తిరుమలలో హోటల్స్ సీజ్, లైసెన్స్‌లు రద్దు.. టీటీడీ సంచలన నిర్ణయం

తిరుమ‌ల‌లో నిబంధ‌న‌లు పాటించ‌ని హోట‌ల్స్, వాహ‌నాల‌పై టీటీడీ ఎస్టేట్, ర‌వాణా విభాగాలు చ‌ర్య‌లు తీసుకున్నాయి. తిరుమలలో టీటీడీ ఎస్టేట్ అధికారి ఆకస్మిక తనిఖీలు నిర్వ‌హించ‌గా భక్తులకు అధిక ధరలకు తినుబండాలు విక్రయిస్తూ, పరిశుభ్రత లేని పలు ఫాస్ట్ ఫుడ్ సెంటర్లు, షాపుల్ని అధికారులు సీజ్ చేశారు. తిరుమల శ్రీవారి వార్షిక బ్రహ్మోత్సవాలకు దేశ విదేశాల నుంచి భక్తులు వస్తుండటంతో తనిఖీలు నిర్వహించారు. ముందుగా పీఏసీ- 2 (మాధవ నిలయం) వద్ద అధిక ధరలకు విక్రయిస్తున్న ఒక టీ దుకాణం, రెండు ఫ్యాన్సీ షాపులను సీజ్ చేశారు.

అనంత‌రం గోవర్ధన్ సత్రాల దగ్గర టీటీడీ కేటాయించిన స్థలాల కంటే ఎక్కువ ఆక్రమించుకొని అపరిశుభ్రంగా ఫాస్ట్ ఫుడ్స్ నడుపుతున్నట్లు గుర్తించారు. శ్రీవారి భక్తులకు అధిక ధరలకు విక్రయిస్తున్న 5 ఫాస్ట్ ఫుడ్ సెంటర్లను సీజ్ చేశారు. పీఏసీ -1 దగ్గర ఎక్కువ స్థలం ఆక్రమించుకొని వ్యాపారం నిర్వహిస్తున్న 3 హాకర్ లైసెన్స్ దుకాణాలను తాత్కాలికంగా మూసేసి లైసెన్స్ పత్రాలు తీసుకున్నారు. డీఎంబీ రోడ్డులో భక్తులు నడిచేందుకు కూడా వీలు లేకుండా రోడ్డుపై వ్యాపారాలు నిర్వహిస్తున్న వారిని హచ్చరించారు. మరోసారి వస్తే కఠిన చర్యలు తీసుకుంటామని హెచ్చరించారు. శ్రీ వరాహ స్వామి అతిథి గృహం దగ్గర షాపులు, ఫాస్ట్ ఫుడ్స్ నిర్వాహకులు పరిశుభ్రత పాటిస్తూ కేటాయించిన మేరకు వ్యాపారాలు నిర్వహించుకోవాలని సూచించారు.

తిరుమ‌ల‌లో ట్యాక్సీ డ్రైవ‌ర్లు, టెంపో ట్రావెల‌ర్లు నిబంధ‌న‌ల‌కు విరుద్ధంగా డ‌బ్బులు వ‌సూలు చేస్తున్నార‌ని భ‌క్తుల నుంచి వ‌చ్చిన పిర్యాదు మేర‌కు టీటీడీ చ‌ర్య‌లు తీసుకుంది. చిలకలూరిపేటకు చెందిన సురేష్ అనే భక్తుడు తన కుటుంబసభ్యులతో కలిసి దర్శనానికి వచ్చి రామ్ భగీచ బస్టాండ్ వద్ద ఉన్న టెంపో ట్రావెల‌ర్ డ్రైవరు దర్శనం కోసం శిలతోరణం క్యూ లైన్ దగ్గరకు తీసుకెళ్లేందుకు 14మందికి రూ.500 తీసుకొని వారిని ఆక్టోపస్ సర్కిల్ దగ్గర దించి వెళ్లిపోయాడు. దీనికి సంబంధించి భక్తులు ఫిర్యాదు చేయగా టెంపో ట్రావెలర్ డ్రైవర్ ని గుర్తించి చేసి వారి దగ్గర ఎక్కువ మొత్తం వసూలు చేసినందుకు వారిని ఆర్టీవోకు అప్పగించారు.