సీఎం రేవంత్ రెడ్డి, కొండా సురేఖపై పరువు నష్టం దావా.. కేటీఆర్ సంచలన నిర్ణయం

KTR on Revanth Reddy: తెలంగాణ రాజకీయాలు రసవత్తవరంగా మారాయి. హైడ్రా కూల్చివేతలతో పాటు ఇటీవల మంత్రి కొండా సురేఖ చేసిన ఆరోపణలతో ఒక్కసారిగా రాజకీయాలు వేడెక్కాయి. అయితే.. ఈ గొడలన్నింటి మధ్య రైతుల రుణమాఫీ అంశం మరుగున పడిపోతుండటంతో.. ప్రతిపక్షమైన బీఆర్ఎస్ నిరసన దీక్షలు చేపడుతోంది. ఇటు మూసీ, హైడ్రా బాధితులకు అండగా ఉండటంతో పాటుగానే.. అటు రుణమాఫీపై రాష్ట్రవ్యాప్తంగా ధర్నాలు చేస్తోంది. ఇందులో భాగంగానే.. ఈరోజు (అక్టోబర్ 05న) రంగారెడ్డి జిల్లా కందుకూరులో బీఆర్ఎస్ పార్టీ ఆధ్వర్యంలో భారీ రైతు ధర్నా నిర్వహించారు. ఈ ధర్నా కార్యక్రమంలో బీఆర్ఎస్ వర్కింగ్ ప్రెసిడెంట్ కేటీఆర్ పాల్గొని.. కీలక వ్యాఖ్యలు చేశారు.

అధికారం వచ్చిన వెంటనే.. మొదటి సంతకం రైతు రుణమాఫీ ఫైలు మీద పెడతానంటూ ఊదరగొట్టి.. తీరా అధికారంలోకి వచ్చాక ఇప్పుడిస్తాం అప్పుడిస్తామంటూ సీఎం రేవంత్ రెడ్డి ఆలస్యం చేశారని కేటీఆర్ మండిపడ్డారు. ఆలస్యమైన పూర్తిగా చేశారా అంటే అదీ లేదని..10 నెలలు గడిచినా ఇప్పటికీ పూర్తిగా చేయలేదని ఆరోపించారు. అవే కాకుండా.. రైతు బోనస్ పేరుతో రూ.500 ఇస్తామని చెప్పారని… రైతు భరోసా పేరిట ఏటా రూ.15 వేలు ఇస్తామని మాట ఇచ్చారని కేటీఆర్ గుర్తు చేశారు. ఇప్పుడు ఆ రైతు బంధు లేదూ.. రైతు భరోసా లేకుండా చేశారని మండిపడ్డారు.

రుణమాఫీ చేసేందుకు డబ్బులు లేవని చెప్తున్న సీఎం రేవంత్ రెడ్డి.. లక్షన్నర కోట్లతో మూసీని ప్రక్షాళన చేసేందుకు సిద్ధమయ్యారని మండిపడ్డారు. ఎన్నికల వేళ ప్రకటించిన ఆరు గ్యారెంటీలను అమలు చేస్తే అందులో కమీషన్లు రావని.. మూసీ ప్రాజెక్టు అయితే కోట్లకు కోట్లు దోచుకోవచ్చని.. ఇది మొదలుపెడుతున్నారని ఆరోపించారు. ఉన్న సిటీని పట్టించుకోకుండా ఇప్పుడు కొత్తగా.. ఫ్యూచర్ సిటీ కడతానని సీఎం రేవంత్ రెడ్డి చెప్తున్నారని కేటీఆర్ ఎద్దేవా చేశారు.

మరోవైపు.. మూసీలోని కంపు అంతా సీఎం రేవంత్ రెడ్డి నోట్లోనే ఉందని కేటీఆర్ ఘాటు వ్యఖ్యలు చేశారు. తన మీద అడ్డగోలుగా మాట్లాడిన మంత్రి కొండా సురేఖను వదిలిపెట్టనని కేటీఆర్ చెప్పుకొచ్చారు. క్రిమినల్ కేసుతో పాటు పరువునష్టం దావా కూడా వేస్తానని తెలిపారు. ఇక.. సీఎం రేవంత్ రెడ్డి మీద కూడా పరువు నష్టం దావా వేస్తానని కేటీఆర్ చెప్పుకొచ్చారు. గతంలో ప్రతిపక్షంలో ఉన్నారని ఏది మాట్లాడినా వదిలేశామని.. ఇప్పుడు మాత్రం వదిలేది లేదన్నారు. తప్పు చేయని వారి గురించి పిచ్చి పిచ్చి మాటలు మాట్లాడతామంటే అస్సలు ఊరుకునేది లేదన్నారు. ప్రధాని నరేంద్ర మోదీనే ఏం చేసుకుంటావో చేసుకో అన్మామని.. ఈ చిట్టి నాయుడు ఎంత అంటూ తీవ్ర వ్యాఖ్యలు చేశారు.

మరోవైపు.. సబితా ఇంద్రారెడ్డి ఫాంహౌస్‌లు ఎక్కడ ఉన్నాయో చెప్తే.. తామే కూలగొడుతామని కేటీఆర్ అడిగారు. బీఆర్ఎస్ నేతల ఇళ్లు కూలగొడితేనే రేవంత్ రెడ్డి కడుపు మంట చల్లారుతుందంటే చెప్పాలని.. వాటిని తామే కూల్చుకుంటామని.. కానీ పేదల ఇళ్లను వదిలిపెట్టాలని విజ్ఞప్తి చేశారు. మూసీ బాధితుల గోస చూస్తుంటే బాధ అనిపిస్తోందని కేటీఆర్ ఆవేదన వ్యక్తం చేశారు.