భారత్ బలమేంటో తెలుసా.. ఒత్తిడి, అవరోధాలను జయించి విజయం సాధించే మార్గమిదే: శ్రీశ్రీ రవిశంకర్

భారత్ 78వ స్వాతంత్య్ర దినోత్సవ వేడుకలు నిర్వహించుకుంటున్న ఈ శుభ తరుణంలో.. ప్రముఖ ఆధ్యాత్మికవేత్త, ఆర్ట్ ఆఫ్ లివింగ్ వ్యవస్థాపకులు గురుదేవ్ శ్రీశ్రీ రవిశంకర్ కీలక సందేశం ఇచ్చారు. యువతకు, ప్రతి పౌరుడికి స్ఫూర్తినిచ్చే సూచనలు చేశారు. దేశానికి ఇప్పుడు ‘ఆధ్యాత్మిక విప్లవం’ కావాలని పిలుపునిచ్చారు. ఆధ్యాత్మిక విప్లవం అంటే ఏమిటో, ఒత్తిడిని, అవరోధాలను జయించి ఎలా ముందుకు కదలాలో వివరించారు. శ్రీశ్రీ రవిశంకర్ సందేశం పూర్తి పాఠం ఆయన మాటల్లో..

‘మన దేశం సౌందర్యం దాని వైవిధ్యంలోనే ఉంది. భారత ఉపఖండం విభిన్న సంస్కృతులు, భాషలు, జాతులు, మతాల సమ్మేళనం. దేశంలో ప్రతి 100 కిలోమీటర్లకు ఆహారపు అలవాట్లు, కళారూపాలు మారుతూ ఉంటాయి. దేశ ప్రజలు ఈ వైవిధ్యాన్ని ఆస్వాదిస్తారు. భారత గడ్డను ఈ వైవిధ్యమే ఎల్లప్పుడూ సుసంపన్నం చేస్తోంది.

77 కిందట భారతదేశానికి రాజకీయ స్వాతంత్య్రం వచ్చింది. అయితే.. ఆలోచన, ఆరాధనలో (Thought and Worship) ‘స్వేచ్ఛ’ ఎల్లప్పుడూ మన సంప్రదాయాల్లో అంతర్లీనంగానే ఉంది. ప్రపంచంలోనే అత్యంత పురాతనమైన నాగరికత మనది. అది నిత్య యవ్వనంతో శక్తిమంతంగా వికసిస్తుంది. వేదాలలోని శాశ్వత జ్ఞానాన్ని తనలో కలుపుకొని సైన్స్ & టెక్నాలజీ ఈ గడ్డపై పరిఢవిల్లుతోంది. ఎన్నో సవాళ్లు ఉన్నప్పటికీ, ‘సత్యమేవ జయతే’ నినాదం ఇప్పటికీ ఈ భూమిలో బలంగా ప్రతిధ్వనిస్తుంది. ఇదే మనల్ని ప్రగతిశీల, సుసంపన్నమైన మార్గం వైపు నడిపిస్తోంది.

ఈ దేశం తన పూర్తి సామర్థ్యాన్ని సాధించాలంటే, అది ఒకే ఆలోచనపై ఆధారపడకూడదు. ప్రతి భారతీయుడు తన నిజమైన సామర్థ్యాన్ని గుర్తించాలి. తమ లక్ష్యాలను అడ్డుకునే అవరోధాలను గుర్తించి, పరిమితులను దాటుకొని ముందుకుసాగాలి. భారతదేశాన్ని ముందుకు నడిపించడానికి ఆర్థిక సాధికారత ఒక్కటే సరిపోదు. వ్యక్తిగతంగా ప్రతి ఒక్కరూ సాధికారత సాధించాలి. సరైన విద్య, నైపుణ్యాభివృద్ధి అవసరం. దీంతోపాటు సమాజంలో పెరుగుతున్న ఒత్తిడిని జయించడం, శాంతి లాంటివి కూడా మన ఆర్థిక పురోగతికి కీలకమైనవి.

నేను వీటన్నింటినీ కలిపి ‘ఆధ్యాత్మిక విప్లవం’ అని పిలుస్తాను. ప్రతి భారతీయుడిని.. తన నిజమైన సామర్థ్యాన్ని చేరుకోకుండా నిరోధించే పరిమితుల నుంచి విముక్తి చేసేది ఈ ఆధ్యాత్మిక విప్లవమే. మన జనాభాలో ఎక్కువ మంది శారీరకంగా దృఢంగా, మానసికంగా ఆరోగ్యంగా తయారై, సామాజిక బాధ్యత తీసుకుంటే.. అప్పుడు సమాజ పురోగమనం, సమగ్రాభివృద్ధి సహజంగానే సాకారమవుతాయి. నిస్సందేహంగా, అలాంటి ఆధ్యాత్మిక విప్లవమే దేశానికి అవసరం.

