Amaravati News Navyandhra First Digital News Portal
Tirumala: శ్రీవారిని దర్శించుకునేందుకు నిత్యం వేలాది మంది.. తిరుమలకు చేరుకుంటారు. అయితే రాష్ట్రం కాని రాష్ట్రం నుంచి వచ్చే భక్తులకు అక్కడి నిబంధనలు, సౌకర్యాలు తెలియవు. అయితే ఇలాంటి భక్తులను టార్గెట్ చేసుకుని మోసాలు చేస్తూ ఉంటారు. ఈ నేపథ్యంలోనే తాజాగా వెరైటీ మోసం వెలుగులోకి వచ్చింది. లాకర్ల పేరుతో భక్తులను బెదిరింటి డబ్బులు వసూలు చేస్తున్న వ్యక్తిని పోలీసులు అరెస్ట్ చేశారు. ఈ కేసును సీరియస్‌గా తీసుకున్న పోలీసులు.. దీని వెనుక ఎవరి హస్తం ఉంది అనే కోణంలో దర్యాప్తు చేస్తున్నారు. దితుడిని సాఫ్ట్వేర్ ఉద్యోగి తిలక్‌గా పోలీసులు గుర్తించారు.
సాధారణంగా నిత్యం తిరుమలకు వచ్చే భక్తులు కొందరు గదులు బుక్ చేసుకుంటూ ఉంటారు. మరికొందరు ఎక్కడ కొంత ఖాళీ స్థలం కనిపించినా అక్కడే బస చేస్తారు. ఇక తమ వస్తువులు, బ్యాగులు, ఇతర సామాగ్రిని దాచుకునేందుకు తిరుమల తిరుపతి దేవస్థానం అధికారులు ఉచితంగా ఏర్పాటు చేసిన లాకర్లలో దాచుకుంటారు. అయితే ఎన్నిరోజులు ఆ లాకర్లలో సామాన్లు దాచుకున్నా ఒక్క రూపాయి కూడా కట్టాల్సిన అవసరం ఉండదు. కానీ కొందరు వ్యక్తులు ఈ లాకర్లను ఆసరాగా చేసుకుని డబ్బులు దండుకుంటున్నారు. ఇలా ఓ మహిళ భక్తురాలికి ఎదురైన సంఘటనలో ఈ మోసం వెలుగులోకి వచ్చింది.
ఓ మహిళా భక్తురాలు శ్రీవారిని దర్శించుకునేందుకు తిరుమల కొండకు వచ్చింది. ఈ క్రమంలోనే తన వద్ద ఉన్న సామాన్లను లాకర్లలో భద్రపరుచుకుంది. అయితే ఆమె మొదట చెప్పిన సమయానికి లాకర్ నుంచి తన సామాన్లను తీసుకోలేదు. లాకర్ తీసుకున్న సమయంలో ఇచ్చిన ఫోన్ నెంబర్ ఆధారంగా తిలక్ అనే వ్యక్తి టీటీడీ ఉద్యోగిని అంటూ ఆ మహిళకు ఫోన్ చేశాడు. నిర్ణీత గడువులోగా లాకర్‌ను ఖాళీ చేయలేదని అందుకు ఫైన్‌ కట్టాలని బెదిరించాడు. దీంతో ఆ మహిళకు అనుమానం వచ్చి పోలీసులకు ఫిర్యాదు చేయగా అసలు విషయం బయటికి వచ్చింది. దీంతో రంగంలోకి దిగి విచారణ చేపట్టిన పోలీసులు నిందితుడు తిలక్‌ను అరెస్ట్ చేశారు.
ఈ క్రమంలోనే ఈ మోసం వెనకాల ఎవరైనా టీటీడీ ఉద్యోగుల హస్తం ఉందా అనే కోణంలో పోలీసులు విచారణ చేస్తున్నారు. అసలు భక్తుల ఫోన్ నంబర్, ఇతర వివరాలు తిలక్ వద్దకు ఎలా వెళ్లాయనే దానిపై పోలీసులు దర్యాప్తు కొనసాగిస్తున్నారు. ఈ కేసులో నిందితుడిగా ఉన్న తిలక్ ఒక సాఫ్ట్వేర్ ఉద్యోగి అని పోలీసులు గుర్తించారు. ఇక ఇలాంటి ఘటనల పట్ల అలర్ట్‌గా ఉండాలని భక్తులకు అధికారులు, పోలీసులు సూచిస్తున్నారు.
