ఏపీలో మద్యం షాపుల నడుపుతున్నవారికి షాక్.. లైసెన్సులు రద్దు, చంద్రబాబు సంచలన వ్యాఖ్యలు

ఏపీలో మద్యం షాపులపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు కీలక వ్యాఖ్యలు చేశారు. రాష్ట్రవ్యాప్తంగా మద్యం ఎమ్మార్పీపై కంటే ఒక్క రూపాయి ఎక్కువ ధరకు అమ్మినా వదిలేది లేదని హెచ్చరించారు. అమరావతిలోని సచివాలయంలో గనులు, ఎక్సైజ్‌ శాఖ అధికారులతో చంద్రబాబు సమీక్ష చేశారు.. ఇసుక లభ్యత, సరఫరా, మద్యం ధరలపై చర్చించారు. ఎమ్మార్పీ ఉల్లంఘించే, బెల్ట్‌ షాపులకు మద్యం విక్రయించే షాపులకు మొదటి తప్పు కింద రూ.5 లక్షల జరిమానా విధించాలని సూచించారు. ఒకవేళ ఆ తర్వాత కూడా మళ్లీ అవే తప్పులు చేస్తూ నిబంధనల్ని ఉల్లంఘిస్తే మద్యం షాపు లైసెన్సు రద్దు చేయాలని సీరియస్ కామెంట్స్ చేశారు.

రాష్ట్రంలో ఎట్టి పరిస్థితుల్లోనూ బెల్ట్‌ షాపుల్ని అనుమతించొద్దని అధికారుల్ని ఆదేశించారు. మద్యం షాపుల యజమానులు బెల్ట్‌ షాపుల్ని ప్రోత్సహించినా.. ఇతర ప్రాంతాల నుంచి మద్యం తెచ్చినా కఠిన చర్యలు తీసుకోవాలని సూచించారు. ప్రతి మద్యం షాపు దగ్గర సీసీ కెమెరాలు, ధరల వివరాల్ని తెలియజేస్తూ బోర్డులు కచ్చితంగా ఉండాలని తేల్చి చెప్పారు. అంతేకాదు మద్యం అమ్మకాలు, ఇతర అంశాలపై ఫిర్యాదుల కోసం టోల్‌ఫ్రీ నంబర్‌ కూడా ఏర్పాటు చేయాలని సూచించారు. అలాగే ఎక్సైజ్ అధికారులు ఆకస్మిక తనిఖీలతో అక్రమాలకు కళ్లెం వేయాలన్నారు.

మరోవైపు రాష్ట్రంలో ఇసుక విషయంలో తప్పులు జరిగితే అధికారులపై ముందుగా చర్యలు తీసుకుంటామని హెచ్చరించారు ముఖ్మమంత్రి. ఇసుక విషయంలో ఉల్లంఘనలకు వారే బాధ్యత వహించాలని తేల్చిచెప్పారు. ఇసుక లభ్యత పెంచాలని.. రీచ్‌ల దగ్గరకు సులభంగా వెళ్లేందుకు ఏర్పాట్లు చేయాలని సూచించారు. అలాగే పొరుగు రాష్ట్రాలకు ఒక్క లారీ ఇసుక కూడా వెళ్లడానికి వీల్లేదని తేల్చి చెప్పారు.. ఇసుక, మద్యం విధానాల్లో ప్రభుత్వం స్పష్టమైన విధానంతో ఉంది అన్నారు. ఇది క్షేత్రస్థాయి వరకు సక్రమంగా అమలయ్యేలా చూడాలని.. ప్రజల జేబుల్ని గుల్ల చేసేలా ఎవరు వ్యవహరించినా ఉపేక్షించొద్దన్నారు. వీటన్నటికి పర్యవేక్షణకు త్వరలో సెంట్రల్‌ మానిటరింగ్‌ సిస్టం ఏర్పాటు చేస్తామన్నారు ముఖ్యమంత్రి చంద్రబాబు.

మరోవైపు ఉమ్మడి కృష్ణా జిల్లాలో అక్రమ ఇసుక రవాణాపై ప్రభుత్వం సీరియస్‌గా స్పందించింది. ప్రధానంగా పలు రేవుల నుంచి ఇసుకను యంత్రాలతో తవ్వి, అక్రమంగా హైదరాబాద్‌ తరలించడంపై విచారణకు ఆదేశించింది. ఈ వ్యవహారంపై ముఖ్యమంత్రి చంద్రబాబు ఆ జిల్లా నేతలపై ఆగ్రహం వ్యక్తం చేశారు. స్థానిక ప్రజాప్రతినిధులతో అవగాహన కుదుర్చుకొని వైఎస్సార్‌సీపీ మాజీ నేత ఇసుక తవ్వకాలు చేయడంపై స్పందించారు. వెంటనే విచారణకు ఆదేశించారు.. నందిగామలో తవ్వకాలు జరిపిన ప్రాంతాలను అధికారులు పరిశీలించారు. అయితే అప్పటికే అక్కడి నుంచి యంత్రాలను తరలించేశారు. ఇసుక తవ్వకాలపై మంత్రి కొలుసు పార్థసారథి ఆగ్రహం వ్యక్తం చేశారు.. ఈ వ్యవహారంతో తన పేరును వాడుతున్నట్లు తన దృష్టికి వచ్చిందన్నారు. ఇసుక విషయంలో తాను ఎవరికీ సిఫార్సు చేయలేదని చెప్పారు.