IPO: లిస్టింగ్‌తోనే చేతికి రూ. 2.40 లక్షలు.. తొలిరోజే 66 శాతం పెరిగిన ఐపీఓ.. ఇన్వెస్టర్లకు కాసుల పంటే!

స్టాక్ మార్కెట్లలో ఇన్వెస్ట్ చేసే వారికి ఏ స్టాక్ ఎప్పుడు పెరుగుతుందో ఒక అంచనా ఉండాలి. అంటే కనీసం దీనిపై అవగాహన ఉండాలి. ఇందుకోసం స్టాక్ మార్కెట్లను నిశితంగా పరిశీలిస్తుండాలి. ఆర్థిక నిపుణుల సలహా తీసుకోవాలి. ఆయా కంపెనీల పనితీరు, ఫలితాలు, ప్రకటనలు, పెట్టుబడి వ్యూహాలు, ఒప్పందాలు, ప్రణాళికలు ఇలా అన్నింటిపైనా అవగాహన ఉండాలి. అప్పుడే.. మంచి స్టాక్ ఎంచుకునేందుకు దోహదం చేస్తుంది. ఇంకా దీర్ఘకాలంలో మంచి రిటర్న్స్ అందుకోవచ్చు. స్టాక్స్‌లో షార్ట్ టర్మ్ కాకుండా లాంగ్ రన్‌లోనే చాలా వరకు షేర్లు మంచి లాభాల్ని అందిస్తుంటాయి. ఇలాంటివి దలాల్ స్ట్రీట్‌లో చాలానే ఉన్నాయని చెప్పొచ్చు. ఇక మార్కెట్ లాభనష్టాలతో సంబంధం లేకుండా కొన్ని ఐపీఓలు కాసుల వర్షం కురిపిస్తుంటాయి.

ఐపీఓల్లో లిస్టింగ్ గెయిన్స్ ఎక్కువగా ఉంటాయి. ముందుగానే గ్రే మార్కెట్లో ప్రీమియం ఎంత శాతం ఉందనేది ఒక అంచనాకు రావొచ్చు. దానిని బట్టి ఇన్వెస్ట్ చేయాలా వద్దా అనేది దాదాపు నిర్ణయించుకోవచ్చు. మార్కెట్ లాభనష్టాలతో ఇక్కడ పెద్దగా సంబంధం ఉండదు. అయితే.. ఇటీవల స్టాక్ మార్కెట్లు భారీగా పడిపోతున్న క్రమంలో ఐపీఓలు పెద్దగా రాణించిన దాఖలాలు కనిపించట్లేదు.

>> సోమవారం రోజు ఒక ఐపీఓ మార్కెట్లోకి గ్రాండ్ ఎంట్రీ ఇచ్చింది. అదే నీలం లైనెన్స్ అండ్ గార్మెంట్స్ ఇండియా లిమిటెడ్. ఇష్యూ ధర రూ. 24 కాగా.. దానితో పోలిస్తే ఏకంగా 66.87 శాతం ప్రీమియంతో రూ. 40.05 వద్ద లిస్టయింది. ఇది NSE SME ఎక్స్చేంజి ఐపీఓ. ఈ ఐపీఓ విలువ రూ. 13 కోట్లు. నవంబర్ 8-12 మధ్య సబ్‌స్క్రిప్షన్ జరగ్గా.. నవంబర్ 18న అంటే ఇవాళ మార్కెట్లోకి ప్రవేశించిందని చెప్పొచ్చు. ఇష్యూ ధర రూ. 20-24 ధరగా నిర్ణయించగా.. చివరికి రూ. 24 ఖరారు చేసింది.

ఈ ఐపీఓకు ముందు నుంచే మంచి డిమాండ్ కనిపించింది. సబ్‌స్క్రిప్షన్ కోసం ఇన్వెస్టర్లు ఎగబడ్డారు. అవసరమైన దాని కంటే ఏకంగా 91.97 రెట్ల మేర సబ్‌స్క్రిప్షన్స్ వచ్చాయి. మొత్తం 36 లక్షల షేర్లు అందుబాటులో ఉండగా.. ఏకంగా 33.16 కోట్ల షేర్ల కోసం బిడ్స్ దాఖలయ్యాయి. ఇక పెట్టుబడి విషయానికి వస్తే.. ఐపీఓ కోసం కనీసం 6000 షేర్లు కొనుగోలు చేయాల్సి ఉంటుంది. కనీస పెట్టుబడి రూ. 1.44 లక్షలన్నమాట. ఇక లిస్టింగ్ ప్రైస్‌తో చూస్తే ఈ పెట్టుబడిపై మొత్తం చేతికి రూ. 2,40,300 వచ్చింది. అంటే దాదాపు రూ. లక్ష వరకు లాభం వచ్చిందన్నమాట.