ఏపీలో ప్రభుత్వ టీచర్లకు గుడ్‌న్యూస్.. ఇకపై ఆ బాధ ఉండదు, ఆదేశాలు వచ్చేశాయి

ఆంధ్రప్రదేశ్‌‌ ప్రభుత్వం టీచర్లకు శుభవార్త చెప్పింది. మరుగుదొడ్ల ఫొటోలు తీసి, అప్‌లోడ్‌ చేసే విధానాన్ని తాత్కాలికంగా నిలిపివేస్తూ విద్యాశాఖ నిర్ణయం తీసుకుంది. గత వైఎస్సార్‌సీపీ ప్రభుత్వ హయాంలో స్కూళ్లలో బాత్రూమ్‌ల ఫొటోలు తీసే బాధ్యతను ఉపాధ్యాయులకు అప్పగించారు. అంతకముందు ఆ పనిని ప్రధానోపాధ్యాయులు చేయాలని చెప్పినా.. యాప్‌ల భారం పెరిగిందంటూ రోజుకో ఉపాధ్యాయుడు చొప్పున ఫొటోలు తీసి, యాప్‌లో అప్‌లోడ్‌ చేసేవాళ్లు. ఈ నిర్ణయంపై ఉపాధ్యాయుల నుంచి వ్యతిరేకత వ్యక్తమైంది.

ఏపీలో అధికారంలోకి వచ్చిన కూటమి ప్రభుత్వం ఇప్పుడు ఐఎంఎంఎస్‌ యాప్‌లో బాత్రూమ్‌లో ఫొటోలు తీసే ఆప్షన్‌ను తాత్కాలికంగా నిలిపివేయాలని నిర్ణయం తీసుకుంది. ఆ బాధ్యతను ఇతర విభాగాలకు అప్పగించాలని ఆలోచన చేస్తోంది.. ఇలా మరుగుదొడ్ల ఫొటోలు తీయడం నిలిపివేయడంపై ఏపీ ఉపాధ్యాయ సంఘాల నేతలు హర్షం వ్యక్తం చేశారు. కూటమి ప్రభుత్వానికి ధన్యవాదాలు తెలిపారు.. తమకు పెద్ద బాధ తప్పిందని ఆనందం వ్యక్తం చేస్తున్నారు.

మరోవైపు సోమవారం జరిగిన కలెక్టర్ల సమావేశంలో విద్యాశాఖపైనా చర్చ జరిగింది. రాష్ట్రంలో మెరుగైన విద్యను అందించేందుకు అడుగులు వేయాలన్నారు ముఖ్యమంత్రి చంద్రబాబు. స్కూళ్లలో ఎక్కడా ఉపాధ్యాయుల కొరత లేకుండా చూడాలని.. ఒకవేళ అవసరమైతే విద్యా వాలంటీర్లను నియమించుకోవాలని అధికారుల్ని ఆదేశించారు. టీచర్ల కొరత కారణంగా విద్యా విధానంలో నాణ్యత తగ్గకూడదన్నారు. రాష్ట్రవ్యాప్తంగా ఎన్ని పోస్టులు ఖాళీ ఉన్నాయో అన్నింటికీ వాలంటీర్లను తీసుకోవాలని సూచించారు. రాష్ట్రంలోని ప్రతి విద్యార్థి ఎక్కడో చోట స్కూల్లో ఉండాలని.. విద్యార్థులకు శాశ్వత అకడమిక్‌ నంబరు(ఏపీఏఏఆర్‌) ఉండేలా చూడాలన్నారు.

స్కూళ్లలో పిల్లలు ఒత్తిడి లేకుండా ఆనందంగా చదువుకునే పరిస్థితి రావాలని అభిప్రాయపడ్డారు చంద్రబాబు. పాఠశాలల్లో విజ్ఞాన, విహార యాత్రలు, క్రీడలు నిర్వహించాలని.. ముందు అందరూ బడులకు వస్తుంటే.. ఆ తర్వాత ప్రభుత్వ స్కూళ్లకు తీసుకురావడంపై ఆలోచించొచ్చన్నారు. స్కూల్ విద్యార్థుల యూనిఫామ్‌కు సంబంధించి కాంట్రాక్టర్ సరఫరా చేయలేకపోతే ఆ పరిమాణాన్ని మిగతా కాంట్రాక్టర్‌లకు సమానంగా పంచి.. ఆలస్యం కాకుండా చూడాలని చంద్రబాబు సూచించారు. అంతేకాదు రాష్ట్రంలో 20లక్షల ఉద్యోగాలు ఇస్తామని చెప్పిన విషయాన్ని ముఖ్యమంత్రి చంద్రబాబు గుర్తు చేశారు. ప్రస్తుతం వర్చువల్‌ ఉద్యోగాలకు డిమాండ్‌ పెరిగిందని.. ప్రైవేటు వ్యక్తుల నిర్వహణలో వర్క్‌స్టేషన్లు ఏర్పాటు చేయాల్సిన అవసరం ఉందన్నారు.

రాష్ట్రవ్యాప్తంగా ప్రతి మూడు నెలలకోసారి తల్లిదండ్రులు, ఉపాధ్యాయుల సమావేశాన్ని నిర్వహించాలని విద్యా శాఖ మంత్రి నారా లోకేష్ అధికారులకు సూచించారు. రెసిడెన్షియల్, కేజీబీవీ, ఆదర్శ పాఠశాలల విద్యార్థులను సీబీఎస్‌ఈ పదోతరగతి పరీక్షలకు సన్నద్ధం చేయాలని.. తొలిసారి సీబీఎస్‌ఈ పరీక్షలు కాబట్టి విద్యార్థుల్ని జాగ్రత్తగా పరీక్షల కోసం సన్నద్ధం చేయాలని సూచించారు. అంతేకాదు ప్రతి నియోజకవర్గంలో ఒక చోట ఉద్యోగ మేళాలు ఏర్పాటు చేస్తామని.. విద్యార్థుల వివరాలను ఆధార్‌తో లింకు చేసి, ప్రత్యేక నంబరు ఇచ్చేలా కసరత్తు చేస్తున్నారు.