ఏపీలో రేషన్‌కార్డులు ఉన్నవారికి ప్రభుత్వం ఊరట.. జనవరి నుంచి పక్కా, కీలక ప్రకటన

ఏపీలో రేషన్‌కు సంబంధించి ప్రభుత్వం కీలక నిర్ణయం తీసుకుంది. రేషన్ షాపుల ద్వారా ప్రభుత్వం రాయితీపై నిత్యావసరాలు పంపిణీ చేయనుంది. తెల్లకార్డులు ఉన్నవారికి రాయితీపై 16 నెలల తర్వాత.. దసరా సందర్భంగా కందిపప్పు, పంచదార పంపిణీ మళ్లీ మొదలైంది. ప్రభుత్వం రూ.67కు కిలో కందిపప్పు, రూ.17కు అరకిలో పంచదార పంపిణీ చేయాలని ప్రభుత్వం నిర్వహించింది. అంతేకాదు మంత్రి నాదెండ్ల మనోహర్ మరో కీలక ప్రకటన చేశారు.

ఏపీ ప్రభుత్వం ప్రతి నెలా రేషన్‌ కార్డుదారులకు రాయితీపై కందిపప్పు, పంచదార అందిస్తామని పౌరసరఫరాలశాఖ మంత్రి నాదెండ్ల మనోహర్ చెప్పారు. వచ్చే ఏడాది జనవరి నుంచి తృణధాన్యాలు కూడా పంపిణీ చేసేలా ప్రణాళికలు రూపొందిస్తామన్నారు. తెనాలిలో కార్డుదారులకు రాయితీపై కిలో కందిపప్పు, అర కిలో పంచదార అందించే కార్యక్రమాన్ని ప్రారంభించారు.. అనంతరం ఈ కీలక ప్రకటన చేశారు.

ఏపీ ప్రభుత్వం తీసుకున్న నిర్ణయంతో 1.48 కోట్ల కుటుంబాలకు లబ్ధి జరుగుతుంది. గత వైఎస్సార్‌సీపీ ప్రభుత్వ హయాంలో.. గతేడాది జూన్‌ నుంచి కందిపప్పు పంపిణీ ఆగిపోయింది. ఏపీలో కొత్త ప్రభుత్వం వచ్చిన తర్వాత కందిపప్పు పంపిణీపై ఫోకస్ పెట్టింది. జూన్ నుంచి మూడు నెలల పాటు సరఫరా చేసేందుకు రెండుసార్లు టెండర్లు పిలిచినా పంపిణీకి బ్రేకులు పడ్డాయి. ఈ నెలలో అన్ని కసరత్తులు పూర్తి చేసి పంపిణీ ప్రారంభించారు. మంగళవారం నుంచి పంపిణీ ప్రారంభించారు అధికారులు.. రాయితీపై సరకులు అందజేస్తుండటంతో రేషన్‌కార్డులు ఆనందం వ్యక్తం చేశారు.

ఆంధ్రప్రదేశ్‌లో బ‌హిరంగ మార్కెట్లో నిత్యావ‌స‌ర స‌రుకుల ధ‌ర‌లు పెరిగిపోతుండ‌గా వాటిని నియంత్రించేందుకు ముఖ్యమంత్రి చంద్రబాబు నాయుడు, డిప్యూటీ సీఎం ప‌వ‌న్ క‌ళ్యాణ్ సూచ‌న మేర‌కు ఈ నిర్ణయం తీసుకున్నామన్నారు. ఈ పథకం ద్వారా రాష్ట్రంలో 4 కోట్ల 30 ల‌క్షల మందికి ల‌బ్ధి చేకూరుతుంద‌ని తెలిపారు. గ‌త ప్రభుత్వం బ‌స్తాల్లో రేష‌న్ షాపుల‌కు కందిప‌ప్పు, పంచ‌దార పంపిణీ చేసేవాళ్లని.. ఇప్పుడు జీఎస్టీ అద‌న‌పు భార‌మైన‌ప్పటికీ ప్యాకింగ్ చేసి నాణ్యమైన వాటిని అందిస్తున్నామని చెప్పారు.

మరోవైపు 2019 వరకు రేషన్‌ కార్డులు ఉన్నవారికి రాయితీపై కిలో రూ.40 చొప్పున రెండు కిలోల కందిపప్పు పంపిణీ చేసేవారు. కానీ వైఎస్సార్‌సీపీ ప్రభుత్వం అధికారంలోకి వచ్చిన తర్వాత రెండు కిలోలను కోతపెట్టి.. కేవలం కిలో చొప్పున పంపిణీ చేసింది. ఆ తర్వాత 2020 ఏప్రిల్‌ నుంచి కిలో ధర రూ.67కు పెంచారు. ఆ తర్వాత పంపిణీ కూడా సరిగా జరగలేదనే విమర్శలు వచ్చాయి. ఆ తర్వాత కూటమి ప్రభుత్వం అధికారంలోకి వచ్చిన తర్వాత.. రేషన్‌లో కొన్ని లోపాలను గుర్తించారు. అందుకే జూన్‌ నుంచి సరుకుల పంపిణీ నిలిపివేశారు.. కేవలం బియ్యం మాత్రం పంపిణీ చేశారు. అయితే దసరా, దీపావళి పండుగలు ఉండటంతో.. నిత్యావసరాల ధరలు భారీగా పెరిగాయి. దీంతో ప్రభుత్వం ప్రజలకు ఊరట ఇచ్చింది.. మళ్లీ ఈ నెల నుంచి బియ్యం, కందిపప్పు, చక్కెరను పంపిణీ చేస్తున్నారు. దసరా పండుగ సందర్భంగా రేషన్ కార్డులు ఉన్నవారికి ఇది శుభవార్త అని చెప్పాలి.