నేటి నుంచి పారిస్ ఒలింపిక్స్‌.. చరిత్రలో నిలిచిపోనున్న ప్రారంభ వేడుకలు..!

ప్రపంచ క్రీడాభిమానులు ఎప్పుడెప్పుడా అని ఎదురుచూస్తున్న సమయం రానే వచ్చింది. ప్రపంచ దేశాల్ని ఒక్కచోటకు చేర్చి ఆటలాడించే అద్భుత ఒలింపిక్స్‌కు సమయం ఆసన్నమైంది. నేడు పారిస్‌ వేదికగా ఒలింపింక్స్‌ 2024కు తెరలేవనుంది. నాలుగేళ్లకు ఒకసారి జరిగే ఈ క్రీడల్లో నేటి నుంచి పోటీలు ప్రారంభం కానున్నాయి. చివరగా పారిస్‌లో 1924లో ఒలింపిక్స్‌ జరిగాయి. సరిగ్గా వందేళ్ల తర్వాత ఇప్పుడు మరోసారి అక్కడ పోటీలు జరగనున్నాయి.

ఒలింపిక్స్‌ చరిత్రలో నిలిచిపోనున్న వేడుకలు..

సాధారణంగా ఎప్పుడైనా ఒలింపిక్స్‌ ఆరంభ వేడుకలు ఆతిథ్య నగరంలోని ప్రధాన స్టేడియంలో జరుగుతాయి. ఇదే ఆనవాయితీగా వస్తోంది. కానీ పారిస్‌ ఈ సారి ఆ సంప్రదాయానికి చెక్‌పెట్టేలా ఏర్పాట్లు చేసింది. చరిత్రలో నిలిచిపోయేలా తొలిసారిగా స్టేడియం వెలుపల, సెన్‌నదిపై ఈ ప్రారంభోత్సవ కార్యక్రమం జరగనుంది. ఈ నదిపై 6 కిలోమీటర్ల మేర పడవల్లో పోటీల్లో పాల్గొనే 205 దేశాల అథ్లెట్లు పరేడ్‌ నిర్వహిస్తారు. ఇందుకోసం 94 పడవలను సైతం ఇప్పటికే సిద్ధం చేశారు. ఈ వేడుకలకు సుమారు 3 లక్షల మంది ప్రేక్షకులు హాజరయ్యే అవకాశం ఉందనే అంచనాలు ఉన్నాయి. అయితే ఈ వేడుకలకు వర్షం అంతరాయం కలిగించే అవకాశం ఉంది.

పోలీసుల గుప్పిట్లో పారిస్ నగరం..

దేశ, విదేశాల నుంచి ప్రముఖుల రానుండటంతో పారిస్‌ చుట్టూ పరిష్ట పహారా ఏర్పాటు చేశారు. నగరం చుట్టూ 150 కిలోమీటర్ల మేర నో ఫ్లై జోన్‌గా ప్రకటించారు. దీంతో ఆ పరిసరాల్లోని గగనతలం నుంచి విమానాలు వెళ్లకుండా మూసివేశారు. ఫైటర్‌ జెట్స్, నిఘా విమానాలు, డ్రోన్లు, హెలికాప్టర్లతో పోలీసులు భారీ బందోబస్తు ఏర్పాటు చేశారు. భద్రతో భారత్‌కు చెందిన బృందాలు సైతం పాల్గొంటున్నాయి. ముఖ్యంగా భారత్‌లోని కే-9 జాతికి చెందిన 10 శునకాలకు శిక్షణ విధుల్లో పాల్గొన్నాయి. పారిస్‌కు వెళ్లేముందే వాటికి 10 వారాల పాటు ప్రత్యేక శిక్షణ ఇచ్చారు.

అథ్లెట్ల పరేడ్‌ సంగతేంటి..?

ఒలింపిక్స్‌ ప్రారంభోత్సవానికి ముందు అథ్లెట్ల పరేడ్‌ నిర్వహిస్తారు. ఈసారి నిర్వహించే అథ్లెట్ల పరేడ్‌లో ఒలింపిక్స్‌ పుట్టినిల్లుగా ఉన్న గ్రీస్‌ మొదటగా ప్రవేశిస్తుంది. ఈ జాబితాలో భారత్‌ 84వ దేశంగా ఉంది. పరేడ్‌లో 83 దేశాల తర్వాత భారత్‌ పాల్గొంటుంది. ఈ పరేడ్‌లో అందరికంటే చివరగా ఆతిథ్య ఫ్రాన్స్‌ పాల్గొంటుంది. 204 దేశాల తర్వాత పరేడ్‌లో భాగం కానుంది.

చరిత్ర తిరగరాస్తారా?

పారిస్‌ ఒలింపిక్స్‌లో భారత్ నుంచి 117 మంది అథ్లెట్లు పాల్గొంటున్నారు. గత టోక్యో ఒలింపిక్స్‌లో 124 మంది అథ్లెట్లు బరిలో నిలిచారు. అందులో మొత్తంగా భారత్‌ ఏడు పతకాలు సాధించింది. జావెలిన్‌ త్రోయర్‌ నీరజ్‌చోప్రా గోల్డ్ మెడల్ సాధించాడు. ఈసారి భారత్‌ నుంచి అథ్యధికంగా ట్రాక్‌ అండ్‌ ఫీల్డ్‌లో 29 మంది బరిలో ఉన్నారు. ఈసారి రెండంకెల సంఖ్యలో పతకాలే లక్ష్యంగా భారత్‌ పారిస్‌లో అడుగుపెట్టింది. ఒలింపిక్స్‌లో భారత్‌ ఇప్పటివరకు 35 పతకాలు సాధించింది. అందులో 10 స్వర్ణ పతకాలు ఉన్నాయి. వీటిలో 8 గోల్డ్‌ మెడల్స్‌ హాకీలోనే వచ్చాయి. షూటింగ్‌లో అభినవ్‌ బింద్రా, జావెలిన్‌ త్రోలో నీరజ్‌ చోప్రా స్వర్ణ పతకాలు కొల్లగొట్టారు.

ఈ ఒలింపిక్స్‌ నిర్వహణ ఖర్చు రూ.1.17 లక్షల కోట్లుగా అంచనా వేస్తున్నారు. 1.10 కోట్ల మంది పర్యాటకలు పోటీలను తిలకించే అవకాశం ఉందనే అంచనాలు ఉన్నాయి. 35 వేదికల్లో పారిస్ ఒలింపిక్స్‌ 2024 జరగనున్నాయి.