విండ్‌ఫాల్ టాక్స్ ఎత్తివేత.. నెక్ట్స్ పెట్రోల్, డీజిల్ ధరలు తగ్గింపే! పెట్రోలియం శాఖ అధికారి క్లారిటీ..

ఇంటర్నేషనల్ మార్కెట్లో క్రూడాయిల్ రేట్లు తగ్గిన సంగతి తెలిసిందే. ఇటీవల వరుసగా తగ్గి సుమారు 3 సంవత్సరాల దిగువకు కూడా పడిపోయాయి. పలు అంతర్జాతీయ పరిణామాలు ఇందుకు దోహదం చేశాయి. అక్కడ చమురు రేట్లు భారీ స్థాయిలో పడిపోయిన నేపథ్యంలో ప్రధాని నరేంద్ర మోదీ నేతృత్వంలోని కేంద్ర ప్రభుత్వం ఇటీవల దేశీయంగా ఉత్పత్తి అయ్యే ముడి చమురు ఉత్పత్తులపై విండ్‌ఫాల్ టాక్స్ సున్నాకు చేర్చింది. అంతకుముందే పెట్రోల్, డీజిల్ సహా ఏటీఎఫ్ ఎగుమతులపై విండ్‌ఫాల్ టాక్స్ సున్నాగా ఉండగా.. క్రూడాయిల్‌పై మాత్రం విండ్‌ఫాల్ టాక్స్ టన్నుకు వేలల్లో ఉండేది. దీనిని అంతర్జాతీయ చమురు ధరలకు అనుగుణంగా సవరిస్తూ వచ్చేది. ఇటీవల.. మాత్రం అంతర్జాతీయంగా ధరలు పడిపోయిన క్రమంలో.. ఒక్కసారిగా దీనిని కూడా సున్నాకు చేర్చింది.

దీంతో.. ఇక తర్వాత కేంద్రం దేశీయంగా వాహనదారులకు గుడ్‌న్యూస్ చెబుతుందని చర్చ నడుస్తోంది. పెట్రోల్, డీజిల్ ధరలు కూడా దిగొచ్చే అవకాశాలు ఉంటాయని కొద్ది రోజులుగా వార్తలు వస్తున్నాయి. ముఖ్యంగా ఇప్పుడు మహారాష్ట్ర అసెంబ్లీ ఎన్నికల నేపథ్యంలో.. కేంద్రం పక్కా ప్లాన్‌తో రేట్లు తగ్గించొచ్చని ఊహాగానాలు వస్తున్నాయి. అయితే.. ఇక్కడ రేట్లు తగ్గించకపోవడంపై ఇప్పుడు పెట్రోలియం శాఖకు చెందిన ఒక ఉన్నత అధికారి స్పందించారు. ముడి చమురు ధరలు భారీగా హెచ్చుతగ్గులకు లోనవుతుండటమే దీనికి కారణం అని తెలిపారు.

‘మహా’ ఎన్నికలకు ముందే.. చమురు సంస్థలు ఇంధన ధరలు తగ్గించే అవకాశం ఉందా.. అనే ప్రశ్నకు ఆ అధికారి బదులిచ్చారు. ఈ విషయంపై ఇప్పుడే ఏం చెప్పలేమన్నారు. ‘అంతర్జాతీయంగా ముడి చమురు రేట్లు భారీగా హెచ్చుతగ్గులకు లోనవుతున్నాయి. ఒక రోజు భారీగా తగ్గితే.. మరుసటి రోజు మళ్లీ పెరుగుతున్నాయి’ అని అన్నారు. ఇలా ఒడుదొడుకులు కొనసాగుతున్నంత వరకు.. ప్రభుత్వ రంగ చమురు కంపెనీలు రోజువారీ ధరల సర్దుబాటు విధానానికి మారకపోవచ్చని వివరించారు.

గతంలో దేశీయంగా పెట్రోల్, డీజిల్ ధరల్ని ఆయిల్ కంపెనీలు రోజువారీగా సవరించేవి. రోజుకు లీటర్‌పై 10 పైసలు, 20 పైసలు, 50 పైసలు ఇలా తగ్గించడం, పెంచడం చేసేవి. అయితే.. రష్యా- ఉక్రెయిన్ యుద్ధం సమయంలో అంతర్జాతీయ మార్కెట్లో రేట్లు భారీగా పెరగ్గా.. ఇక్కడ కూడా పెరిగాయి. తర్వాత తగ్గినప్పటికీ.. ఇక్కడ ఆయిల్ కంపెనీలు తగ్గించకుండా అలాగే స్థిరంగా ఉంచాయి. దీంతో నష్టాల్ని పూడ్చుకున్నాయి. దాదాపు రెండేళ్లపాటు స్థిరంగా ఉండగా.. ఇటీవల లోక్‌సభ ఎన్నికల సమయంలో కేంద్రం.. లీటర్ ధరలపై రూ. 2 వరకు తగ్గించాయి.

ఇంటర్నేషనల్ మార్కెట్లో బ్రెంట్ ముడి చమురు ధర బ్యారెల్‌కు గత వారంలో 70 డాలర్ల వద్ద ఉండేది. 2021 డిసెంబర్ తర్వాత.. తొలిసారి ఈ స్థాయికి చేరింది. ఆ తర్వాత మళ్లీ పుంజుకుంటోంది. మళ్లీ మంగళవారం వరకు చూస్తే ఇది 75 డాలర్లకు చేరింది. ఇంటర్నేషనల్ మార్కెట్లో మరికొన్ని ఇంధన ధరలు తగ్గినట్లయితే.. ఇక్కడ కూడా ధరల్ని తగ్గించే అవకాశాలు ఉంటాయని.. ఇటీవల పెట్రోలియం శాఖ కార్యదర్శి పంకజ్ జైన్ స్పందించారు. ఇక ప్రస్తుతం దేశీయంగా లీటర్ పెట్రోల్ ధర హైదరాబాద్‌లో రూ. 107.41 గా ఉండగా లీటర్ డీజిల్ రూ. 95.65 పలుకుతోంది.