విమానాశ్రయాల్లో సరికొత్త విధానం.. ఇకపై సెకెన్లలోనే ఇమ్మిగ్రేషన్ పూర్తి!

విమానాశ్రయాల్లో మరింత వేగంగా ఇమ్మిగ్రేషన్ ప్రక్రియను పూర్తిచేసేలా కేంద్ర ప్రభుత్వం సరికొత్త విధానాన్ని అమల్లోకి తీసుకొస్తోంది. న్యూఢిల్లీలోని ఇందిరా గాంధీ అంతర్జాతీయ విమానాశ్రయంలో ఇటీవల ప్రయోగాత్మకం చేపట్టిన ఫాస్ట్-ట్రాక్ ఇమ్మిగ్రేషన్ ప్రోగ్రామ్‌ను దేశవ్యాప్తంగా అన్ని ప్రధాన నగరాల్లోనూ అమలుచేయనున్నట్టు కేంద్రం ప్రకటించింది. దేశంలోని ప్రధాన 20 ఎయిర్‌పోర్టులకు దీనిని విస్తరిస్తున్నట్టు పేర్కొంది. ఈ విధానం వల్ల ఇమ్మిగ్రేషన్ ప్రక్రియ సెకెన్ల నుంచి గరిష్టంగా 30 నిమిషాల్లోనే పూర్తవుతుందని తెలిపింది. ఢిల్లీ ఎయిర్‌పోర్ట్‌లో జూన్ 22న ఫాస్ట్-ట్రాక్ ఇమ్మిగ్రేషన్ ట్రస్టెడ్ ట్రావెలర్ ప్రోగ్రామ్‌ (FTI-TTP)ను కేంద్ర హోం శాఖ ప్రారంభించింది. బయోమెట్రిక్స్‌ ముందుగా ధ్రువీకరించిన ప్రయాణికుల రాకపోకలకు ఇమ్మిగ్రేషన్ ప్రక్రియ వేగవంతంగా పూర్తవుతుందని పేర్కొంది.

తాజాగా ఈ ప్రోగ్రామ్‌ను ముంబయి, చెన్నై, కోల్‌కతా, బెంగళూరు, హైదరాబాద్, కోచి, అహ్మదాబాద్ విమానాశ్రయాలకు విస్తరిస్తున్నారు. తర్వాత దేశంలోని మరో 21 నగరాల్లోనూ తర్వలో అందుబాటులోకి రానున్నాయి. ‘భారత్ అంతర్జాతీయ గమ్యస్థానంగా మారుతోంది.. విమాన ప్రయాణాలను మరింత సునాయాసంగా, శ్రమ లేకుండా చేయడానికి ఈ కార్యక్రమం ప్రవేశపెట్టాం. అర్హత గల ప్రయాణీకులు ఆటోమేటెడ్ గేట్‌లను (ఇ-గేట్‌లు) ఉపయోగించుకోవడానికి, అంతరాయం లేని ప్రయాణానికి సాధారణ ఇమ్మిగ్రేషన్ క్యూలో నిరీక్షించే అవసరం ఉండదు’ అని అధికారులు తెలిపారు.

‘త్వరలోనే ఈ విధానం ముంబయి, చెన్నై, కోల్‌కతా విమానాశ్రయాల్లో అందుబాటులోకి వస్తుంది.. ముందస్తు బయోమెట్రిక్ పూర్తిచేసుకున్న భారతీయులు, ఓవర్సీస్ సిటిజన్ ఆఫ్ ఇండియా (OCI) కార్డ్ హోల్డర్లకు సెకన్లలోనే ఇమ్మిగ్రేషన్ ప్రక్రియ ముగుస్తుంది.. వేగవంతమైన, మరింత సురక్షితమైన ఇమ్మిగ్రేషన్ క్లియరెన్స్‌తో అంతర్జాతీయ ప్రయాణాలను సులభతరం చేయడం దీని ప్రధాన లక్ష్యం’అని అధికారులు పేర్కొన్నారు. ఈ విధానం ఢిల్లీ విమానాశ్రయంలో విజయవంతమైందని, 18,400 మంది ప్రయాణికులు ఇందులో రిజిస్ట్రేషన్ చేసుకున్నారని చెప్పారు.