Amaravati News Navyandhra First Digital News Portal
ప్రజల అత్యాశే మోసగాళ్లకు పెట్టుబడి. ఎవరైతే అత్యాశకు పోతారో వారు.. మోస పోవటం ఖాయం. ఇది ఎన్నోసార్లు నిరూపితమైంది. ఇటీవల కాలంలో కొందరు సైబర్ నేరగాళ్లు స్టాక్ మార్కెట్ల పేరుతో అమాయకులను బురిడీ కొట్టిస్తున్నారు. తక్కువ పెట్టుబడితో ఎక్కువ లాభాలంటూ మోసాలు చేస్తున్నారు. అమాయకులు, అత్యాశపరులు వారి వలలో చిక్కుకొని నిండా మునుగుతున్నారు. తాజాగా.. పటాన్‌చెరు పట్టణంలో రూ.3.81 కోట్ల సైబర్ మోసం వెలుగులోకి వచ్చింది. ఇద్దరు ప్రైవేటు ఉద్యోగులను రెండు వేర్వేరు ఘటనల్లో మోసగించారు. మోసపోయిన బాధితులు పోలీసులను ఆశ్రయించటంతో అసలు విషయం వెలుగులోకి వచ్చింది.
వివరాల్లోకి వెళితే.. సంగారెడ్డి జిల్లా పటాన్‌చెరు ఏపీఆర్ లగ్జూరియాలో ఓ ప్రైవేటు ఉద్యోగి నివసిస్తున్నాడు. అతడు ఫేస్‌బుక్‌లో 45 రోజుల క్రితం స్టాక్ మార్కెట్ పేరిట ఉన్న ఓ అడ్వర్టైజ్‌మెంట్ చేశాడు. దాన్ని క్లిక్ చేసి వివరాలు చూశారు. అనంతరం సైబర్ కేటుగాడు క్రియేట్ చేసిన ఒక వాట్సాప్ గ్రూప్‌లో చేరాడు. అనంతరం స్టాక్ మార్కెట్‌లో ఇన్వెస్ట్ చేసే.. ఎక్కువ లాభాలు వస్తాయని గ్రూప్‌లో సూచించాడు. ఒక పోర్టల్ క్రియేట్ చేసి ఇందులో వచ్చిన ఫ్రాఫిట్స్ అంటూ ఆశలు రేకెత్తించాడు. దీంతో అత్యాశకు పోయిన సదరు ప్రైవేటు ఉద్యోగి అందులో పెట్టుబడి పెట్టాడు. అలా 22 దఫాలుగా మెుత్తంగా రూ.2.4 కోట్లు పెట్టుబడిగా పెట్టాడు.
అయితే లాభాల మాట అటుంచితే అసలుకే ఎసరొచ్చింది. తనకు వచ్చిన లాభాలు వదిలేసి.. పెట్టిన పెట్టుబడి తిరిగి ఇవ్వాలని కోరాడు. అయితే సైబర్ నేరగాడు మెళ్లిగా మెుహం చాటేశాడు. ఫోన్ చేసినా స్పందించలేదు. దీంతో తాను మోసపోయానని.. సదరు బాధితుడు డిసైడ్ అయ్యాడు. దీంతో చేసేదేం లేక పోలీసులను ఆశ్రయించాడు. బాధితుడి ఫిర్యాదు మేరకు సైబర్ క్రైం పోలీసులు కేసు నమోదు చేసుకొని విచారణ చేపట్టారు.
ఇక మరో కేసులో యూట్యూబ్‌లో స్టాక్ మార్కెట్ అడ్వర్టైజ్‌మెంట్ చూసిన మరో ప్రైవేటు ఉద్యోగి భారీగా డబ్బులు కోల్పోయాడు. యూట్యూబ్‌లో ప్రకటన చూసి క్లిక్ చేయడంతో పాటు వాట్సాప్ గ్రూప్‌లో సభ్యుడిగా చేరాడు. ఆ తర్వాత పెట్టుబడి పెడితే భారీగా డబ్బులు వస్తాయని ఆశపడి.. రూ.66.75 లక్షల పెట్టుబడి పెట్టాడు. అనంతరం సైబర్ కేటుగాడు అడ్రస్ లేకుండా పోయాడు. దీంతో మోసపోయానని గ్రహించిన అతడు పోలీస్ స్టేషన్‌లో ఫిర్యాదు చేశాడు. ఈ రెండు కేసులు నమోదు చేసుకున్న సైబర్ క్రైం పోలీసులు విచారణ చేపట్టారు.
