ఏపీకి కేంద్రమంత్రి నితిన్ గడ్కరీ తీపికబురు.. వారంలో డబ్బులొచ్చాయి, చంద్రబాబు రిక్వెస్ట్‌తో!

ఆంధ్రప్రదేశ్‌‌కు కేంద్రం శుభవార్త చెప్పింది.. ఈ మేరకు కేంద్రమంత్రి నితిన్ గడ్కరీ ట్వీట్ చేశారు. రాష్ట్రంలో 200.06 కి.మీ. పొడవైన 13 రాష్ట్ర రోడ్ల అభివృద్ధికి సీఆర్‌ఐఎఫ్‌ (కేంద్ర రహదారి మౌలిక వసతుల నిధి) నుంచి రూ.400 కోట్లు మంజూరు చేసింది. ఈ విషయాన్ని కేంద్ర రహదారి, రవాణాశాఖ మంత్రి నితిన్‌గడ్కరీ స్వయంగా వెల్లడించారు. అలాగే గుంటూరు-నల్లపాడు రైల్వే మార్గంలో రూ.98 కోట్లతో గుంటూరు శంకర్‌ విలాస్‌ ఆర్వోబీని నాలుగు వరుసలతో నిర్మించడానికి ఆమోదం తెలిపినట్లు కూడా ట్వీట్‌లో ప్రకటించారు.

ఆంధ్రప్రదేశ్ ముఖ్యమంత్రి నారా చంద్రబాబు నాయుడు గతవారం ఢిల్లీకి వెళ్లిన సంగతి తెలిసిందే. ఈ పర్యటనలో ప్రధాని నరేంద్ర మోదీతో పాటుగా పలువురు కేంద్రమంత్రుల్ని కూడా కలిశారు. అయితే కేంద్రమంత్రి నితిన్ గడ్కరీని కలిసి రాష్ట్రానికి సంబంధించిన పలు ప్రాజెక్టులపై చర్చించారు.. అయితే వారానికే రోడ్లకు సంబంధించిన నిధులపై కేంద్రమంత్రి నుంచి ఈ ప్రకటన వచ్చింది.

మరోవైపు తెలంగాణకు కూడా కేంద్రం తీపికబురు చెప్పింది. నేషనల్ హైవే 565 నల్గొండ మీదుగా.. నకిరేకల్-నాగార్జున సాగర్ మార్గంలో ట్రాఫిక్ రద్దీని తగ్గించే దిశగా అడులు వేస్తున్నారు. ఈ మేరకు రూ.516 కోట్లతో 14 కి.మీ. మేర 4 వరుసల బైపాస్‌ రోడ్డు నిర్మించనున్నట్లు కేంద్రమంత్రి గడ్కరీ తెలిపారు. ఈ బైపాస్ రోడ్డుకు నిధుల కూడా మంజూరు చేసినట్లు ఎక్స్ (ట్విట్టర్)లో ట్వీట్ చేశారు. ఈ నేషనల్ హైవే 565 ఏపీ-తెలంగాణల అనుసంధానానికి ముఖ్యమైనదన్నారు గడ్కరీ.

తెలంగాణలోని నకిరేకల్ కూడలి నుంచి ఈ హైవే నల్గొండ, ఏపీలోని మాచర్ల, యర్రగొండపాలెం, కనిగిరి మీదుగా వెళుతుంది. అయితే నల్గొండ సమీపంలో వాహనాల రద్దీ పెరిగింది.. ఈ క్రమంలో బైపాస్ రోడ్డు నిర్మాణం కోసం నిధుల్ని మంజూరు చేశారు. ఈ బైపాస్ నిర్మాణంతో నల్గొండలో ట్రాఫిక్ సమస్యలకు చెక్ పెట్టినట్లు అవుతుంది. అలాగే నకిరేకల్‌ – నాగార్జునసాగర్‌ మధ్య కనెక్టివీట పెరగనుంది. చాలా రోజులుగా ఈ బైపాస్ నిర్మాణం కోసం కేంద్రాన్ని రిక్వెస్ట్ చేశారు.. మొత్తానికి గ్రీన్ సిగ్నల్ వచ్చింది. బైపాస్ మంజూరు చేసినందుకు కేంద్రానికి మంత్రి కోమటిరెడ్డి వెంకటరెడ్డి ధన్యవాదాలు తెలిపారు.