మనిషి కాదు పశువు, అశ్లీల వీడియోలకు బానిస.. కోల్‌కతా నిందితుడిపై సీబీఐ అధికారి

RG Kar Hospital: దేశవ్యాప్తంగా తీవ్ర సంచలనం సృష్టించిన కోల్‌కతా డాక్టర్‌పై అత్యాచారం, హత్య కేసులో సీబీఐ అధికారులు ముమ్మర దర్యాప్తు చేస్తున్నారు. ఈ కేసులో ఇప్పటివరకు జరిపిన విచారణకు సంబంధించి కోల్‌కతా పోలీసులతోపాటు సీబీఐ అధికారులు కూడా సుప్రీంకోర్టులో వేర్వేరుగా స్టేటస్ రిపోర్టులు సమర్పించారు. ఈ కేసు విచారణను సుమోటోగా తీసుకున్న సుప్రీంకోర్టు ఆదేశాలతో సీబీఐ, కోల్‌కతా పోలీసులు.. నివేదిక అందించారు. మరోవైపు.. ఈ కేసులో విచారణ జరుపుతున్న ఓ సీబీఐ అధికారి.. నిందితుడు సంజయ్ రాయ్ గురించి సంచలన విషయాలు వెల్లడించారు. నిందితుడు సంజయ్ రాయ్.. పోర్న్ వీడియోలకు బానిస అని.. అతడిది పశు ప్రవృత్తి అని పేర్కొన్నారు. నిందితుడి మానసిక తీరును విశ్లేషించిన ఫోరెన్సిక్ టీమ్ ఇచ్చిన నివేదిక ఆధారంగా ఆ సీబీఐ అధికారి.. ఈ విషయాలు చెప్పారు.

కోల్‌కతా డాక్టర్‌ హత్యాచారం కేసును దర్యాప్తు చేస్తున్న సీబీఐ.. ఈ కేసులో ప్రధాన నిందితుడు సంజయ్‌ రాయ్‌ను అన్ని కోణాల్లో విచారిస్తోంది. ఈ క్రమంలోనే సెంట్రల్‌ ఫోరెన్సిక్‌ సైన్స్‌ లాబొరేటరీకి చెందిన మెడికల్ టీమ్.. సంజయ్ రాయ్ మానసిక తీరును విశ్లేషించింది. ఇందులో ఆశ్చర్యకరమైన నిజాలు వెలుగులోకి వచ్చాయి. నిందితుడు పోర్న్ వీడియోలను బానిస అయ్యాడని.. అతడికి వక్రబుద్ధి బుద్ధి ఉందని ఓ సీబీఐ అధికారి పేర్కొన్నారు. ఫోరెన్సిక్‌ టీమ్ చెప్పిన విషయాల ఆధారంగా సంజయ్ రాయ్‌లో పశు ప్రవృత్తి కనిపించిందని చెప్పారు.

మరోవైపు.. విచారణ సందర్భంగా సంజయ్‌ రాయ్‌లో కనీసం పశ్చాత్తాపం కనిపించడం లేదని ఆ సీబీఐ అధికారి మీడియాకు వెల్లడించారు. సంఘటన జరిగిన రోజు ప్రతీ నిమిషం జరిగిన అన్ని విషయాలను ఆగకుండా మొత్తం వివరించాడని తెలిపారు. అతడు చెప్పే విధానం బట్టి చూస్తే ఎలాంటి పశ్చాత్తాపానికి గురవుతున్నట్లు కనిపించలేదని చెప్పారు. ఇక ఆర్‌జీ కర్ ఆస్పత్రిలో నేరం జరిగిన ప్రదేశంలో నిందితుడు ఉన్నాడని చెప్పడానికి అన్ని సాంకేతిక, శాస్త్రీయ ఆధారాలు ఉన్నాయని తెలిపారు. ఆగస్టు 8 వ తేదీన ఉదయం 11 గంటలకు ఆస్పత్రిలోని శ్వాసకోశ విభాగం సమీపంలో సంజయ్ రాయ్‌ కనిపించాడని.. ఆగస్టు 9 వ తేదీన తెల్లవారుజామున 4 గంటలకు మళ్లీ అదే బిల్డింగ్‌లోకి వెళ్లినట్లు సీసీటీవీలో స్పష్టంగా కనిపించిందని ఆ సీబీఐ అధికారి వెల్లడించారు.

ఇక నిందితుడు సంజయ్ రాయ్‌కి నిర్వహించిన డీఎన్‌ఏ పరీక్షలకు సంబంధించిన విషయాలపై ఆ సీబీఐ అధికారి వివరాలు వెల్లడించలేదు. దీంతోపాటు ఆ ట్రైనీ డాక్టర్‌పై సంజయ్ రాయ్ ఒక్కడే అఘాయిత్యానికి పాల్పడ్డాడా లేక సామూహిక అత్యాచారం జరిగిందా అని వస్తున్న వార్తలపైనా స్పందించేందుకు ఆ అధికారి నిరాకరించారు. ఈ కేసు దర్యాప్తులో భాగంగా భవానీపుర్‌లోని నిందితుడు సంజయ్‌ రాయ్ నివాసానికి వెళ్లిన సీబీఐ అధికారులు అక్కడ విచారణ జరిపారు. సంజయ్ రాయ్ కుటుంబ సభ్యులు, ఇంటి పక్కన ఉన్నవారితోపాటు అతడితో కలిసి పనిచేసే వారినీ విచారించారు.