ఎంట్రీతోనే అదరగొట్టిన స్టాక్.. తొలిరోజే పెట్టుబడి డబుల్.. ఒక్కోలాట్‌పై రూ.1.20 లక్షల లాభం!

IPO Listing: దేశీయ స్టాక్ మార్కెట్లలో ఐపీఓల సందడి కొనసాగుతోంది. రోజుకో కంపెనీ స్టాక్ మార్కెట్‌ లోకి ఎంట్రీ ఇస్తోంది. మూడు రోజుల క్రితమే బజాజ్ హౌసింగ్ ఫైనాన్స్ ఐపీఓ భారీ లాభాలతో లిస్టింగ్ అయిన సంగతి తెలిసిందే. ఇప్పుడు అదే దారిలో మరో కంపెనీ గ్రాండ్ ఎంట్రీ ఇచ్చింది. ఇన్వెస్టర్లపై కాసుల వర్షం కురిపించింది. అదే ఇన్నోమెట్ అడ్వాన్స్‌డ్ మెటీరియల్స్ లిమిటెడ్ (Innomet Advanced Materials Ltd) స్టాక్. ఈ కంపెనీ షేర్లు జాతీయ స్టాక్ ఎక్స్చేంజీలో సెప్టెంబర్ 18 బుధవారం రోజున 90 శాతం ప్రీమియంతో లిస్టింగ్ అయ్యాయి. ఈ ఐపీఓ గరిష్ఠ ధర రూ.100 ఉండగా.. ఎన్ఎస్ఈ ఎస్ఎంఈ సెగ్మెంట్‌లో రూ.190 వద్ద ట్రేడింగ్ మొదలు పెట్టింది.

ఇన్నోమెట్ అడ్వాన్స్‌డ్ మెటీరియల్స్ కంపెనీ ఈ పబ్లిక్ ఇష్యూ ద్వారా రూ.34.24 కోట్లు సమీకరించాలనే లక్ష్యంతో వచ్చింది. షేర్ల గరిష్ఠ ధర రూ.100గా నిర్ణయించింది. ఒక్కో లాట్‌లో 1200 షేర్లు ఇచ్చారు. అంటే ఒక్క లాట్ కొనేందుకు రూ.1,20,000 ఇన్వెస్ట్ చేయాల్సి ఉంటుంది. ఇవాళ స్టాక్ మార్కెట్ లోకి లిస్టింగ్ అయిన ఈ స్టాక్ ఆ తర్వాత సైతం రాణిస్తోంది. రూ.199.50 శాతానికి తాకింది. అంటే దాదాపు మరో 10 శాతం పెరిగినట్లయితే. దీంతో మొత్తంగా లిస్టింగ్‌తోనే 100 శాతం లాభాలు వచ్చినట్లయింది. అంటే ఒక లాట్ దక్కిన వారికి తొలి రోజే రూ.1,20,000 లాభం వచ్చినట్లయింది.

ఇన్నోమెంట్ అడ్వాన్స్‌డ్ మెటీరియల్స్ ఐపీఓ ఇన్వెస్టర్ల సబ్‌స్క్రిప్షన్ కోసం సెప్టెంబర్ 11వ తేదీన వచ్చింది. మూడు రోజుల పాటు అంటే సెప్టెంబర్ 13వ తేదీ వరకు అవకాశం కల్పించారు. ఈ మూడు రోజుల్లో మంచి స్పందన లభించింది. 323 రెట్లు బిడ్లు దాఖలయ్యాయి. ఈ ఐపీఓ ద్వారా 3,252,000 తాజా ఈక్విటీ షేర్లను జారీ చేసింది. అయితే, 1,05,34,03,200 షేర్లకు బిడ్లు వచ్చాయి. ఈ ఐపీఓ ద్వారా సమీకరించిన నిధులను వర్కింగ్ క్యాపిటల్ అవసరాలు, మూల ధన వ్యయాల కోసం ఖర్చు చేస్తామని కంపెనీ తెలిపింది. ఈ సంస్థను 1984లో ప్రారంభించారు. ఈ సంస్థ మెటల్ పౌడర్లు, టంగ్‌స్టన్ హెవీ అల్లాయ్‌లు తయారు చేస్తుంది. భారత్‌తో పాటు అమెరికా, యూకే, జర్మనీ, జపాన్, ఇటలీ నెదర్లాండ్స్, న్యూజిలాండ్, బ్రూనై, లెబనాన్ వంటి దేశాలకు తమ ఉత్పత్తులను ఎగుమతి చేస్తోంది.