హెల్త్, లైఫ్‌ ఇన్సూరెన్స్‌పై జీఎస్టీ ఎత్తివేయండి.. నిర్మలా సీతారామన్ సమాధానం ఇదే!

GST on Insurance: గత కొన్ని రోజులుగా జీఎస్టీపై తీవ్ర చర్చ జరుగుతోంది. హెల్త్, లైఫ్ ఇన్సూరెన్స్‌లపై విధించిన 18 శాతం జీఎస్టీని ఎత్తివేయాలని కేంద్రంలోని నరేంద్ర మోదీ ప్రభుత్వానికి డిమాండ్లు, విజ్ఞప్తులు వెల్లువెత్తుతున్నాయి. ఈ క్రమంలోనే స్వయంగా కేంద్రమంత్రి నితిన్ గడ్కరీ.. ఆర్థిక శాఖ మంత్రి నిర్మలా సీతారామన్‌కు విజ్ఞప్తి చేయడంతో ఈ విషయం మరింత చర్చనీయాంశంగా మారింది. ఈ క్రమంలోనే పశ్చిమ బెంగాల్ ముఖ్యమంత్రి, తృణముల్ కాంగ్రెస్ అధినేత్రి మమతా బెనర్జీ కూడా.. కేంద్ర మంత్రి నిర్మలా సీతారామన్‌కు లేఖ రాశారు. జీవిత, ప్రమాద బీమాలపై జీఎస్టీని తొలగించాలని డిమాండ్ చేశారు. ఈ క్రమంలోనే ఇలాంటి డిమాండ్లు ఇండియా కూటమి నేతల నుంచి వెల్లువెత్తుతున్న తరుణంలో పార్లమెంటులో నిర్మలా సీతారామన్ స్పందించారు.

దేశంలో గూడ్స్ అండ్ సర్వీసెస్ ట్యాక్స్ – జీఎస్టీ విధానం అమల్లోకి రాకముందు నుంచు కూడా హెల్త్, లైఫ్ ఇన్సూరెన్స్ ప్రీమియంలపై ట్యాక్స్ వసూలు అయ్యేదని కేంద్ర ఆర్థిక మంత్రి నిర్మలా సీతారామన్‌ గుర్తు చేశారు. జీఎస్టీ అమల్లోకి వచ్చిన తర్వాత.. నరేంద్ర ప్రభుత్వం కొత్తగా ఈ పన్నులు ఏమీ తీసుకురాలేదని తేల్చి చెప్పారు. ఈ ట్యాక్స్ అన్ని రాష్ట్రాల్లో అమలైందని పేర్కొన్నారు. జీఎస్టీ విధానం అమల్లోకి వచ్చిన తర్వాత కూడా అదే విధానం కొనసాగిందని స్పష్టం చేశారు. ఇలా హెల్త్, లైఫ్ ఇన్సూరెన్స్ ప్రీమియంల నుంచి వసూలు చేసినన మొత్తం జీఎస్టీలో 75 శాతం ఆయా రాష్ట్రాలకే వెళ్తోందని ఆమె వెల్లడించారు.

ఈ క్రమంలోనే ఇన్సూరెన్స్ ప్రీమియంలపై జీఎస్టీని ఎత్తేయాలని లోక్‌సభలో డిమాండ్ చేస్తున్న వారు ఎప్పుడైనా తమ రాష్ట్రాల్లో దీనిపై చర్చించారా అని నిర్మలా సీతారామన్ ప్రశ్నించారు. నితిన్ గడ్కరీని ఉద్దేశించి మాట్లాడిన నిర్మలా సీతారామన్.. ఒకరు లేవనెత్తిన అంశంపై ఏకంగా 200 మంది ఎంపీలు పార్లమెంట్‌ వేదికగా అదే పాట పాడుతున్నారని ఆమె ఎద్దేవా చేశారు. దీంతో హెల్త్, లైఫ్ ఇన్సూరెన్స్ ప్రీమియంలపై ప్రస్తుతం అమలు అవుతున్న 18 శాతం జీఎస్టీ కొనసాగుతుందని నిర్మలా సీతారామన్ మాటల ద్వారా అర్థం అవుతోంది.

ఈ క్రమంలోనే ఈ ఆర్థిక సంవత్సరానికి సంబంధించి ప్రవేశపెట్టిన బడ్జెట్‌కు సంబంధించిన ఫైనాన్స్‌ బిల్లు – 2024కు లోక్‌సభ ఆమోదం తెలిపింది. ఈ బడ్జెట్‌లో రియల్‌ ఎస్టేట్‌ రంగానికి ప్రతిపాదించిన దీర్ఘకాలిక మూలధన లాభాల పన్ను – ఎల్‌టీసీజీ నిబంధనలను ఈ బిల్లులో సవరించారు. ఈ క్రమంలోనే పాత, కొత్త విధానంలో ఏది ప్రయోజనకరమమైతే అది ఎంపిక చేసుకునే అవకాశాన్ని కేంద్రం కల్పించింది. 2024-25 బడ్జెట్‌లో 20 శాతంగా ఉన్న ఎల్‌టీసీజీని 12.5 శాతానికి కేంద్రం తగ్గించింది. ఇక ద్రవ్యోల్బణ సూచీ సర్దుబాటును తొలగించారు. మొత్తం 45 సవరణలతో మూజువాణి ఓటుతో బిల్లు లోక్‌సభ ఆమోదం పొందింది.