క్లీన్‌స్వీపే లక్ష్యంగా కాన్పూర్‌లో అడుగుపెట్టిన భారత్.. జర్నీ వీడియో షేర్ చేసిన బీసీసీఐ

బంగ్లాదేశ్‌తో చివరిదైన రెండో టెస్టు కోసం భారత క్రికెట్ జట్టు కాన్పూర్ చేరుకుంది. ఇప్పటికే తొలి మ్యాచులో 280 పరుగుల భారీ తేడాతో విజయం సాధించిన భారత్.. సిరీస్‌లో 1-0తో ఆధిక్యంలోకి దూసుకెళ్లింది. కాన్పూర్ వేదికగా జరిగే ఈ టెస్టులోనూ గెలిచి.. సిరీస్‌ను క్లీన్ స్వీప్ చేయాలని భారత్ పట్టుదలతో ఉంది. ఇక ఎయిర్‌పోర్ట్‌కు చేరిన ఆటగాళ్లను చూసేందుకు అభిమానులు పెద్ద సంఖ్యలో తరలివచ్చారు. దీంతో పటిష్ట భద్రత మధ్య వారిని.. పోలీసులు టీమిండియా బస చేసే హోటల్‌కు తీసుకెళ్లారు. బంగ్లాదేశ్ జట్టు కూడా కాన్పూర్ చేరుకుంది.

కాగా శుక్రవారం నుంచి అంటే.. ఈనెల 27 నుంచి రెండో టెస్టు మ్యాచ్ ప్రారంభం కానుంది. దీంతో రెండు జట్లు కూడా నేడు, రేపు గ్రీన్ పార్క్ స్టేడియంలో సాధన చేయనున్నాయి. ఈ మ్యాచ్ కోసం పోలీసులు సైతం పటిష్ట బందోబస్తు ఏర్పాటు చేశారు.

రెండో టెస్టుకు వేదికైన కాన్పూర్ పిచ్.. స్పిన్నర్లకు అనుకూలించే అవకాశం ఉందని తెలుస్తోంది. దీంతో ఇరు జట్లూ కూడా తమ తుది జట్టులో మార్పులు చేయనున్నాయి. చెన్నై పిచ్ పేసర్లకు అనుకూలిస్తుందని భావించి.. భారత్, బంగ్లాదేశ్‌లు ముగ్గురు పేసర్లు, ఇద్దరు స్పిన్నర్లతో బరిలోకి దిగాయి. కానీ ఈసారి మాత్రం అందుకు భిన్నంగా జరగనుంది. ముగ్గురు స్పిన్నర్లు.. ఇద్దరు పేసర్లతో ఇరు జట్లు బరిలోకి దిగే అవకాశాలు మెండుగా ఉన్నాయి.

ఇదే సమయంలో ఈ పిచ్‌ బ్యాటర్లకు స్వర్గధామంగా ఉండనుందనే అంచనాలు ఉన్నాయి. గతంలోనూ ఇక్కడ జరిగిన మ్యాచులో భారీ స్కోర్లు నమోదు అయ్యాయి. ఈ పిచ్ నల్లమట్టితో ఉన్నందున.. పిచ్‌పై గమనంలో మరీ వేగం ఉండకపోవచ్చు. కానీ మూడో రోజు నుంచి మాత్రం స్పిన్నర్లకు అనుకూలించొచ్చు. దానికి అనుగుణంగానే రెండు జట్లూ.. తుది జట్టును ఖరారు చేసుకుంటాయి. తొలి టెస్టుకు రిజర్వ్ బెంచ్‌కై పరిమితమైన అక్షర్ పటేల్ లేదా కుల్‌దీప్ యాదవ్‌లలో ఒకరు తుది జట్టులో చోటు దక్కించుకోవడం ఖాయం. ఆకాశ్ దీప్‌ బెంచ్‌కే పరిమితం కానున్నాడు. ఒకవేళ జస్‌ప్రీత్ బుమ్రాకు విశ్రాంతి ఇవ్వాలని మేనేజ్‌మెంట్ భావిస్తే మాత్రం ఆకాశ్ దీప్ జట్టులో ఉంటాడు.