సంపన్నులు మరింత దయచూపడం, పేదలు మరింత ఆత్మవిశ్వాసం పొంది, స్వావలంబన వైపు అడుగులేయడం.. ఇప్పుడు మన దేశానికి అవసరం. ఈ సాధికారతను సాధించేందుకు నిందలను, బాధిత మనస్తత్వాన్నీ ఎదిరించి ముందుకు కదలాలి. దీన్ని సాధించడానికి, దేశంలో ఆధ్యాత్మిక విప్లవంతో పాటు మానవ విలువలను కూడా మేల్కొల్పాలి. అది లేకుండా సామాజిక, రాజకీయ, ఆర్థిక పురోగతి సాధించడం ఒక సవాలుగానే ఉంటుంది.

హింస, నేరాలతో సతమతమవుతున్నంత కాలం ఏ సమాజమూ నాగరికత సాధించామని చెప్పుకోలేదు. గృహ హింసను, సమాజంలో పెరుగుతున్న హింసాత్మక, నేరపూరిత ఘటనలను మనం అరికట్టాలి. ఇది ఆధ్యాత్మిక జ్ఞానం ద్వారా మాత్రమే సాధ్యమవుతుంది.

వేరొకరు ఎవరో మీకు ఉద్యోగాలు ఇస్తారని ఎదురుచూస్తూ ఉండకండి. మనం వ్యవస్థాపకత (Entrepreneurship) పట్ల మక్కువ పెంచుకోవాలి. అప్పుడే మనం ప్రతి గ్రామాన్నీ స్వయం సమృద్ధి దిశగా, ప్రతి జిల్లాను ఆర్థికాభివృద్ధి దిశగా నడిపించగలం. ఆధ్యాత్మిక దృక్పథం మన యువతను సరైన దారిలో నడిపిస్తుంది. సమగ్రమైన విధానం, అన్నింటినీ స్వీకరించే తత్వం మన ప్రజలను నిజమైన పురోగతి వైపు ప్రేరేపిస్తుంది.

ఇందుకోసం ప్రభుత్వం, స్వచ్ఛంద సంస్థలు, కార్పొరేషన్లు, సమాజం సమిష్టిగా చర్యలు తీసుకోవాలి. ఆర్ట్ ఆఫ్ లివింగ్ తరఫున మా స్థాయిలో మేము.. గ్రామీణ వర్గాలలో యువనాయకులను సిద్ధం చేయడానికి కార్యక్రమాలను నిర్వహిస్తున్నాం. వైవిధ్యంలో ఉన్న సామరస్యం, ఆరోగ్యం, పరిశుభ్రత, మహిళా సాధికారత, పర్యావరణ పరిరక్షణ గురించి తమ కమ్యూనిటీలకు అవగాహన కల్పించే బాధ్యతను ఈ యువనాయకులు తీసుకుంటున్నారు.

మేము కాశ్మీర్, ఈశాన్య ప్రాంతాలలో డి-రాడికలైజేషన్ (తీవ్రవాద భావజాలం నుంచి వెనక్కి తీసుకురావడం) కార్యక్రమాలను విజయవంతంగా నిర్వహించాం. మా ప్రయత్నాలు ఫలించి పలువురు యువకులు ఆయుధాలను వదిలేసి, జనజీవన స్రవంతిలో కలిసిపోయారు.

ఆర్ట్ ఆఫ్ లివింగ్ ఆధ్వర్యంలో 8 కోట్లకు పైగా చెట్లను నాటాం. దేశవ్యాప్తంగా 70 నదులు, నీటి వనరులను పునరుద్ధరించాం. స్త్రీ సాధికారత కోసం ‘ఆర్ట్ ఆఫ్ లివింగ్’ చురుగ్గా పని చేస్తోంది. విధాన రూపకర్తలకు శిక్షణ ఇచ్చి, పలు కమ్యూనిటీల్లో స్త్రీల మానసిక ఆరోగ్యాన్ని పెంపొందించడానికి కృషి చేస్తోంది. స్థానిక వివాదాలను పరిష్కరించడానికి మేము వాలంటీర్ మధ్యవర్తిత్వ వ్యవస్థలను కూడా ఏర్పాటు చేస్తున్నాం.

ఆరోగ్యకరమైన, సంతోషకరమైన సమాజాన్ని నిర్మించడానికి, స్వావలంబన సాధించడానికి సాధికారత కలిగిన నాయకులను సిద్ధం చేయడమే మా లక్ష్యం. ఈ స్వాతంత్ర్య దినోత్సవ వేడుకల సందర్భంగా, ఈ సామూహిక ప్రయత్నానికి మీ అందరి సహకారం అందించాలని కోరుతున్నాను. ‘ధ్యానం, సేవ, ఆనందం’ అనే మార్గంలో కలిసి ముందుకు సాగుదాం.’