ఏపీలోని ఆ ఆలయంలో ఇకపై పెళ్లిళ్లు చేసుకోవడానికి అనుమతి లేదు.. టీటీడీ కీలక నిర్ణయం!

ఆంధ్రప్రదేశ్‌లో రాములోరు కొలువైన ఒంటిమిట్ట కోదండ రామాలయానికి సంబంధించి తీసుకున్న నిర్ణయం చర్చనీయాంశమైంది. ఇకపై ఒంటిమిట్ట రామాలయంలో వివాహాలు చేసుకోవడానికి అనుమతి ఇవ్వొద్దని.. పెళ్లిలు జరగనీయకుండా ఆపేయాలని భారత పురాతత్త్వ-సర్వేక్షణశాఖ అధికారులు మౌఖిక ఆంక్షలు విధించారు. ఈ మేరకు టీటీడీ శుపరిపాలన యంత్రాంగానికి మొబైల్‌లో కాల్ చేసి ఆదేశించారు. పెళ్లిళ్లకు అనుమతులు రద్దు చేస్తూ తీసుకున్న నిర్ణయంతో భక్తులు అవాక్కయ్యారు. ఈ నిర్ణయం సరికాదని.. వెంటనే వెనక్కు తీసుకోవాలంటున్నారు. ఇది వాస్తవమేనని.. ఉన్నతాధికారుల దృష్టికి తీసుకెళతామన్నారు ఆలయ తనిఖీ అధికారి నవీన్‌కుమార్‌.

ఒంటిమిట్ట కోదండ రామాలయంలో వివాహాలు చేసుకునేందుకు అమ్మాయి, అబ్బాయి, తల్లిదండ్రుల ఆధార్‌ కార్డులు, శుభలేఖ అందించాల్సి ఉంటుంది. ఈ మేరకు ఆలయంలో వివాహ కట్టడి రుసుం రూ.500 చెల్లించాల్సి ఉంటుంది. గత పదేళ్లుగా ఈ విధానాన్ని అమలు చేస్తున్నారు. రామాలయంలో పనిచేస్తున్న భజంత్రీల సిబ్బంది, అర్చకుల ద్వారా వివాహాన్ని నిర్వహిస్తారు.. వారికి నగదు ఇవ్వాలి. ఆలయంలో వేదిక, పందిళ్లు, షామియనాలు, విద్యుద్దీకరణ, వివాహ వేడుక నిర్వహణకు బల్లలు, అతిథులు కూర్చోవడానికి కుర్చీలు కూడా ఉండవు. టిఫిన్, టీ, భోజనం వసతి ఉండదు.. రామలింగేశ్వరస్వామి ముందు, సీతారాముల ఎదుర్కోలు మండపాల చెంత చలువరాళ్లపై సాధారణంగా వివాహాలు నిర్వహిస్తారు. పదేళ్లుగా ఈ సంప్రదాయం కొనసాగుతున్నా ఎవరి నుంచి ఇప్పటి వరకు అభ్యంతరాలు రాలేదు.

రామాలయం వేళల్లో ఉదయం 5 నుంచి సాయంత్రం 8.45 గంటల వరకు లగ్నం చూసుకుని వివాహాలు చేసుకునేవారు. ఈ పెళ్లి తతంగం 30 నుంచి 40 నిమిషాల్లో పూర్తి చేసేవారు. అక్కడ భక్తులకు ఇబ్బంది లేకుండా జాగ్రత్తలు తీసుకునేవారు. అయితే ఇప్పుడు ఉన్నట్టుండి పురావస్తుశాఖ అధికారులు ఇకపై వివాహాలు చేసుకోవడానికి అనుమతి ఇవ్వరాదని టీటీడీ అధికారులకు ఫోన్‌లో మౌఖిక ఆదేశాలిచ్చారు. ఈ నిర్ణయం సరికాదంటున్నారు భక్తులు.. కార్తిక మాసంలో మంచి ముహూర్తాలు ఉన్నాయని గుర్తు చేస్తున్నారు. ఇక్కడ రామాలయంలో పెళ్లి చేసుకునేందుకు వస్తున్నవారికి తాత్కాలికంగా అనుమతి ఇవ్వడం లేదు. గత కొన్నేళ్లుగా ఎలాంటి ఆంక్షలు లేవని.. ఇప్పుడెందుకు ఆక్షేపిస్తున్నారని చర్చ జరుగుతోంది. పెళ్లిలు చేసుకుకోకుండా ఆంక్షలు విధించడం విచిత్రంగా ఉందంటున్నారు.