ఏపీలో పింఛన్‌ తీసుకునేవారికి శుభవార్త.. డిసెంబర్ నుంచి పక్కా, రూ.12వేలు తీసుకోవచ్చు

ఆంధ్రప్రదేశ్ ముఖ్యమంత్రి నారా చంద్రబాబు నాయుడు మరో హామీని నిలబెట్టుకుంటున్నారు. ఈ మేరకు పింఛన్‌కు సంబంధించిన హామీని నెరవేర్చేందుకు కూటమి ప్రభుత్వం ముందడుగు వేసింది. ఇకపై ఏ నెలలోనైనా పింఛను తీసుకోకపోతే ఆ మరుసటి నెల మొత్తం కలిపి తీసుకునే వెసులుబాటు కల్పించనుంది ప్రభుత్వం. వరుసగా రెండు నెలలు తీసుకోలేకపోతే.. ఆ తర్వాత నెలలో మూడు నెలలకు కలిపి మొత్తం (రూ.12వేలు) అందిస్తారు. ఈ హామీ అమలుకు స్వయంగా ముఖ్యమంత్రి చంద్రబాబు అధికారులకు ఆదేశాలు జారీచేశారు.

రెండు రోజుల క్రితం శ్రీకాకుళం జిల్లాలో ముఖ్యమంత్రి చంద్రబాబు ఆదేశాలతో.. డిసెంబరు నుంచే పాత (2014-2019 మధ్యలో) విధానాన్ని పునరుద్ధరించేందుకు అధికారులు చర్యలు తీసుకుంటున్నారు. నవంబర్‌లో పింఛన్ అందుకోలేనివారు డిసెంబరు 1న రెండు నెలలది కలిపి డబ్బులు ఇస్తారు. ఈ మేరకు ఫైల్ సిద్ధం చేసి ప్రభుత్వానికి నివేదిస్తారు.. నవంబరులో దాదాపు 45 వేల మంది వివిధ కారణాలతో పింఛను తీసుకోలేదని అధికారులు గుర్తించారు. వీరికి వచ్చే నెల (డిసెంబర్ 1న)అందజేయనున్నారు.

2014-19 మధ్య టీడీపీ ప్రభుత్వ హయాంలోనూ ఈ విధానం (మూడు నెలలకు ఒకసారి పింఛన్) అమలైంది. గత ప్రభుత్వం అధికారంలోకి వచ్చాక జగన్‌ దీన్ని రద్దుచేసి ఏ నెలకు ఆ నెలే పింఛను తీసుకోవాలనే నిబంధన తీసుకొచ్చారు. దీంతో పింఛన్‌లు తీసుకునేవారు ఇబ్బందిపడ్డారు.. దీంతో కూటమి ప్రభుత్వం మూడు నెలలకు ఒకసారి పింఛన్‌ తీసుకునే వెసులుబాటు కల్పించింది. ముఖ్యమంత్రి చంద్రబాబు తీసుకున్న నిర్ణయంతో వేలమంది పింఛనుదారులకు లబ్ధి చేకూరనుంది. ఈ నిర్ణయాన్ని వారు స్వాగతిస్తున్నారు.

రాష్ట్రవ్యాప్తంగా ఎన్టీఆర్‌ భరోసా కింద ప్రభుత్వం 64.14 లక్షల మందికి పింఛన్లు అందిస్తోంది. ప్రతి నెలా పింఛను ఇచ్చే సమయానికి కొందరు ఆస్పత్రిలో, వృద్ధులైతే వేరే ఊళ్లో పిల్లల దగ్గర ఉండొచ్చనే అభిప్రాయాలు ఉన్నాయి. మరికొందరు ఏదైనా శుభకార్యాలకు, ఇతర పనులమీద వేరే ప్రాంతానికి వెళ్లొచ్చు. ఉపాధి, పనుల కోసం దూరప్రాంతాలకు వెళ్లే ఒంటరి మహిళలు, వితంతువులు, దివ్యాంగులు కూడా ఉన్నారు. ఇలా వివిధ కారణాలతో పింఛన్ తీసుకోవడానికి ఇబ్బందిపడుతున్నారు. గత నెల ఏ నెలకు, ఆ నెలకు వెళ్లి తీసుకువాల్సిన పరిస్థితి. ఈ ఇబ్బందులను గుర్తించే కూటమి పాత విధానాన్ని అమలు చేస్తామని ప్రకటించింది.. ఆ హామీని నిలబెట్టుకోబోతోంది. గత ప్రభుత్వ హయాంలో ఏదైనా కారణంతో ఒక నెల పింఛను తీసుకోకపోతే వారికి ఆ నెల మొత్తం కోత పడేది. ఆ మరుసటి నెల ఆ పింఛను ఇవ్వలేదు.. ఒకవేళ రెండు నెలలు తీసుకోలేకపోతే ఆ మొత్తాన్నీ ఇవ్వకుండా మూడోనెల పింఛను (ఒక నెల) మాత్రమే ఇచ్చేవారు. ఇప్పుడు మూడు నెలలకు ఒకసారి పింఛన్ తీసుకునే వెసులుబాటు కల్పిస్తోంది.