Amaravati News Navyandhra First Digital News Portal
Tirumala: తిరుమల శ్రీవారిని దర్శించుకునేందుకు వివిధ రాష్ట్రాల నుంచి నిత్యం దాదాపు లక్ష మంది తిరుపతికి వస్తారు. అందులో కొందరు మాత్రమే ప్రత్యేక దర్శన టికెట్లు బుక్ చేసుకోగా.. చాలా మంది సర్వదర్శనానికే వెళ్తూ ఉంటారు. ఆ క్రమంలోనే సర్వదర్శనానికి 24 గంటల సమయం కూడా పడుతుంది. అయితే టికెట్ బుక్ చేసుకోకుండా వచ్చిన భక్తులు.. తిరుమలలో రద్దీ చూసి భయపడి దళారులను ఆశ్రయించి.. అధిక ధరలకు టికెట్లు కొంటూ ఉంటారు. కొన్నిసార్లు నకిలీ టికెట్లు కొని మోసపోయిన సంఘటనలు కూడా ఉన్నాయి. అయినా భక్తుల వీక్‌నెస్‌ను ఆసరాగా తీసుకుని.. దళారులు తమ చేతులకు పనిచెబుతున్నారు. ఇందులో భాగంగానే తాజాగా నకిలీ టికెట్లు కొనుగోలు చేసి.. శ్రీవారి దర్శనానికి వెళ్తున్న నలుగురు భక్తులను తిరుమల తిరుపతి దేవస్థానం విజిలెన్స్ అధికారులు పట్టుకున్నారు.
తిరుమలలో మరోసారి నకిలీ టికెట్లు తీవ్ర కలకలం రేపాయి. రూ.300 ప్రత్యేక ప్రవేశ దర్శన టికెట్లను కలర్ జిరాక్స్ తీసి నకిలీ టికెట్లు విక్రయిస్తున్న ముఠా తాజాగా బట్టబయలు అయింది. ఈ కలర్ జిరాక్స్ టికెట్ల ద్వారా రూ.300 ప్రత్యేక దర్శనానికి వెళ్తున్న నలుగురు భక్తులను టీటీడీ విజిలెన్స్ అధికారులు పట్టుకున్నారు. అయితే వీరికి టికెట్ స్కానింగ్ చేస్తున్న వ్యక్తి సహకరించడం గమనార్హం. వైకుంఠం క్యూ కాంప్లెక్స్‌లోని స్కానింగ్ సెంటర్ వద్ద పనిచేసే రుద్రసాగర్‌ అనే వ్యక్తి చొరవతో ఆ నలుగురు భక్తులు.. నకిలీ టికెట్లతో దర్శనం క్యూలోకి వెళ్లినట్లు గుర్తించారు.
అయితే క్యూ లైన్‌లోకి వెళ్లిన ఆ నలుగురు భక్తులపై అనుమానం వచ్చిన టీటీడీ విజిలెన్స్ అధికారులు వారిని పట్టుకుని గట్టిగా ప్రశ్నించగా.. అసలు విషయం బయటికి వచ్చింది. రూ.300 టికెట్ల పేరుతో నకిలీ టికెట్లు విక్రయిస్తున్నట్లు గుర్తించారు. అమృత్ యాదవ్ అనే పాత నేరస్థుడు చెన్నైకి చెందిన మోహన్‌రాజ్‌ అనే వ్యక్తిని మోసం చేసి వారికి 4 టికెట్లను అమ్మినట్లు తేల్చారు. అయితే ఆ 4 నకిలీ టికెట్లకు వారి వద్ద నుంచి ఏకంగా రూ.11 వేలు వసూలు చేసినట్లు టీటీడీ విజిలెన్స్ అధికారులు వెల్లడించారు. వచ్చిన ఆ రూ.11 వేలల్లో రుద్రసాగర్‌తో కలిసి అమృత్ యాదవ్ పంచుకున్నట్లు అనుమానం వ్యక్తం చేస్తున్నారు. ఈ క్రమంలోనే ఆ నలుగురు భక్తులను టీటీడీ అధికారులు అదుపులోకి తీసుకున్నారు.
అయితే ఈ నకిలీ టికెట్ల వ్యవహారాన్ని సీరియస్‌గా తీసుకున్న టీటీడీ విజిలెన్స్ అధికారులు.. దాని వెనక ఉన్న కుట్రను ఛేదించేందుకు సిద్ధం అయ్యారు. అయితే ఇందులో పలువురు ఏపీ టూరిజం, టీటీడీ కార్పొరేషన్ అధికారులు కూడా భాగస్వామ్యం ఉన్నట్లు తెలుస్తోంది. టీటీడీ విజిలెన్స్ అధికారులు టూటౌన్‌ పోలీసులకు ఫిర్యాదు చేయడంతో పోలీసులు కేసు నమోదు చేసి దర్యాప్తు చేస్తున్నారు.
