తిరుమల శ్రీవారి భక్తులకు తీపికబురు.. వాట్సాప్ ద్వారా దర్శనం టికెట్లు, పూర్తి వివరాలివే

తిరుమల వెళ్లే భక్తులకు టీటీడీ మరో శుభవార్త చెప్పింది. శ్రీవారి దర్శనం టికెట్లు బుక్ చేసుకునేందుకు సులభమైన విధానాన్ని తీసుకురావాలని నిర్ణయానికి వచ్చారు. ఆ దిశగా టీటీడీ అడుగులు వేస్తోంది.. శ్రీవారి బ్రహ్మోత్సవాలు ముగియగానే పాలకమండలిని నియమించే ఆలోచనలో ఉంది. ఆ తర్వాత.. వచ్చే మూడు నెలల్లో వాట్సాప్ ద్వారా తేలిగ్గా దర్శనం బుక్ చేసుకునే విధానాన్ని తీసుకురాబోతున్నట్లు సమాచారం. ముందుగా తిరుమల శ్రీవారి ఆలయం నుంచి వాట్సాప్ ద్వారా దర్శనం బుకింగ్ సేవలు ప్రారంభించి.. ఆ తర్వాత మెల్లిగా అన్ని దేవాలయాల్లోనూ అందుబాటులోకి తీసుకురావాలని ఆలోచన చేస్తోంది.

తిరుమలలో దర్శనంతో పాటు ఇతర సేవలకు ఉన్న ధరలను ప్రక్షాళన చేసే ఆలోచనలో ఉన్నారు. వీలైనంత తక్కువ ఖర్చుతో ఎక్కువ సౌకర్యాలు, సదుపాయాలు కల్పించాలని ముఖ్యమంత్రి చంద్రబాబు ఆలోచన చేస్తున్నట్లు తెలుస్తోంది. అందుకే స్వామివారి దర్శనాలు, సేవల నుంచి.. ఆ తర్వాత దర్శనానికి వచ్చే భక్తులకు కల్పించే ఇతర సౌకర్యాలు, సదుపాయలకు సంబంధించి ప్రస్తుతం అందుబాటులో ఉన్న ధరలను సమీక్షించి అవసరమైన మార్పులు, చేర్పులు చేయాలని భావిస్తున్నారు. ఇకపై రాష్ట్రంలోని అన్ని ప్రసిద్ధ దేవాలయాల్లో ఎలాంటి సిఫార్సులతో పనిలేకుండా నేరుగా దైవ దర్శనం చేసుకునే సదుపాయాన్ని అందుబాటులోకి తేవాలనే ఆలోచన చేస్తున్నారు.

తిరుమల శ్రీవారి దర్శనం కోసం నిత్యం వేలాదిమంది భక్తులు తరలివస్తుంటారు. అలాగే దర్శనం టికెట్ల కోసం ఎంతోమంది భక్తులు ప్రయత్నిస్తుంటారు.. అందుకే సులభంగా ఉండేందుకు వాట్సాప్ సౌకర్యం తీసుకురాబోతున్నారు. వాట్సాప్ సేవల్ని ఇక దైవ దర్శనాలు సులభతరం చేసేందుకూ అనుసంధానం చేయబోతున్నారు. మారుతున్న టెక్నాలజీకి అనుగుణంగా.. ఈ విధానాలు కూడా మార్చాలని చంద్రబాబు భావిస్తున్నారట. అలాగే తిరుమల దర్శనాల కోసం సీఎం పేషీ, మంత్రులు, ఎమ్మెల్యేలు, ఎంపీలు ఇలా ప్రజా ప్రతినిధుల సిఫార్సు లేఖల కోసం ఒత్తిడి కూడా పెరుగుతోంది. అందుకే సిఫార్సులతో పనిలేకుండా సామాన్యులు సులభంగా తిరుమల శ్రీవారిని దర్శించుకునేలా ప్రభుత్వం ముందస్తు బుకింగ్ విధానాన్ని తీసుకురావాని ఆలోచన చేస్తున్నారట.