జానీ మాస్టర్‌కు నేషనల్ అవార్డు రద్దు.. బిగ్ షాక్

Jani Master Case: లైంగిక వేధింపుల కేసులో అరెస్టయిన ప్రముఖ కొరియోగ్రాఫర్ జానీ మాస్టర్‌కు ఊహించిన షాక్ తగిలింది. పోక్సో కేసు నమోదు కావడంతో జానీ మాస్టర్‌కు ప్రకటించిన నేషనల్ ఫిల్మ్ అవార్డును కమిటీ రద్దు చేసింది. 2022 సంవత్సరానికి గానూ తమిళ్ స్టార్ హీరో ధనుష్ నటించిన తిరు (తిరుచిట్రంబలం) సినిమాకు బెస్ట్ కొరియోగ్రాఫర్‎గా జానీ మాస్టర్‌ను నేషనల్ అవార్డు వరించిన విషయం తెలిసిందే. కాగా.. అక్టోబర్ 8న ఢిల్లీలో ఈ అవార్డు ఫంక్షన్ జరగనుంది. అయితే.. రిమాండ్ ఖైదీగా చంచల్ గూడా జైలులో ఉన్న జానీ మాస్టర్‌.. నేషనల్ అవార్డు అందుకునేందుకు అనుమతి కోరగా.. రంగారెడ్డి జిల్లా కోర్టు షరతులతో కూడిన మధ్యంతర బెయిల్ మంజూరు చేసింది. అక్టోబర్ 6వ తేదీ నుంచి అక్టోబర్ 10 వరకు జానీ మాస్టర్‌కు కోర్టు మధ్యంతర బెయిల్ మంజూరు చేస్తూ.. గురువారం (అక్టోబర్ 3న) తీర్పు ఇచ్చింది. దీంతో.. అవార్డు ఫంక్షన్‌కు హాజరయ్యేందుకు జానీ మాస్టర్ సిద్ధం అవుతున్న నేపథ్యంలో.. నేషనల్ ఫిల్మ్ అవార్డు కమిటీ ఊహించని ట్విస్ట్ ఇచ్చింది.

తనపై జానీ మాస్టర్‌ పలుమార్లు లైంగిక వేధింపులకు పాల్పడినట్లు.. ఆయన దగ్గర అసిస్టెంట్ కొరియోగ్రాఫర్‌గా పనిచేస్తున్న యువతి సెప్టెంబర్ 15న హైదరాబాద్‌లోని నార్సింగి పోలీసులకు ఫిర్యాదు చేసింది. యువతి ఫిర్యాదుతో పోలీసులు జానీ మాస్టర్ మీద.. పలు సెక్షన్లతో కేసు నమోదు చేశారు. అయితే.. జానీ మాస్టర్ మొదటిసారి అత్యాచారానికి పాల్పడినప్పుడు బాధితురాలు మైనర్ కావటంతో.. పలు సెక్షన్లతో పాటు పోక్సో చట్టం కింద కూడా కేసు నమోదు చేశారు పోలీసులు. కేసు నమోదైనప్పటి నుంచి పరారీలో ఉన్న జానీ మాస్టర్ కోసం.. పోలీసులు రెండు తెలుగు రాష్ట్రాలతో పాటు పొరుగు రాష్ట్రాల్లోనూ ముమ్మరంగా గాలించారు. అయితే.. గోవాలో తలదాచుకున్నట్టు పోలీసులకు సమాచారం రావటంతో.. అక్కడికి వెళ్లిన సైబరాబాద్ పోలీసులు జానీ మాస్టర్‌ను అరెస్ట్ చేసి.. హైదరాబాద్‌ తీసుకొచ్చారు. సెప్టెంబర్ 20న జానీ మాస్టర్‌ను ఉప్పరపల్లి కోర్టులో హాజరుపరిచారు.

ఈ కేసులో జానీకి 14 రోజుల రిమాండు విధించింది కోర్టు. దీంతో.. జానీ మాస్టర్‌ను నేరుగా చంచల్ గూడా జైలుకు తరలించారు. అనంతరం.. జానీ మాస్టర్‌ను విచారించేందుకు పోలీసులకు నాలుగు రోజుల కస్టడీకి కోర్టు అనుమతించటంతో.. తమదైన శైలిలో విచారణ జరిపారు. కాగా.. ఈ కస్టడీలో కీలక విషయాలు వెల్లడించాడు జానీ మాస్టర్. ఆ బాధిత యువతే తనను వేధించిందని కస్టడీలో ఆసక్తికర విషయాలను జానీ వెల్లడించినట్టు సమాచారం. స్వయంగా ఆ అమ్మాయే వచ్చి తనకు తానుగా పరిచయం చేసుకుందని.. ఆ తర్వాత తనను పెళ్లి చేసుకోవాలని తనను ఇబ్బంది పెట్టిందని తెలిపినట్టు సమాచారం. వీళ్ల పంచాయితీ డైరెక్టర్ సుకుమార్ దగ్గరికి కూడా వెళ్లిందని.. ఆయన చెప్పినా కూడా ఆ అమ్మాయి వినలేదంటూ విస్తుపోయే విషయాలు వెల్లడించినట్టు తెలిసింది. ఇంతకీ అసలు నిజంగా అక్కడ జరిగిందేంటన్నది ఇప్పుడు అంతు చిక్కని విషయం.

ఇవన్నీ ఎలా ఉన్నా.. మొత్తానికి జానీ మాస్టర్‌ను నేషనల్ అవార్డు ప్రకటించిన కొద్ది రోజులకే ఈ వ్యవహారం బయటికి రావటం.. ఈ ప్రతిష్టాత్మక అవార్డు కోసం కోర్టు బెయిల్ ఇచ్చినప్పటికీ ఆ అవార్డును కమిటీ రద్దు చేయటం.. ఇలా బ్యాక్ టూ బ్యాక్‌ ఊహించని షాకులు తగులుతున్నాయి షేక్ జానీ బాషాకు.