అమెరికాలో తెలంగాణ విద్యార్థి మృతి.. 9 నెలల క్రితమే తండ్రి, ఇప్పుడు కొడుకు..!

అమెరికాలో మరో తెలంగాణ విద్యార్థి అనుమానాస్పద స్థితిలో మృతి చెందాడు. హనుమకొండ జిల్లా ఆత్మకూరుకు చెందిన ఏరుకొండ రాజేశ్ 2015లో ఉన్నత చదువుల నిమిత్తం అమెరికాకు వెళ్లాడు. ఎమ్మెస్ పూర్తి చేసిన తర్వాత అక్కడే ఉద్యోగం కూడా తెచ్చుకున్నాడు. మధ్యలో రెండుసార్లు స్వగ్రామానికి వచ్చి.. తిరిగి వెళ్లాడు. అయితే.. తొమ్మిది నెలల క్రితమే రాజేష్ తండ్రి చనిపోగా.. ఆయన అంత్యక్రియలకు కూడా రాజేష్ రాలేకపోయాడు. తలకొరివి పెట్టడానికి రాకపోవటంతో.. తండ్రి సంవత్సరికానికి వస్తానని చెప్పాడు. కానీ.. ఇంతలోనే రాజేష్‌ చనిపోయాడన్న విషాద వార్త కుటుంబాన్ని శోక సంద్రంలో ముంచేసింది. అనుమానాస్పద స్థితిలో రాజేశ్ చనిపోయాడంటూ సమాచారం రావడంతో కుటుంబ సభ్యులు కన్నీరుమున్నీరుగా విలపిస్తున్నారు.

గతేడాది గుండెపోటుతో భర్త ప్రాణాలు కోల్పోగా.. ఇప్పుడు కుమారుడి మరణ వార్త విని ఆ తల్లి గుండెలు పగిలేలా రోధిస్తోంది. ఆ తల్లి రోధనకు స్థానికుల కళ్లుచెమ్మగిల్లాయి. వృద్ధాప్యంలో ఉన్న తల్లితో పాటు.. యాక్సిడెంట్లో కాళ్లు పోయి కదల్లేకుండా ఉన్న అక్క.. ఇప్పుడు దిక్కులేని వారయ్యారు. ఇప్పటికే ఉన్న ఆర్థిక ఇబ్బందులతో ఏం చేయాలో తెలియక తల్లడిల్లుతున్నారు.

ఉన్నత చదువుల కోసం తమ కుమారుడు అమెరికా వెళ్లాడని.. మంచిగా చదువుకొని అక్కడే ఉద్యోగం సంపాదించాడని.. అంతా బాగుందనుకునేలోపే ఇలా జరిగిందంటూ ఆ తల్లి రోధిస్తోంది. 9 నెలల క్రితమే తమ భర్త చనిపోయాడని.. తన తండ్రిని చివరిసారి చూసేందుకు కూడా కొడుకు రాలేకపోయాడని.. సంవత్సరికానికి వస్తానని చెప్పాడంటూ గుండెలు బాదుకుంది. ఇంతలోనే మీ కొడుకు చనిపోయాడం ఫోన్ వచ్చిందని కన్నీళ్లు పెట్టుకుంది. ఇప్పటికే కుటుంబం ఆర్థిక ఇబ్బందుల్లో ఉందని.. దయచేసి ప్రభుత్వమే తన కుమారుడి మృతదేహాన్ని స్వగ్రామానికి తీసుకురావాలని ఆ తల్లి.. వేడుకుంది.

కుమారుడి మృతదేహాన్ని తీసుకురావాలని ప్రభుత్వానికి ఆ తల్లి చేసుకున్న విజ్ఞప్తి.. స్థానికులను కంటతడి పెట్టిస్తోంది. రాజేశ్ మృతదేహాన్ని వీలైనంత తొందరగా స్వగ్రామానికి తీసుకురావాలని కుటుంబసభ్యులు కోరుతున్నారు. ఆర్థికంగా ఎలాంటి ఆధారం లేకుండా మిగిలిపోయిన ఆ కుటుంబానికి ప్రభుత్వం ఆర్థిక సాయం అందించాలని స్థానికులు కోరుతున్నారు.