సింహాచలం వెళ్లే భక్తులకు శుభవార్త.. తిరుమల తరహాలో ఇక్కడ కూడా, ఇకపై ఈజీగా

సింహాచలం శ్రీవరాహలక్ష్మీ నృసింహస్వామి వారి దేవస్థానం కీలక నిర్ణయం తీసుకుంది. ఆలయంలో దిగ్విజయంగా కొనసాగుతున్న నిత్య అన్నప్రసాద పథకానికి విరాళాలు సమర్పించాలనుకునే భక్తులకు డిజిటల్‌ చెల్లింపులను అందుబాటులోకి తీసుకురాబోతోంది. సింహాద్రి అప్పన్న స్వామి నిత్యాన్నప్రసాద పథకం 35వ వార్షికోత్సవం ఘనంగా జరిగింది. అన్నప్రసాద పథకానికి సాధారణ భక్తులు సైతం విరాళాలు సమర్పించేందుకు వీలుగా ఏర్పాట్లు చేస్తున్నట్లు ఈవో సింగల శ్రీనివాసమూర్తి తెలిపారు.

సింహాచలం ఆలయం అన్నదానం భవనం దగ్గర కార్డు స్వైపింగ్‌ పరికరాలు, డిజిటల్‌ చెల్లింపుల కోసం క్యూఆర్‌ కోడ్‌లు అందుబాటులోకి తీసుకొస్తామన్నారు ఈవో. ఆ మేరకు ఇప్పటికే బ్యాంకులతో చర్చలు జరిపినట్లు తెలిపారు. మరింత మందికి అన్నప్రసాదం కల్పించేందుకు భూరి విరాళాలు అందజేయాలని భక్తులను కోరారు ఆలయ స్థానాచార్యులు టి.పి.రాజగోపాల్‌. తొలుత అర్చకులు, వేదపండితులు ఆలయ ప్రధానార్చకుడు ఐవీ.రమణచార్యులు నేతృత్వంలో అప్పన్న స్వామి చిత్రపటం దగ్గర ప్రత్యేక పూజలు జరిపిన అనంతరం ఆహార పదార్థాలను స్వామికి నివేదించారు. నిత్యాన్నప్రసాద పథకం 35వ వార్షికోత్సవాన్ని పురస్కరించుకుని భక్తులకు ప్రత్యేకంగా బూరి, చక్కెర పొంగలి, పులిహోర వడ్డించారు.

1989 ఆగస్టు 14లో సింహాచలం అప్పన్న ఆలయ ప్రాంగణంలో నిత్య అన్నదాన కార్యక్రమం ప్రారంభమైంది. అప్పటి నుంచి ఇప్పటి వరకు ఈ కార్యక్రమం కొనసాగుతోంది. కొండపై నిత్య అన్నదానం కోసం పెద్ద భవనాన్ని నిర్మించారు. నిత్య అన్నదానం కార్యక్రమంలో నిత్యం కొన్ని వేల మందికి స్వామి వారి అన్నప్రసాదాన్ని పంపిణీ చేస్తున్నారు. గతంలో కర్రలతో వంట చేసే ప్రక్రియ నుంచి నేడు పెద్ద పెద్ద ఆధునిక యంత్రాలతో ఆహారాన్ని తయారు చేస్తున్నారు. ప్రతి వారంలో శని, ఆదివారాల్లో భక్తుల సంఖ్య పెరుగుతోంది. అంతేకాదు సింహాచలం అప్పన్న ప్రసాదంలో పులిహోరకు అత్యంత ప్రాధాన్యత ఉంది.

సింహాచలం అప్పన్నకు ప్రతిఏటా నిర్వహించే చందనోత్సవం, గిరిప్రదక్షిణలకు ప్రాముఖ్యం ఉంది. ఆ సమయంలో భక్తుల రద్దీ ఎక్కువగా ఉంటుంది.. అందుకే ఆ సమయంలో నిత్య అన్నదానం పంపిణీలు అధికారులు మరింత అప్రమత్తంగా వ్యవహరిస్తారు. భక్తులకు ఎటువంటి అసౌకర్యం కలగకుండా ఏర్పాట్లు చేస్తున్నారు.