అన్న క్యాంటీన్లకు ఆ రోజు సెలవు.. వడ్డించే ఐటెమ్స్ ఇవే.. ఆహార పరిమాణం ఎంతంటే?

ఏపీలో అన్న క్యాంటీన్లు మళ్లీ తెరుచుకున్నాయి. పేదల కడుపు నింపాలనే ఆలోచనతో గతంలో టీడీపీ ప్రభుత్వం ఈ అన్న క్యాంటీన్లకు శ్రీకారం చుట్టింది. అయితే వైసీపీ ప్రభుత్వ హయాంలో అన్న క్యాంటీన్లు మూతపడగా.. మరోసారి అధికారంలోకి వచ్చిన చంద్రబాబు తిరిగి అన్న క్యాంటీన్లు తీసుకువచ్చారు. గురవారం పంద్రాగస్టు సందర్భంగా గుడివాడలో అన్న క్యాంటీన్‌ను చంద్రబాబు ప్రారంభించారు. సతీమణి నారా భువనేశ్వరితో కలిసి చంద్రబాబు అన్న క్యాంటీన్ ప్రారంభించారు. ఆగస్ట్ 16న రాష్ట్రవ్యాప్తంగా 17 జిల్లాలలో ఉన్న మిగతా 99 అన్న క్యాంటీన్లను మంత్రులు, ఎమ్మెల్యేలు, ఇతర ప్రజాప్రతినిధులు ప్రారంభిస్తారు. అయితే ఈ అన్న క్యాంటీన్లలో అందించే ఆహారం, టైమింగ్స్, ఎప్పుడు క్లోజ్ చేస్తారనే వివరాలు ఇక్కడ తెలియజేస్తున్నాం.

అన్న క్యాంటీన్లలో కేవలం ఐదు రూపాయలకే టిఫిన్ అందిస్తారు. అలాగే మధ్యాహ్న భోజనం, రాత్రి భోజనం కూడా ఐదు రూపాయల చొప్పున అందిస్తారు. వారంలో ఆదివారం మినహా మిగతా ఆరు రోజులు అన్న క్యాంటీన్లు అందుబాటులో ఉంటాయి. ఉదయం 7.30 గంటల నుంచి 10 గంటల వరకు అన్న క్యాంటీన్లలో బ్రేక్ ఫాస్ట్ అందుబాటులో ఉంటుంది. అలాగే మధ్యాహ్నం 12.30 గంటల నుంచి 3 గంటల వరకు భోజనం..రాత్రి 7.30 గంటల నుంచి 9 గంటల వరకు డిన్నర్ ఉండేలా ఏర్పాట్లు చేశారు. అన్న క్యాంటీన్ల ద్వారా ఒక్కో పూట 35 వేల మంది చొప్పున రోజుకు మూడు పూటలా కలిపి రోజూ 1.05 లక్షల మందికి ఆహారం అందించనున్నారు.

సోమవారం నుంచి శనివారం వరకూ రోజు ఉదయం టిఫిన్ కింద ఇడ్లీ – చట్నీ లేదా పొడి, సాంబార్ అందిస్తారు. సోమ, గురువారాల్లో ఇడ్లీతో పాటుగా పూరీ కుర్మా అందుబాటులో ఉంటాయి. మంగళ, శుక్రవారాల్లో ఉప్మా-చట్నీ, బుధ, శనివారాల్లో పొంగల్- చట్నీ టిఫిన్‌గా ఐదు రూపాయలకే అందిస్తారు. ఇడ్లీలు లేదా పూరీలు మూడు, పొంగల్ అయితే 250 గ్రాములు, చట్నీ 15 గ్రాములు రూ.5 చొప్పున అందివ్వాలని అధికారులు నిర్ణయించారు. ఇక సోమవారం నుంచి శనివారం వరకూ రోజూ మధ్యాహ్నం అన్నం, పప్పు, కూర, సాంబారు, పచ్చడి, పెరుగు అందిస్తారు. రాత్రికూడా ఇదే మెనూ ఫాలో కానున్నారు. ఇక అన్నం 400 గ్రాములు, పప్పు 120 గ్రాములు, సాంబార్‌ 150 గ్రాములు, మిక్చర్‌ 25 గ్రాములు, కూర 100 గ్రాములు, పచ్చడి 15 గ్రాములు, పెరుగు 75 గ్రాములుగా ఉండనున్నాయి.