హైదరాబాద్‌లో భారీగా తగ్గిన ఇళ్ల అమ్మకాలు.. ఆఫీసులకు మాత్రం ఫుల్ డిమాండ్.. ధరల్లో తగ్గేదేలే..!

Hyderabad Home Prices: హైదరాబాద్ నగరం పేరు గత కొన్ని సంవత్సరాలుగా మారుమోగుతున్న సంగతి తెలిసిందే. ముఖ్యంగా రియల్ ఎస్టేట్ పరంగా ఇక్కడ ఎంతో అభివృద్ధి చెందింది. ఈ క్రమంలోనే ఇళ్లు, భూముల ధరలు రికార్డు స్థాయిలో పలికాయి. ఆ మధ్య కోకాపేటలో ఎకరం రూ. 100 కోట్లకుపైగా పలికింది. ఆ తర్వాత కూడా ఇలాంటి డీల్స్ చాలానే జరిగాయి. ఈ క్రమంలోనే ఇళ్లు, ప్లాట్లు సహా ఫ్లాట్స్ రేట్లు అమాంతం పెరిగిపోయాయి. అద్దెలు కూడా సామాన్యులకు అందనంత ఎత్తుకు చేరాయి. రేట్లు ఎంత పెరిగినా డిమాండ్ మాత్రం కొంతకాలంగా అస్సలు తగ్గకపోవడం గమనార్హం. రేట్లు పెరుగుతున్న కొద్దీ సేల్స్ కూడా అదే రీతిలో పెరిగాయి. దేశంలో దిగ్గజ రియల్ ఎస్టేట్ నగరాలుగా పేరుగాంచిన ముంబై, ఢిల్లీ- NCR, పుణెం, బెంగళూరు, చెన్నైలను మించి ఇక్కడ రికార్డులు నమోదయ్యాయి.

అయితే ఇప్పుడు ఒక్కసారిగా జులై- సెప్టెంబర్ క్వార్టర్‌లో మాత్రం దేశంలోని 7 ప్రధాన నగరాల్లో.. ఇళ్లు లేదా ఫ్లాట్ల విక్రయాలు 11 శాతం తగ్గాయి. 2023 జులై- సెప్టెంబర్ త్రైమాసికంలో ఏకంగా 1,20,290 ఇళ్లు లేదా ఫ్లాట్స్ అమ్ముడుబోగా.. ఈ సంవత్సరం ఇదే సమయంలో ఆ సంఖ్య 1,07,060 గానే ఉంది. అయితే ఇళ్ల అమ్మకాలు పడిపోయినప్పటికీ.. సగటు ధరలు మాత్రం వార్షిక ప్రాతిపదికన చూస్తే 23 శాతం పెరిగినట్లు ప్రముఖ స్థిరాస్తి కన్సల్టెంట్ సంస్థ అనరాక్ వెల్లడించింది.

7 నగరాల్లో చూస్తే చదరపు అడుగు ధర సగటున రూ. 6800 నుంచి రూ.8,390కి పెరిగిందని అనరాక్ తెలిపింది. విక్రయానికి సిద్ధంగా ఉంచిన ఇళ్లు లేదా ఫ్లాట్స్ కూడా 1,16,220 నుంచి 93,750 కు పరిమితమైంది. దేశవ్యాప్తంగా సగటున విక్రయాలు 11 శాతం తగ్గగా.. ఇది హైదరాబాద్ నగరంలో రెట్టింపు ఉంది. అంటే హైదరాబాద్ మహానగరంలో ఇళ్ల విక్రయాలు 22 శాతం తగ్గుముఖం పట్టాయి. అయితే సగటు ధర మాత్రం 32 శాతం పెరిగినట్లు తెలిపారు అనరాక్ ఛైర్మన్ అనుజ్ పురి. హైదరాబాద్ ఇళ్ల అమ్మకాలు భారీగా పడిపోవడానికి ఇక్కడ హైడ్రా కూడా కారణం అని తెలుస్తోంది. చెరువు ఎఫ్టీఎల్, బఫర్ జోన్లలో నిర్మించిన భవనాల్ని హైడ్రా అధికారులు కూల్చివేస్తున్నారు. మరోవైపు వర్షాకాలం సీజన్ కావడం కూడా దీనికి కారణమని అనుకుంటున్నారు.

అయితే.. ఇళ్ల విక్రయాలు తగ్గినప్పటికీ.. కార్యాలయ స్థలాల లీజింగ్ (ఆఫీస్ స్పేస్ లీజింగ్) కార్యకలాపాలు మాత్రం జులై- సెప్టెంబర్ క్వార్టర్‌లో భారీగా పెరిగాయి. ఇది హైదరాబాద్, బెంగళూరుల్లోనే ఎక్కువగా జరిగినట్లు కొలియర్స్ ఇండియా రిపోర్ట్ తెలిపింది. దేశంలోని 6 ప్రధాన నగరాల్లో ఆఫీస్ స్పేస్ స్థూల లీజింగ్ 2023 సంవత్సరం ఇదే త్రైమాసికంలో 13.2 మిలియన్ చదరపు అడుగుల మేర జరగ్గా.. ఈ సంవత్సరం చూస్తే 31 శాతం పెరిగి 17.3 మిలియన్ చదరపు అడుగులకు చేరింది. దీంట్లో సగానికిపైగా హైదరాబాద్, బెంగళూరులోనే జరిగింది. బెంగళూరు, ముంబై, హైదరాబాద్‌ల్లో కలిపి ఈ సంవత్సరం 9 నెలల్లో ఏర్పడిన డిమాండ్.. 2023లో నమోదైన మొత్తం గిరాకీని మించిందని కొలియర్స్ ఇండియా ఆఫీస్ సర్వీసెస్ ఎండీ అర్పిత్ మెహ్రోత్రా వివరించారు.