Amaravati News Navyandhra First Digital News Portal
పారిస్ 2024 ఒలింపిక్స్‌కు అధికారికంగా తెరలేచింది. ఒలింపిక్ చరిత్రలో తొలిసారి నదిలో జరిగిన ఈ సంబురాలు.. చూపరులను ఆకట్టుకున్నాయి. గతానికి భిన్నంగా, చరిత్రలో ఎన్నడూ లేని రీతిలో పారిస్ ఒలింపిక్స్ ఆరంభ వేడుకలు అంబరాన్ని తాకాయి. చారిత్రక సీన్‌ నది ఒడ్డును తమ దేశ ఘనమైన వారసత్వాన్ని ప్రపంచానికి చాటిచెబుతూ ఫ్రాన్స్ ప్రారంభ వేడుకలను అదిరిపోయే రీతిలో నిర్వహించింది. గతంలో ఎప్పుడైనా ప్రారంభ వేడుకలు స్టేడియంలో జరిగేవి.. కానీ పాత పద్దతికి స్వస్తి పలుకుతూ సెన్ నదిపై వేడుకలను ఘనంగా నిర్వహించింది ఫ్రాన్స్. విశ్వక్రీడల చరిత్రలో లిఖించదగ్గ సంబరాలను నిర్వహించింది.
భారత కాలమానం ప్రకారం శుక్రవారం రాత్రి 11 గంటలకు ఈ వేడుకలు ప్రారంభం అయ్యాయి. దిగ్గజ ఫుట్‌బాలర్‌ జినేదిన్ జిదాన్ ఒలింపిక్ టార్చ్‌ పట్టుకుని పరిగెత్తగా..అతన్ని అనుసరిస్తూ కొంత మంది చిన్నారులు పడవలో ప్రయాణించడంతో ప్రారంభోత్సవ కార్యక్రమానికి తెరతీసినట్లు అయ్యింది. ఫ్రాన్స్ అధ్యక్షుడు ఇమ్మాన్యుయేల్ మేక్రాన్, అంతర్జాతీయ ఒలింపిక్ సమాఖ్య అధ్యక్షుడు థామస్ బాక్, వివిధ క్రీడల్లోని దిగ్గజ అథ్లెట్లు, పలువురు ప్రపంచదేశాల ప్రముఖులు ఈ వేడుకల్లో భాగం అయ్యారు. పారిస్ సంస్కృతిని ప్రతిబింబిస్తూ అంతకుముందు జరిగిన షోలో పలువురు క్రీడా ప్రముఖులు ప్రత్యేక దుస్తులు ధరించి ఈఫిల్‌ టవర్‌ ముందు ఫొటోలు ఫోజులు ఇచ్చారు.
ఒలింపిక్స్‌కు ఆద్యులైన గ్రీస్ బృందం తొలుత పరేడ్‌లో పాల్గొంది. ఆ తర్వాత ఫ్రెంచ్ అక్షర క్రమంలో మిగతా దేశాలు.. ఈ పరేడ్‌లో పాల్గొన్నాయి. 84వ దేశంలో భారత్ ఈ పరేడ్‌లో పాల్గొంది. భారత్ తరఫున పీవీ సింధు, శరత్‌ కమల్‌ పతాకధారులుగా వ్యవహరించారు. ఈ ఇద్దరూ త్రివర్ణ పతాకాన్ని పట్టుకుని పడవలో ముందు వరుసలో నిల్చనున్నారు. భారత బృందం నుంచి మొత్తంగా 78 మంది ఈ పరేడ్‌లో పాల్గొన్నారు. సంప్రదాయ భారతీయ దుస్తులు ధరించి అథ్లెట్లు ఈ వేడుకల్లో పాల్గొన్నారు. త్రివర్ణ పతాకంలోని మరో రెండు రంగులతో రూపొందించిన చీరలన మహిళలు.. కుర్తా, పైజామాను పురుషులు ధరించారు.
సెన్ నదిపై సుమారు 6 కిలోమీటర్ల మేర ఈ పరేడ్ జరిగింది. 85 పడవలపై 6800 మంది అథ్లెట్లు ఈ ఆరంభ వేడుకల్లో పాల్గొన్నారు. ఇందులో 205 దేశాలకు చెందిన అథ్లెట్లు, సహాయక సిబ్బంది, అధికారులు ఉన్నారు. ఈ వేడుకలను చూసేందుకు సుమారు 3.20 లక్షల మంది ప్రేక్షకులు హాజరయ్యారు. ఈ స్థాయిలో ప్రేక్షకులు హాజరవడం కూడా రికార్డే. ఆరంభ వేడుకలను చూసేందుకు నది పరిసరాల్లో సుమారు 80 భారీ తెరలను ఏర్పాటు చేశారు. మొత్తం మీద ఒలింపిక్స్ ఆరంభ వేడుకలు ఘనంగా నిర్వహించారు.
