సీఎం అధికారిక నివాసాన్ని ఖాళీ చేసిన కేజ్రీవాల్.. ఆప్ ఎంపీ ఇంట్లో మకాం

Arvind Kejriwal: ఢిల్లీ మాజీ సీఎం, ఆమ్‌ ఆద్మీ పార్టీ నేషనల్ కన్వీనర్ అరవింద్‌ కేజ్రీవాల్‌.. ముఖ్యమంత్రి అధికారిక నివాసం నుంచి ఖాళీ చేశారు. ఢిల్లీ లిక్కర్ పాలసీ కేసులో అరెస్ట్ అయి కొన్ని నెలల పాటు తీహార్ జైలులో ఉన్న అరవింద్ కేజ్రీవాల్.. కొన్ని రోజుల క్రితమే బెయిల్‌పై బయటికి వచ్చారు. ఈ క్రమంలోనే తాను ప్రజాకోర్టులో గెలిచి.. మళ్లీ సీఎం పదవిలో కూర్చుంటానని.. అప్పటివరకు రాజీనామా చేస్తున్నట్లు ప్రకటించారు. ఈ నేపథ్యంలోనే ఢిల్లీకి కొత్త ముఖ్యమంత్రిగా ఆతిశీ ఇటీవలె ఎన్నిక కాగా.. అనంతరం ప్రమాణ స్వీకారం చేసి బాధ్యతలు చేపట్టారు. ఈ క్రమంలోనే ఢిల్లీ సీఎం అధికారిక నివాసంలో ఇప్పటివరకు ఉన్న అరవింద్ కేజ్రీవాల్.. నిబంధనల ప్రకారం ఆ ఇంటిని ఖాళీ చేయాల్సి ఉండగా.. తాజాగా బయటికి వచ్చేశారు.

ఢిల్లీలోని సివిల్‌ లైన్స్ ప్రాంతంలో 6 ఫ్లాగ్‌స్టాఫ్ రోడ్‌లోని ముఖ్యమంత్రి అధికారిక నివాసం నుంచి శుక్రవారం ఉదయం అరవింద్ కేజ్రీవాల్ తన కుటుంబ సభ్యులతో కలిసి బయటకు వచ్చారు. అరవింద్ కేజ్రీవాల్ తన తల్లిదండ్రులు, భార్య, ఇద్దరు పిల్లలతో కలిసి కారులో ఆ ఇంటి నుంచి ఖాళీ చేశారు. పంజాబ్‌కు చెందిన ఆమ్ ఆద్మీ పార్టీ రాజ్యసభ ఎంపీ అశోక్ మిత్తల్‌కు కేటాయించిన అధికారిక భవనంలో అరవింద్ కేజ్రీవాల్ కుటుంబం నివసించనుంది. ఆమ్ ఆద్మీ పార్టీ కేంద్ర కార్యాలయానికి సమీపంలో ఫిరోజ్ షా రోడ్డులో ఉన్న బంగ్లాలో కేజ్రీవాల్ ఫ్యామిలీ ఉండనుంది.

2013లో తొలిసారి ఢిల్లీ ముఖ్యమంత్రిగా బాధ్యతలు చేపట్టినప్పుడు అరవింద్ కేజ్రీవాల్ తన కుటుంబ సభ్యులతో కలిసి తిలక్‌ లేన్‌లో ఉండేవారు. ఆ తర్వాత 2015లో మరోసారి అసెంబ్లీ ఎన్నికల్లో గెలిచి సీఎం అయిన తర్వాత ఫ్లాగ్‌స్టాఫ్‌ రోడ్డులోని ప్రస్తుతం ఖాళీ చేసిన ఇంటికి మారారు. అయితే గత 9 ఏళ్లుగా ఉంటున్న ఇంటి నుంచి కేజ్రీవాల్ కుటుంబం ప్రస్తుతం ఖాళీ చేసింది.

ముఖ్యమంత్రిగా కేజ్రీవాల్ రాజీనామా తర్వాత ఏ ఇంట్లో ఉండాలి అని ఆయన బాగా వెతికారు. ఈ క్రమంలోనే ఆప్‌కు చెందిన పలువురు ఎంపీలు, ఎమ్మెల్యేలు, కౌన్సిలర్లు తమ ఇళ్లలో ఉండాల్సిందిగా కేజ్రీవాల్‌ను కోరారు. అయితే చివరికి రాజ్యసభ ఎంపీ అశోక్‌ మిత్తల్ నివాసంలో ఉండాలని నిర్ణయించుకున్నారు. ఫిరోజ్‌షా రోడ్డులోని బంగ్లా నంబర్‌ 5ను.. రాజ్యసభ కార్యాలయం ఎంపీ అశోక్‌ మిట్టల్‌కు అధికారికంగా కేటాయించింది. ఇక వచ్చే ఏడాది ఫిబ్రవరిలో ఢిల్లీ అసెంబ్లీ ఎన్నికలు జరగనుండగా.. ప్రస్తుత సీఎం ఆతిశీ కొన్ని రోజులేే ముఖ్యమంత్రిగా కొనసాగనున్నారు.