పుష్ప చూసి అందరూ గొడ్డళ్లు పట్టుకొని అడవికెళ్లిపోయారా?: హరీష్ శంకర్

ఆంధ్రప్రదేశ్ డిప్యూటీ సీఎం, జనసేనాని పవన్ కళ్యాణ్ అటవీ పరిరక్షణ గురించి మాట్లాడుతూ పుష్ప సినిమాపై ఇండైరెక్ట్ కామెంట్స్ చేసిన సంగతి తెలిసిందే. అప్పట్లో హీరోలు అడవిని కాపాడే సినిమాలు, పాత్రలు చేశారని.. ఇప్పుడు మాత్రం సినిమాల్లో హీరో అదే చెట్లను నరికేసి, స్మగ్లింగ్ చేస్తున్నాడంటూ పవన్ అన్నారు. ఈ కామెంట్లు సోషల్ మీడియాలో వెంటనే వైరల్ అయిపోయాయి. పవన్ ఇండైరెక్ట్‌గా పుష్ప సినిమాకి, అల్లు అర్జున్‌కి కౌంటర్ ఇచ్చారంటూ వార్తలు రాసేశారు. ఇక దీనిపై బన్నీ అభిమానులు కూడా రియాక్ట్ అవుతున్నారు. నిన్నటి నుంచి ఎక్కడ చూసినా పవన్ కళ్యాణ్‌పై కౌంటర్లు వేస్తూ పోస్టులు చేస్తున్నారు అల్లు ఫ్యాన్స్. తాజాగా ఈ వివాదంలోకి డైరెక్టర్ హరీష్ శంకర్‌ని కూడా లాగారు అభిమానులు.

ఏం వాడకమయ్యా?

తాజాగా అల్లు ఫ్యాన్స్ డైరెక్టర్ హరీష్ శంకర్ వీడియో ఒకటి సోషల్ మీడియాలో పోస్ట్ చేస్తున్నారు. దీంట్లో సమాజానికి పుష్ప సినిమా ఏం మెసేజ్ ఇస్తుందంటూ యాంకర్ అడిగిన ప్రశ్నకి అదిరిపోయే రిప్లయ్ ఇచ్చారు హరీష్. “పుష్ప క్యారెక్టర్ గంధపు చెట్లు నరుకుతూ ఉంటాడు. దీని మీద సొసైటీ ఎఫెక్ట్ ఏంటి అంటూ ఇద్దరు ముగ్గురు నా దగ్గర అన్నారు. ఓడియమ్మా ఇప్పుడు పుష్ప సినిమా చూసి ల్యాప్ టాప్‌లు వదిలేసి అందరూ గొడ్డళ్లు వేసుకొని తిరుపతికి వెళ్లిపోయారా? ఆయన ఫ్యాన్స్ అంతా అబ్బో అల్లు అర్జున్ తెగ నరికేసి డబ్బులు సంపాదిస్తున్నాడని వీళ్లంతా అడివికి వెళ్లిపోయారా? అయినా సినిమాని సినిమాలా చూడాలి.” అంటూ హరీష్ అన్నారు.

నిజానికి ఇది పాత వీడియో అయినప్పటికీ ప్రస్తుతం ఉన్న పరిస్థితులకి కరెక్ట్‌గా సరిపోయింది. ముఖ్యంగా పవన్ చేసిన కామెంట్స్‌కి హరీష్ ఓల్డ్ వీడియోతో కౌంటర్ ఇచ్చారు బన్నీ అభిమానులు. అంతేకాకుండా పవన్ చేసిన పలు సినిమాల్లో సన్నివేశాలు, డైలాగులు షేర్ చేస్తూ సభ్య సమాజానికి వీటితో ఏం మెసేజ్ ఇస్తున్నట్లు అంటూ కౌంటర్లు వేస్తున్నారు. మొన్నటి వరకూ మెగా Vs అల్లు వివాదం సోషల్ మీడియాలో ఫ్యాన్స్ వార్‌గా మాత్రమే ఉండేది. కానీ ఇప్పుడిది ఇరు కుటుంబాల మధ్య అఫీషియల్ వార్‌కి తెర లేపిందంటూ ట్వీట్లు పెడుతున్నారు అభిమానులు. ఇక అల్లు ఫ్యాన్స్ కౌంటర్లకి అదే రేంజ్‌లో మెగా అభిమానులు రిప్లయ్ ఇస్తున్నారు. మరి ఇది ఎక్కడి వరకూ వెళ్తుందో చూడాలి. పుష్ప 2 సినిమా డిసెంబర్ 6న థియేటర్లలో రిలీజ్ కాబోతుంది. అదే నెలలో రామ్ చరణ్ గేమ్ ఛేంజర్ కూడా రాబోతుంది. దీంతో బాక్సాఫీస్ దగ్గర ఎవరిది పైచేయి అవుతుందా అని ఫ్యాన్స్ చూస్తున్నారు.