గ్రేటర్ హైదరాబాద్‌లో డెంగీ డేంజర్ బెల్స్.. భారీగా కేసులు, ఈ జాగ్రత్తలు తీసుకోండి

ప్రస్తుతం వర్షాకాలం కావటంతో సీజనల్ వ్యాధులు ప్రబలుతున్నాయి. దానికి తోడు డెంగీ జ్వరాలు ఎక్కువగా నమోదవుతున్నాయి. ముఖ్యంగా గ్రేటర్ హైదరాబాద్ పరిధిలో డెంగీ డేంజర్ బెల్స్ మోగుతున్నాయి. డెంగీ కేసులు విపరీతంగా పెరుగుతున్నాయి. డెంగీ జ్వరాల కారణంగా చాలా మందిలో ఒక్కసారిగా ప్లేట్‌లెట్లు పడిపోతున్నాయి. దీంతో ఎమర్జెన్సీ ట్రీట్‌మెంట్ కోసం హాస్పిటల్స్‌లో చేరుతున్నారు. గ్రేటర్‌ హైదరాబాద్ వ్యాప్తంగా ఈ ఏడాదిలో ఇప్పటికే 600లకు పైగా డెంగీ కేసులు నమోదైనట్లు అధికారులు చెబుతున్నారు.

ఇక ప్రైవేటు హాస్పిటల్స్‌లోనూ పలువురు డెంగీ జ్వరాలతో జాయిన్ అవుతుండగా.. వారి వివరాల నమోదులో తేడాలు ఉంటున్నాయి. ఈ లెక్కన గ్రేటర్ పరిధిలో వెయ్యికి పైగానే డెంగీ కేసులు ఉంటాయని అధికారులు భావిస్తున్నారు. డెంగీ బారిన పడి ఇప్పటికే పలువురు ప్రాణాలు కోల్పోయారు. తెల్ల రక్తకణాల కౌంట్ తగ్గిపోయి ప్రాణాలు కోల్పోతున్నారు. సికింద్రాబాద్‌లోని ఓ ప్రైవేటు హాస్పిటల్‌లో జ్వరాలతో చేరిన ప్రతి 10 మందిలో 3 నుంచి 4 మంది రోగులు డెంగీ బాధితులే ఉంటున్నారు. వారిలో చాలా మందిలో కాలేయ, కిడ్నీలపై ప్రభావం పడినట్లు డాక్టర్లు చెబుతున్నారు. డెంగీతో పాటు గన్యా బాధితులు పెరుగుతున్నారని అంటున్నారు. టైగర్ దోమల కారణంగా డెంగీ జ్వరాలు విజృంభిస్తున్నాయని అప్రమత్తంగా ఉండాలని డాక్టర్లు సూచిస్తున్నారు.

ఈ జాగ్రత్తలు తీసుకోండి..

• టైగర్‌ దోమ కుట్టిన 4-5 రోజులకు డెంగీ ఫీవర్ లక్షణాలు కనిపిస్తాయి.
• 102 డిగ్రీల జ్వరం, కళ్ల వెనుక భాగంలో విపరీతమైన నొప్పి, ఒంటి నొప్పులు, ఒంటిపై ఎర్రటి దద్దర్లు ఉంటే డెంగీ జ్వరంగా అనుమానించాలి.
• వైరల్‌ వల్ల కూడా తీవ్ర జ్వరం, తలనొప్పి, ఒళ్లు నొప్పులు తదితర డెంగీ తరహా లక్షణాలు కొందరిలో కనిపిస్తాయి. కొబ్బరి నీళ్లు, మజ్జిగ లాంటి ద్రవాలు ఎక్కువగా తీసుకోవాలి.
• మూడు రోజుల తర్వాత కూడా తగ్గక అవే లక్షణాలు కొనసాగితే ఆలస్యం చేయకుండా వెంటనే డాక్టర్లను సంప్రదించాలి.
• డెంగీ లక్షణాలు కనిపించిన వెంటనే ఎన్‌ ఎస్‌ 1 యాంటిజెన్‌ టెస్ట్ చేయించాలి. వ్యాధి నిర్ధారణ అయితే చికిత్స ప్రారంభించాలి. జ్వరం వచ్చి 5 రోజులు దాటితే డెంగీ నిర్ధారణకు IGM యాంటీబాడీల పరీక్ష చేయాల్సి ఉంటుంది.
• కిడ్నీపై ప్రభావం, బీపీ తగ్గడం, వాంతులు, రక్తస్రావం, లివర్, కడుపులో నొప్పి తదితర సమస్యలు ఏర్పడితే వెంటనే అప్రమత్తం కావాలి. లేదంటే బ్రెయిన్‌ హేమరేజ్‌కు దారి తీసే అవకాశం ఉంది.
• డెంగీని సకాలంలో గుర్తించి చికిత్స అందిస్తే నయమవుతుంది. అప్రమత్తంగా ఉంటూ ప్లేట్‌లెట్లు, బీపీ తగ్గకుండా చూసుకోవాలి. జ్వరం తగ్గినా జాగ్రత్తగాఉండి ప్లేట్‌లెట్లు చూసుకోవాలి.