తిరుమలలో అంబటి రాంబాబు షర్ట్‌పై వివాదం.. టీటీడీకి ఫిర్యాదు చేస్తానన్న ఎంపీ రమేష్

మాజీ మంత్రి అంబటి రాంబాబు వివాదంలో చిక్కుకున్నారు. తిరుమల శ్రీవారి దర్శనం కోసం వచ్చిన ఆయన.. వైఎస్సార్‌సీపీ అధ్యక్షుడు జగన్‌ ఫొటో ఉన్న స్టిక్కర్‌తో తిరుమలకు రావడం చర్చనీయాంశమైంది. టీటీడీ నిబంధనల ప్రకారం.. రాజకీయ పార్టీల చిహ్నాలు, జెండాలు, స్టిక్కర్లతో శ్రీవారి దర్శనానికి రాకూడదు. అయినా అంబటి రాంబాబు తన చొక్కాపై జగన్‌ ఫొటో ఉన్న స్టిక్కర్‌తో వచ్చారు.. నిబంధనలకు విరుద్ధంగా ఆయన అలా రావడంపై విమర్శలు వస్తున్నాయి. అలాగే అంబటి రాంబాబు తీరుపై బీజేపీ ఎంపీ సీఎం రమేష్ ఆగ్రహం వ్యక్తం చేశారు. ఆయన కూడా తిరుమల శ్రీవారి దర్శనం కోసం రాగా.. ఈ స్టిక్కర్ విషయం తెలియడంతో స్పందించారు.

తిరుమల శ్రీవారి ఆలయంలోకి రాజకీయ పార్టీ జెండా, జగన్ మోహన్ రెడ్డి స్టిక్కర్ జేబుకు అతికించుకొని అంబటి రాంబాబు రావడం దారుణమన్నారు సీఎం రమేష్. ఇలా రావడం నిషేధం అని తెలిసినా.. తిరుమలలో ఇలాంటి పనులు ఎలా చేస్తారని ప్రశ్నించారు. శ్రీ వేంకటేశ్వరస్వామిపై అంబటి రాంబాబుకు అసలు గౌరవం లేదని.. ఎంత ధైర్యం ఉంటే ఇలాంటి పనులు చేస్తారని మండిపడ్డారు. ఇలాంటి వారు కొండపైకి రాకుండా చేయాలని.. కొందరు వైఎస్సార్‌సీపీ నేతలు తిరుమల పవిత్రతను కోల్పోయేలా చేస్తున్నారని ఆగ్రహం వ్యక్తం చేశారు. భగవంతుడి దగ్గరకు రమ్మంటేనే తాను హిందువును కానూ రాను అంటూ జగన్ తిరుమలకు రావడం లేదని.. అలాంటి వ్యక్తి ఫోటోను అంబటి రాంబాబు చొక్కా జేబుపై వేసుకొని తిరుమలకు ఎలా వస్తారని ప్రశ్నించారు. ఈ విషయంపై తాను టీటీడీకి ఫిర్యాదు చేస్తానన్నారు సీఎం రమేష్.

ప్రధాని నరేంద్ర మోదీ, ఏపీ సీఎం చంద్రబాబు నాయుడు, డిప్యూటీ సీఎం పవన్ కళ్యాణ్‌కు శ్రీవారి ఆశీస్సుల మెండుగా ఉండాలని కోరుకున్నట్లు సీఎం రమేష్ తెలిపారు. గత ఐదేళ్లలో రాష్ట్రం అభివృద్ధిలో వెనుకపడిందని.. ఎన్డీయే కూటమి ప్రభుత్వంలో రాష్ట్రం అభివృద్ధి పథంలో నడవాలని కోరుకున్నానన్నారు. అనకాపల్లిలో నిరుద్యోగులకు ఉద్యోగ అవకాశాలు కల్పించేందుకు కృషి చేస్తున్నట్లు చెప్పారు. పార్లమెంటరీ రైల్వే స్టాండింగ్ కమిటీ ఛైర్మన్ హోదాలో తిరుపతిలో రైల్వే అధికారులతో సమావేశం అయ్యామని.. రైల్వే పనులపై విస్తృతంగా సమీక్ష నిర్వహించామన్నారు. తిరుపతి రైల్వే స్టేషన్‌లోఇవాళ, మంగళవారం సికింంద్రాబాద్ రైల్వే స్టేషన్‌లో పర్యటిస్తామన్నారు.

మరోవైపు బీజేపీ ఎంపీ, పార్లమెంటరీ రైల్వే స్టాండింగ్ కమిటీ సభ్యులు లక్ష్మణ్ తిరుమల శ్రీవారిని దర్శించుకున్నారు. వీఐపీ బ్రేక్ దర్శన సమయంలో స్వామివారి సేవలో పాల్గొన్నారు. భారత్‌ను అభివృద్ధి చెందిన దేశంగా తీర్చిదిద్దడానికి ప్రధానమంత్రి మోదీ కృషి చేస్తున్నారని.. కొన్ని రాజకీయ పార్టీలు, నాయకులు సనాతన ధర్మంపై విషం చిమ్మడమే పనిగా పెట్టుకున్నాయన్నారు. హిందూ ధర్మాన్ని వ్యతిరేకించడం మూర్ఖత్వమేనని.. గత ప్రభుత్వం టీటీడీ పవిత్రతను దెబ్బ తీసే ప్రయత్నం చేసిందన్నారు. ఆ ప్రభుత్వానికి, అధికారులకు భగవంతుడు శిక్ష విధించారని.. తిరుమల క్షేత్ర పవిత్రతను కాపాడాలని చంద్రబాబుకు లేఖ రాశానన్నారు.