఉద్యోగులు భక్తుల పట్ల దురుసుగా ప్రవర్తించారనే విమర్శలు రావడంతో టీటీడీ ఛైర్మన్ ఈ నిర్ణయం తీసుకున్నారు.

మరోవైపు టీటీడీ పాలకమండలి మరోసారి సమావేశంకానుంది. కొత్త బోర్డు ఏర్పాటైన తర్వాత రెండో సమావేశం.. ఈ నెల 24వ తేదీ నిర్వహించనున్నట్లు తెలుస్తోంది. టీటీడీ పాలకమండలి ఛైర్మన్‌ బీఆర్‌ నాయుడు అధ్యక్షతన, బోర్డు సభ్యులు, ఎక్స్‌ అఫిషియో సభ్యులు పలు కీలక నిర్ణయాలు తీసుకునేందుకు సిద్ధమవుతున్నట్లు సమాచారం. ఇప్పటికే మొదటి ధర్మకర్తల మండలి సమావేశంలో కీలక నిర్ణయాలు తీసుకున్నారు. రెండో సమావేశంలో అభివృద్ధి కార్యక్రమాలతోపాటు గతంలో తీసుకున్న నిర్ణయాల అమలుపై చర్చించే అవకాశం ఉంది. సామాన్య భక్తులు సులభంగా, సౌకర్యవంతంగా శ్రీవారిని దర్శించుకునేందుకు అవసరమైన ఏర్పాట్లపై సమీక్షించి మరింత సమర్థంగా నిర్వహించేందుకు చర్యలు తీసుకోనున్నారు. ఈ మేరకు పలు తీర్మానాలను సిద్ధం చేస్తున్నట్లు తెలుస్తోంది.

తిరుమల శ్రీవారి మాసోత్సవాల్లో అత్యంత ముఖ్యమైనదిగా భావించే ధనుర్మాసం డిసెంబ‌రు 16వ తేదీన ప్రారంభం కానుందని శ్రీవారి ఆలయ ప్రధానార్చకులు వేణుగోపాల దీక్షితులు తెలిపారు. ‘ఆరోజు ఉద‌యం 6.57 గంటలకు ధనుర్మాస ఘడియలు ప్రారంభం కానున్న నేపథ్యంలో డిసెంబరు 17వ తేదీ నుండి స్వామివారికి నిర్వహించే సుప్రభాత సేవ స్థానంలో తిరుప్పావై నివేదిస్తారు. కాగా జనవరి 14న ధనుర్మాస ఘడియలు ముగియనున్నాయి. ధ‌నుర్మాసం సంద‌ర్భంగా శ్రీ‌వారికి విశేష కైంక‌ర్యాలు నిర్వ‌హిస్తారు. బిల్వ ప‌త్రాల‌తో స‌హ‌స్ర నామార్చ‌న చేస్తారు. శ్రీ‌విల్లి పుత్తూరు చిలుకలను ప్ర‌తి రోజూ స్వామివారికి అలంక‌రిస్తారు. ఈ ధ‌నుర్మాసం సంద‌ర్భంగా శ్రీ‌వారికి విశేష నైవేద్యాలుగా దోశ‌, బెల్లం దోశ‌, సుండ‌లు, సీరా, పొంగ‌ల్ వంటి ప్ర‌సాదాల‌ను నివేదిస్తారు’ అన్నారు.

‘పురాణాల ప్రకారం ధనుర్మాసంలో దేవతలు సూర్యోదయానికి ఒకటిన్నర గంట ముందుగా నిద్రలేచి బ్రహ్మ ముహూర్తంలో శ్రీమహావిష్ణువును ప్రత్యేకంగా ప్రార్థిస్తారు. కావున ఈ మాసానికి సౌరమానంలో ప్రత్యేక ప్రాధాన్యం ఉంది. 12 మంది ఆళ్వార్లలో శ్రీ ఆండాళ్‌(గోదాదేవి) ఒకరు. ఈమెను నాచియార్‌ అని కూడా పిలుస్తారు. శ్రీవేంకటేశ్వరస్వామివారిని స్తుతిస్తూ ఆండాళ్‌ రచించిన 30 పాశురాలను కలిపి తిరుప్పావై అంటారు. ఆళ్వార్‌ దివ్యప్రబంధంలో తిరుప్పావై ఒక భాగం. తమిళ సాహిత్యంలో దీనికి విశేష ప్రాచుర్యం ఉంది. శ్రీవారి ఆలయంలో నెల రోజులపాటు జరిగే తిరుప్పావై పారాయణంలో రోజుకు ఒకటి వంతున అర్చకులు నివేదిస్తారు. ఈ సందర్భంలో సాధారణంగా భోగశ్రీనివాసమూర్తికి బదులుగా శ్రీకృష్ణస్వామివారికి ఏకాంతసేవ నిర్వహిస్తారు. ఈ తిరుప్పావై పఠనం పూర్తిగా ఏకాంతంగా జరుగుతుంది’ అని టీటీడీ ప్రకటనలో తెలిపింది.

మరోవైపు తిరుమల శ్రీవారి ఆలయంలో జనవరి 10వ తేదీ నుంచి వైకుంఠ ఏకాదశి ప్రారంభంకానుంది. శ్రీవారి ఆలయంలో ఉదయాన్నే ధనుర్మాస కైంకర్యాలు, నిత్యకైంకర్యాలు పూర్తయిన తరువాత వైకుంఠ ప్రదక్షిణ మార్గాన్ని తెరచి ప్రారంభిస్తారని శ్రీవారి ఆలయ ప్రధానార్చకులు వేణుగోపాల దీక్షితులు తెలిపారు. పది రోజులపాటు ఈ వైకుంఠ ద్వారాలు తెరిచి.. భక్తులకు వైకుంఠ ద్వార దర్శనం కల్పిస్తాము అన్నారు.