చెన్నై టు విశాఖపట్నం వయా సికింద్రాబాద్.. ఆ బ్యాగు అక్కడికి చేరింది, ఆ దొంగ మంచి చేసినట్లేనా!

చెన్నై టు సికింద్రాబాద్ ఏంటి.. బ్యాగు విశాఖకు చేరడం ఏంటి అనుకుంటున్నారా?.. అవును సినిమా రేంజ్‌లో ఓ స్టోరీ జరిగింది. ఓ ఉద్యోగికి సంబంధించి బ్యాగు కహానీ ఇది. చెన్నైలో మొదలై సికింద్రాబాద్ మీదుగా విశాఖపట్నానికి చేరింది. తమిళనాడు రాజధాని చెన్నైకి చెందిన కార్తికేయన్‌కు హైదరాబాద్‌లో ఉద్యోగం వచ్చింది. ఈనెల 8న యువకుడు ఉద్యోగంలో చేరేందుకు శబరి ఎక్స్‌ప్రెస్‌లో కాట్పాడి నుంచి సికింద్రాబాద్‌ బయలుదేరాడు. రైలులో కార్తికేయన్‌ నిద్రలోకి జారుకున్నారు.. ఆ తర్వాత కొంతసేపటికి లేచి చూస్తే అతడి బ్యాగు మాయమైంది.

నిద్రలేచిన కార్తికేయన్‌.. తన బ్యాగు పోయిందని గుర్తించాడు.. వెంటనే ప్రకాశం జిల్లా ఒంగోలు రైల్వే స్టేషన్‌లో దిగి రైల్వే పోలీసులకు, స్థానిక పోలీస్‌స్టేషన్‌లో ఫిర్యాదు చేశారు. అనంతరం అదే రైలులో సికింద్రాబాద్‌ చేరుకొని అక్కడా ఫిర్యాదు చేశారు. తన బ్యాగ్‌ను ఎవరో ఎత్తుకెళ్లారని ఫిర్యాదులో పేర్కొన్నారు. రైల్వే పోలీసులు కేసు నమోదు చేసి దర్యాప్తు ప్రారంభించారు. ఇంతలో విశాఖలోని స్టీల్‌ప్లాంట్‌లో ఈ బ్యాగును గుర్తించారు. స్టీల్ ప్లాంట్‌లో పనిచేసే కార్మికులు ఆ బ్యాగును గుర్తించి.. ఫోన్‌ నంబర్‌ ఆధారంగా కార్తికేయన్‌కు ఫోన్‌ చేసి సమాచారం ఇచ్చారు. ఆ బ్యాగ్ తనదేనని.. జాగ్రత్తగా ఉంచాలని చెప్పారు. ఆ బ్యాగ్‌ను త్వరలోనే అతడికి చేర్చేలా ఏర్పాటు చేస్తున్నారు. దీంతో ఈ వ్యవహారం బయటపడింది.

అయితే ఈ ఘటనను బట్టి.. కార్తికేయన్ రైల్లో ప్రయాణించే నిద్రపోగా.. ఇదే అదనుగా ఎవరో దొంగ బ్యాగును చోరీ చేశారు. ఆ దొంగ బ్యాగులో ఉన్న రూ.3 వేలు మాత్రమే తీసుకున్నారు. ల్యాప్‌టాప్‌తో పాటుగా ఇతర ధ్రువపత్రాలు, బ్యాంకు కార్డులు ఉన్న బ్యాగును ఓ గూడ్స్‌ బోగీలోకి విసిరేశాడు. అలా ఆ బ్యాగు విశాఖపట్నం స్టీల్ ప్లాంట్‌కు చేరిందని చెబుతున్నారు. ఈ ఎపిసోడ్‌లో కార్తికేయన్ డబ్బులు పోతే పోయాయి.. అంతకంటే విలువైన అతడి ల్యాప్‌టాప్, ఇతర డాక్యుమెంట్లు మాత్రం దొరకడం ఊరట అని చెప్పాలి. మొత్తానికి చెన్నై టు సికింద్రాబాద్.. అక్కడి నుంచి విశాఖపట్నంకు ఈ బ్యాగు చేరడం చర్చనీయాంశమైంది. గతంలో కొన్ని సినిమాల్లో వేరే రాష్ట్రంలో విసిరేసిన వస్తువులు మరో రాష్ట్రంలో దొరికిన సీన్లు మనం చూసి ఉంటాం.. ఇప్పుడు ఇక్కడ కూడా అదే జరిగింది.