అరుణ అరచకాలు మామూలుగా లేవుగా.. ఏకంగా గన్నుతోనే బెదిరించింది.. మరో కేసు నమోదు..

నెల్లూరు లేడీ డాన్‌ నిడిగుంట అరుణ మెడకు ఉచ్చు మరింత బిగుస్తోంది.. ఆమెపై వరస కేసులు నమోదవుతున్నాయి.. తాజాగా.. మరో కేసు నమోదవ్వడం కలకలం రేపుతోంది. నెల్లూరుకు చెందిన అరుణపై మరో కేసు నమోదైంది.. అన్నదమ్ముల ఆస్తివివాదంలో తలదూర్చి గన్‌తో తనను బెదిరించారని బాధితుడు శశికుమార్ ఫిర్యాదు మేరకు.. నవాబుపేట పోలీసులు అరుణపై కేసు నమోదు చేశారు. అరుణ అనుచరులు అరుగురిని విచారించిన కోవూరు పోలీసులు.. మరిన్ని వివరాలు సేకరించారు. అరుణ దందాలపై ఆమె అనుచరులు పల్లం వేణు, అంకిం రాజా, షేక్ అప్సర్, షేక్ మునీర్, మచ్చకర్ల గణేష్, ఎలిషాలను కోవూరు CI సుధాకర్ రెడ్డి విచారించారు. అరుణతో కలిసి చేసిన నేరాలు, బెదిరింపులు, దందాల గురించి ఆరాతీశారు. కాగా.. ఇప్పటికే సాయి అపార్ట్‌మెంట్‌లో ఓ ఫ్లాట్‌ను ఆక్రమించిన కేసులో అరుణతో పాటు మరో ఆరుగురిని అరెస్ట్ చేసి పోలీసులు రిమాండ్‌కి పంపించారు. కోర్టు14 రోజుల రిమాండ్ విధించగా.. రేపటితో ముగియనుంది.. దీంతో పోలీసులు మళ్లీ ఆమెను అదుపులోకి తీసుకుని విచారించే అవకాశం ఉంది.

నెల్లూరు జిల్లా కోవూరు పరిధిలోని పడుగుపాడుకు చెందిన బిల్డర్‌ను బెదిరించిన కేసులో ఈ నెల 19న ఆమె అరెస్ట్‌ అయింది. రౌడీషీటర్‌ శ్రీకాంత్ గ్యాంగ్‌తో ఉన్న సంబంధాలు.. వారిని అడ్డం పెట్టుకుని చేసిన దందాలు గురించి పోలీసులు ఇప్పటికే వివరాలు సేకరించారు. ప్రధానంగా.. గూడూరు, సూళ్లూరుపేట, నెల్లూరు రూరల్‌లో దందాలు, దౌర్జన్యాలు, సెటిల్‌మెంట్లకు పాల్పడినట్లు పోలీసుల దగ్గర పక్కా సమాచారం ఉండడంతో వాటి ఆధారంగా మరిన్ని వివరాలు రాబట్టేందుకు కోవూరు పోలీసులు ప్రయత్నిస్తున్నారు.

కాగా.. గత నాలుగైదేళ్లుగా లేడీ డాన్ నిడిగుంట నెల్లూరు సహా పలు ప్రాంతాల్లో దందాలను నిర్వహించింది. ఏకంగా.. రౌడీషీటర్ శ్రీకాంత్ భార్యను అని చెప్పుకుంటూ దందాలు నిర్వహించింది. రౌడీషీటర్ శ్రీకాంత్‌ తన భర్తగా చెప్పుకుంటూ, ఆయన పెరోల్ కోసం పోలీస్, పొలిటికల్ వ్యవస్థల్నే మేనేజ్ చేసినట్టు ఆమెపై అభియోగాలున్నాయి. హోంమంత్రి అనిత స్పందించడంతో అరుణపై యాక్షన్ ప్లాన్ షురూ అయింది.