డీఎస్పీగా మహిళా బాక్సర్ నిఖత్ జరీన్.. వెల్‌కమ్ చెప్పిన తెలంగాణ డీజీపీ

భారత మహిళా బాక్సర్ నిఖత్ జరీన్ తెలంగాణ పోలీస్ డిపార్ట్‌మెంట్‌లో డిప్యూటీ సూపరింటెండెంట్ ఆఫ్ పోలీస్ (DSP)గా అధికారికంగా బాధ్యతలు స్వీకరించారు. బుధవారం తెలంగాణ డీజీపీ జితేందర్‌ను కలిసిన జరీన్.. తన జాయినింగ్ రిపోర్టును సమర్పించారు. ఈ సందర్భంగా డీజీపీ జితేందర్ డిపార్ట్‌మెంట్‌లోకి ఆమెకు గ్రాండ్ వెల్‌కమ్ చెప్పారు. ఈ మేరకు ఆయన ట్వీట్ చేశారు. ‘రెండుసార్లు ప్రపంచ బాక్సింగ్ ఛాంపియన్, ఒలింపిక్ అథ్లెట్ నిఖత్ జరీన్ డిప్యూటీ సూపరింటెండెంట్ ఆఫ్ పోలీస్ (స్పెషల్ పోలీస్)గా కొత్త పాత్రను స్వీకరించినందున శుభాకాంక్షలు తెలిపుతూ.. ఆమెను డిపార్ట్‌మెంట్‌లోకి గర్వంగా స్వాగతిస్తున్నాం. ఆమె అద్భుతమైన విజయాలు తెలంగాణకు స్ఫూర్తినిస్తాయి.’ అని డీజీపీ ఎక్స్‌ ట్విట్టర్ ఖాతాలో వెల్లడించారు.

తెలంగాణలోని నిజామాబాద్‌లో జూన్ 14, 1996న జన్మించిన నిఖత్ జరీన్ బాక్సింగ్‌లో అద్భుత విజయాలు సాధించింది. చిన్న వయస్సులోనే బాక్సింగ్‌ కెరీర్ ప్రారంభించిన ఆమె.. తక్కువ కాలంలోనే గొప్ప బాక్సర్‌గా ఎదిగారు. 2011లో AIBA ఉమెన్స్ యూత్ & జూనియర్ వరల్డ్ బాక్సింగ్ ఛాంపియన్‌షిప్స్‌లో గోల్డ్ మెడల్ గెలుచుకున్నారు. 2014లో సెర్బియాలో జరిగిన నేషన్స్ కప్ ఇంటర్నేషనల్ బాక్సింగ్ టోర్నమెంట్‌లోనూ సత్తాచాటి గోల్డ్ మెడల్ ఖాతాలో వేసుకున్నారు. 2019లో బల్గేరియాలోని సోఫియాలో జరిగిన స్ట్రాండ్జా మెమోరియల్ బాక్సింగ్ టోర్నమెంట్‌, 2021లో టర్కీలో జరిగిన ఇస్తాంబుల్ బోస్ఫరస్ బాక్సింగ్ టోర్నమెంట్‌లో గోల్డ్ మెడల్ సాధించి సత్తా చాటారు.

ఇక 2022,2023లో రెండుసార్లు ఆమె వరల్డ్ చాంపియన్ షిప్‌ టైటిల్ గెలుచుకుంది. కామన్వెల్త్ గేమ్స్‌లో గోల్డ్ మెడల్‌ను, ఏషియన్ గేమ్స్‌లో బ్రాంజ్ మెడల్‌ను గెలుచుకుంది. పారిస్ ఒలింపిక్స్‌లో మాత్రం నిరాశ పరిచింది. మహిళల 50 కేజీల విభాగంలో ప్రీ క్వార్టర్స్‌లోనే వెనుదిరిగింది. 2028లో లాస్ ఏంజెల్స్ ఒలింపిక్స్‌లో మెడల్ సాధించటమే లక్ష్యంగా సన్నద్ధమవుతోంది. కాగా, కేంద్ర ప్రభుత్వం ఆమెకు అర్జున అవార్డు అందజేసింది. ఇటీవల నిఖత్ జరీన్ తోపాటు క్రీడాకారులు ఈషా సింగ్, భారత క్రికెటర్ మహ్మద్ సిరాజ్‌లకు హైదరాబాద్‌లో 600 గజాల ఇంటి స్థలాన్ని రేవంత్ ప్రభుత్వం కేటాయించింది. నిఖత్ జరీన్, సిరాజ్‌లకు గ్రూప్ 1 స్థాయి ఉద్యోగాలివ్వాలని ఆదేశించారు. ఈ మేరకు జరీన్ డీఎస్పీగా ఉద్యోగంలో చేరారు.