‘ఫౌజీ’ కోసం మృణాల్‌ ఠాకూర్‌… ఇద్దరితో ప్రభాస్‌ రొమాన్స్‌?

రెబల్‌ స్టార్‌ ప్రభాస్‌ వరుస సినిమాలతో దూసుకు పోతున్నాడు. సలార్‌, కల్కి 2898 ఏడీ సినిమాలతో సంచలన విజయాలను సొంతం చేసుకున్న ప్రభాస్‌ బ్యాక్ టు బ్యాక్‌ భారీ చిత్రాలతో రాబోయే రెండేళ్లలో ప్రేక్షకుల ముందుకు వచ్చేందుకు సిద్ధం అవుతున్నాడు. ఇప్పటికే మారుతి దర్శకత్వంలో రూపొందుతున్న రాజా సాబ్‌ సినిమాపై అంచనాలు భారీగా ఉన్నాయి. ఇటీవల విడుదలైన పోస్టర్ గ్లిమ్స్ తో అంచనాలను అందుకునే విధంగా సినిమా ఉంటుందనే నమ్మకం కలుగుతుంది. ఒకవైపు రాజాసాబ్‌ సినిమా చేస్తూనే మరో వైపు హను రాఘవపూడి దర్శకత్వంలో ‘ఫౌజీ’ సినిమాను మొదలు పెట్టాడు. ఇటీవలే పూజా కార్యక్రమాలు జరుపుకున్న ఫౌజీ రెగ్యులర్‌ షూటింగ్ కార్యక్రమాలూ ప్రారంభం అయ్యాయి.

ఇటీవల రెండు వారాల షెడ్యూల్‌ ను దర్శకుడు హను రాఘవపూడి నిర్వహించాడు. తదుపరి షెడ్యూల్ కోసం ఏర్పాట్లు చేస్తున్నాడు. ఫౌజీ సినిమాలో ప్రభాస్ కు జోడీగా సోషల్‌ మీడియా స్టార్‌ గా గుర్తింపు దక్కించుకున్న ఇమాన్విని ఎంపిక చేయడం జరిగింది. పూజా కార్యక్రమాల్లో ప్రభాస్ తో కలిసి ఇమాన్వి పాల్గొనడం అందరూ చూశారు. తాజాగా అందుతున్న సమాచారం ప్రకారం ఫౌజీ సినిమాలో మరో హీరోయిన్‌ పాత్ర ఉంటుందట. ఆ పాత్రను మృణాల్‌ ఠాకూర్‌ పోషించబోతుందనే వార్తలు వస్తున్నాయి. హను రాఘవపూడి గత చిత్రం సీతారామం తో మృణాల్ తెలుగు ప్రేక్షకులకు పరిచయం అయిన విషయం తెల్సిందే. ఆయన అడిగిన వెంటనే ఫౌజీ సినిమాలో సెకండ్‌ హీరోయిన్‌ పాత్రకు సైతం ఆమె ఓకే చెప్పినట్లుగా సమాచారం అందుతోంది.

హనురాఘవపూడి దర్శకత్వంలో వచ్చిన సీతారామం సినిమాలో మెయిన్‌ హీరోయిన్‌ గా మృణాల్ ఠాకూర్ నటించగా, కీలక పాత్రలో నేషనల్ క్రష్ రష్మిక మందన్న కనిపించిన విషయం తెల్సిందే. సాధారణంగా ఇద్దరు హీరోయిన్స్ తో హను రాఘవపూడి సినిమాలు చేసేందుకు ఆసక్తి చూపిస్తాడు అనే టాక్ ఉంది. అందుకే ఈ సినిమాలోనూ ప్రభాస్‌ కి ఇద్దరు హీరోయిన్స్ ను నటింపజేస్తున్నట్లుగా వార్తలు వస్తున్నాయి. ఇప్పటి వరకు ఫౌజీ కి సంబంధించి హీరో, హీరోయిన్‌ వివరాలు తప్ప మరేవి అధికారికంగా బయటకు రాలేదు. టైటిల్ తో పాటు సెకండ్‌ హీరోయిన్‌ మృణాల్‌ ఠాకూర్ వార్తలపై దర్శకుడు హను రాఘవపూడి క్లారిటీ ఇవ్వాల్సిన అవసరం ఉంది. త్వరలోనే అన్ని విషయాలపై స్పష్టత వస్తుందేమో చూడాలి.