ఏపీలో వారందరి అకౌంట్‌లలోకి డబ్బులు.. ఒక్కొక్కరికి రూ.25వేలు, రూ.10వేలు జమ

ఆంధ్రప్రదేశ్ ప్రభుత్వం భారీ వర్షాలు, వరద బాధితులకు నేడు సాయం అందించనుంది. రాష్ట్రవ్యాప్తంగా దాదాపు 4 లక్షల మందికి కూటమి ప్రభుత్వం ప్యాకేజీని అందజేస్తోంది. నేడు ఎన్టీఆర్ జిల్లా కలెక్టరేట్‌లో పలువురు వరద బాధితులకు సీఎం చంద్రబాబు సాయం అందజేస్తారు. ఈ 4 లక్షలమందిలో విజయవాడ పరిధిలోనే సుమారు లక్షన్నర మంది బాధితులు ఉన్నారు. ఇవాళ ఆర్థిక సాయం కింద సుమారు రూ. 600 కోట్లను బాధితులకు సాయం కింద ప్రభుత్వం పంపిణీ చేయనున్నారు. అలాగే ఇళ్లు, షాపులు, వాహనాలు, పంటలు, పశువులు, తోపుడు బండ్ల వ్యాపారాలు, చిన్న తరహ పరిశ్రమలకు ఏపీ ప్రభుత్వం ఆర్థిక సాయం అందజేస్తోంది. ముఖ్యమంత్రి చంద్రబాబు ఇవాళ ఎన్టీఆర్‌ జిల్లా కలెక్టరేట్‌ నుంచి నేరుగా డీబీటీ కింద బాధితుల బ్యాంకు ఖాతాలకు జమ చేస్తారని కలెక్టర్‌ జి.సృజన తెలిపారు.

ఇవాళ డీబీటీ కింద బాధితుల బ్యాంక్ ఖాతాలకు నేరుగా ఆర్థిక ప్యాకేజీని జమ చేస్తారు. ఎన్డీఆర్ఎఫ్ మార్గదర్శకాలకు మించి ఏపీ ప్రభుత్వం సాయం అందిస్తోంది. ముంపు ప్రాంతాల్లో రూ.180 కోట్ల మేర బ్యాంక్ రుణాల రీ-షెడ్యూల్ చేయనున్నారు. ఒకవేళ అర్హత ఉన్నా సరే.. ఎవరైనా బాధితుల పేర్లు ఎన్యూమరేషన్ ప్రక్రియలో రాకపోతే నిబంధనల ప్రకారం.. వారికి కూడా ఆర్థిక ప్యాకేజీ అందించాలని ముఖ్యమంత్రి చంద్రబాబు సంబంధించి అధికారులను ఆదేశించారు.

రాష్ట్ర విపత్తు నిర్వహణ సంస్థ వరదల కారణంగా నష్టపోయిన వారికి నిర్దేశించిన దానికంటే ఆర్థిక సాయాన్ని పెంచుతూ ప్రభుత్వం ఉత్తర్వులు జారీ చేసింది. విజయవాడలో ఇళ్లు పూర్తిగా నీట మునిగిన బాధితులకు రూ.11వేలకు బదులుగా రూ.25 వేలు ఇస్తారు. మొదటి ఫ్లోర్లో ఉన్నవారికి రూ.10 వేలు, షాపులకు, పంటలకు హెక్టారుకు రూ.25 వేలు అందించనున్నారు. ఇళ్లు ధ్వంసమైన వారికి ప్రభుత్వం కొత్త ఇంటిని నిర్మించి ఇవ్వనుంది. వరదకు నష్టపోయిన అందరి వివరాలు పారదర్శకంగా సేకరించామని చెబుతున్నారు అధికారులు. ఒకవేళ అర్హత ఉండి పేరు లేకపోతే.. వారి వివరాలు కూడా సేకరించి న్యాయం చేస్తామన్నారు. వారికి డబ్బులు జమ చేస్తామని చెబుతున్నారు.

మరోవైపు విజయవాడ వరదలకు బ్యాక్టీరియా వల్ల కాలు కోల్పోయిన బాలుడికి ముఖ్యమంత్రి చంద్రబాబు ఆర్ధిక సాయం అందజేశారు. జగ్గయ్యపేట ఆర్టీసీ కాలనీలో వరదలతో బాక్టీరియాతో బాలుడు ఒక కాలు కోల్పోయాడు. రెండో కాలికి కూడా ఇదే లక్షణాలు ఉండటంతో ప్రత్యేకంగా వైద్యం అందించాల్సిన పరిస్థితి. ఈ విషయాన్ని జగ్గయ్యపేట ఎమ్మెల్యే శ్రీరామ్ తాతయ్య ముఖ్యమంత్రి చంద్రబాబు దృష్టికి తీసుకెళ్లారు. వెంటనే స్పందించిన సీఎం చంద్రబాబు.. రూ. 10 లక్షలు అందించాలని నిర్ణయించారు. ఈ మేరకు ఎమ్మెల్యే శ్రీరామ్ తాతయ్యకు సీఎంవో అధికారులు ఎల్‌వోసీ లేఖ ఇచ్చారు. సీఎం చంద్రబాబు ఆర్థిక సాయం చేయడంతో బాధితుడి కుటుంబ సభ్యులు ధన్యవాదాలు తెలిపారు.