Amaravati News Navyandhra First Digital News Portal
Rs 10 Coin: ప్రస్తుతం మార్కెట్‌లో రూ.10 కాయిన్లు తీసుకోవడం లేదు. ఏదైనా కొనుగోలు చేసి 10 రూపాయల నాణెం ఇస్తే చెల్లడం లేదని తీసుకోవడం లేదు. ఈ అనుభవం మీకు కూడా ఎదురయ్యే ఉంటుంది. కొందరి వద్ద పదు సంఖ్యలో నాణేలు జమ అయ్యాయని చెబుతున్నారు. ఎవరూ తీసుకోకపోవడంతో నష్టపోవాల్సిందేనా అని బాధపడుతున్న వారూ ఉన్నారు. అయితే, అలాంటి వారదరికీ ఇది శుభవార్త అని చెప్పాలి. రూ.10 నాణేల చెల్లుబాటుపై ప్రభుత్వ రంగానికి చెందిన దిగ్గజ బ్యాంకులు కీలక నిర్ణయం తీసుకున్నాయి. ఈ కాయిన్లను చలామణిలోకి మళ్లీ తీసుకొచ్చేందుకు అవగాహన కల్పిస్తున్నాయి.
మార్కెట్‌లో రూ.10 నాణెం చెల్లుతుందని స్పష్టం చేశారు ప్రభుత్వ రంగ దిగ్గజ బ్యాంకుల్లో ఒకటైన సెంట్రల్ బ్యాంక్ ఆఫ్ ఇండియా జోనల్ హెడ్ దారుసింగ్ నాయక్. కొద్ది రోజుల క్రితం రూ.10 నాణెం చెల్లుబాటుపై మాట్లాడారు. ఎవరైనా తీసుకునేందుకు విముఖత చూపించినట్లయితే వారిపై కేసులు సైతం పెట్టొచ్చని తెలిపారు. రూ.10 కాయిన్లను ఎవరూ నిరాకరించవద్దని ఆర్‌బీఐ స్పష్టమైన ఆదేశాలు ఇచ్చిందని గుర్తు చేశారు. ఈ క్రమంలో విజయవాడ సహా పలు నగరాల్లో సెంట్రల్ బ్యాంక్ ఆఫ్ ఇండియా తరపున అవగాహన కల్పించారు. తమ బ్యాంకు ఖాతాదారులకు రూ.10 నాణేలను పంపిణీ చేశారు.
తాజాగా మరో దిగ్గజ బ్యాంక్ అయిన యూనియన్ బ్యాంక్ ఆఫ్ ఇండియా (UBI) రూ.10 నాణేలపై ప్రజల్లో అవగాహన కల్పించే కార్యక్రమాలు నిర్వహిస్తోంది. పది రూపాయల నాణెం చెల్లుబాటుపై ఉన్న అపోహను తొలగించేందుకు సరికొత్త కార్యక్రమానికి శ్రీకారం చుట్టింది. వినియోగదారులతో పాటు వ్యాపారులకు రూ.10 నాణెం చెల్లుబాటుపై నమ్మకాన్ని కలిగించేందుకు వీలుగా ప్రచారం చేపట్టింది. ప్రజలకు అవగాహన కల్పించేందుకు ప్రత్యేక కార్యక్రమాలు నిర్వహిస్తోంది. రెండు రోజుల క్రితం కరీంనగర్, మంచిర్యాల ప్రాంతాల్లో యూనియన్ బ్యాంక్ ఆధ్వర్యంలో అవగాహన కార్యక్రమాలు చేపట్టారు. పది రూపాయల నాణేలు చెల్లుబాటులో లేవు అనేది ఒక అపోహ మాత్రమేనని ప్రజలకు సూచించారు అధికారులు. అలాగే ఈ కాయిన్లను తీసుకోవడానికి నిరాకరిస్తే చట్టప్రకారం చర్యలు ఎదుర్కోవలసి ఉంటుందని హెచ్చరించారు.
