నేడే తెలంగాణ జాబ్‌ క్యాలెండర్‌ విడుదల.. 

తెలంగాణ ఉద్యోగార్థులకు గుడ్‌న్యూస్‌. ఉద్యోగాల నియామకాలకు సంబంధించి ప్రభుత్వం ప్రత్యేక శ్రద్ధ తీసుకుంటోంది. ప్రణాళిక ప్రకారం ఉద్యోగాల భర్తీ చేయాలని యోచిస్తోంది. ఈ క్రమంలో.. శుక్రవారం (ఆగస్టు 2) అసెంబ్లీ (TG Assembly)లో జాబ్ క్యాలెండర్ను ప్రకటించనున్నట్లు రెవెన్యూ శాఖ మంత్రి పొంగులేటి శ్రీనివాస్ రెడ్డి వెల్లడించారు. యువతకు హామీ ఇచ్చిన ప్రకారం జాబ్ క్యాలెండర్ (Job Calendar) విడుదల చేస్తామన్నారు. జాబ్‌ క్యాలెండర్‌ ద్వారా రాబోయే రోజుల్లో 2 లక్షల ఉద్యోగాలు భర్త చేస్తామని రెండు రోజుల క్రితలం మంత్రి శ్రీధర్‌బాబు ప్రకటించిన విషయం తెలిసిందే. 2 లక్షల ఉద్యోగాలు కల్పించినా.. మరో 20 లక్షల మంది ఉపాధి కోసం ప్రయత్నాలు చేస్తూనే ఉంటారని.. ప్రభుత్వం పరంగా అందరికీ ఉద్యోగాలు కల్పించడం సాధ్యం కాదని శ్రీధర్‌బాబు తెలిపారు.

పరిశ్రమలకు కావాల్సిన నైపుణ్యాలు గ్రాడ్యుయేట్లలో కొరవడ్డాయని ఐటీ, శాసన సభా వ్యవహారాల మంత్రి శ్రీధర్‌బాబు పేర్కొన్నారు. నైపుణ్యాల పెంపుపై పారిశ్రామికవేత్తలు, వీసీలు, విద్యార్థులతో చర్చించామని, ‘యంగ్‌ ఇండియా స్కిల్‌ వర్సిటీ’ స్థాపనకు ప్రతిపాదిస్తున్నామని అన్నారు. నైపుణ్యాల పెంపొందించే ఉద్దేశంతోనే ‘యంగ్‌ ఇండియా స్కిల్‌ వర్సిటీ’ స్థాపన జరుగుతోందని.. అన్ని కోర్సులు 50 శాతం ప్రాక్టికల్‌ కాంపొనెంట్‌ను కలిగి ఉంటాయని స్పష్టం చేశారు.

ఈ స్కిల్‌ యూనివర్సిటీ (Skill University) యువతకు ఉపాధి కల్పిస్తుందని, రాష్ట్ర ఆర్థిక వృద్ధిని పెంచుతుందని మంత్రి శ్రీధర్బాబు పేర్కొన్నారు. తెలంగాణలో మరిన్ని పరిశ్రమల స్థాపనకు స్కిల్‌ వర్సిటీ ఊతమిస్తోందని తెలిపారు. 2024-25 సంవత్సరంలో 2000 మంది విద్యార్థులకు, వచ్చే ఏడాది 10 వేల మందికి శిక్షణ ఇస్తామని మంత్రి స్పష్టం చేశారు. ముచ్చర్లలో స్కిల్‌ వర్సిటీ కోసం శాశ్వత క్యాంపస్‌ ఏర్పాటు చేయబోతున్నట్లు శ్రీధర్బాబు వెల్లడించారు.

Skill University : స్కిల్‌ యూనివర్సిటీకి ముఖ్యమంత్రి శంకుస్థాపన

తెలంగాణలో యంగ్‌ ఇండియా స్కిల్‌ యూనివర్సిటీ ఏర్పాటుకు ముందడుగు పడింది. రంగారెడ్డి జిల్లా కందుకూరు మండలం మీర్‌ఖాన్‌పేటలో సీఎం రేవంత్‌రెడ్డి.. డిప్యూటీ సీఎం భట్టి విక్రమార్క, స్పీకర్‌ గడ్డం ప్రసాద్‌ కుమార్‌తో కలిసి వర్సిటీ నిర్మాణానికి శంకుస్థాపన చేశారు. 57 ఎకరాల్లో దీన్ని నిర్మించనున్నారు. వర్సిటీతోపాటు అడ్వాన్స్‌డ్‌ టెక్నాలజీ సెంటర్‌, ప్రైమరీ హెల్త్‌ సెంటర్‌లకు కూడా గురువారం (ఆగస్టు 1) శంకుస్థాపన చేశారు. ఈ యూనివర్సిటీలో తొలుత సుమారు 17 కోర్సులు ప్రవేశ పెట్టనున్నట్లు సమాచారం. విద్య, ఉపాధికల్పన ప్రధాన ధ్యేయంగా ఈ వర్సిటీ నిర్మాణం జరగనుంది.