చిన్నారులతో నిండిపోయిన ఆస్పత్రులు.. బెడ్లు లేక తీవ్ర ఇబ్బందులు

వర్షాకాలం నేపథ్యంలో.. తెలంగాణలో విషజ్వరాలు విజృంభిస్తున్నాయి. ప్రధానంగా చిన్నారులు సీజన్ వ్యాధుల బారిన పడుతున్నారు. దీంతో.. చిన్నారులతో ఆస్పత్రులు నిండిపోయాయి. ఏ ఆస్పత్రి చూసినా.. చిన్నపిల్లలతో వార్డులన్ని నిండిపోయాయి. ఈ క్రమంలోనే.. హైదరాబాద్‌లోని ప్రభుత్వ ఆస్పత్రి అయిన నీలోఫర్ హాస్పిటల్‌లోని.. ఎమర్జెన్సీ వార్డులో బెడ్లు లేక పిల్లల తల్లిదండ్రుల తీవ్ర ఇబ్బందులు ఎదుర్కొంటున్నారు. ఓకే బెడ్డుపై ముగ్గురు నలుగురు పిల్లలను వైద్యులు పడుకోబెట్టి వైద్యం చేస్తున్న పరిస్థితి ఏర్పడింది. దీంతో.. ఒకరి జబ్బు ఇంకొకరికి వచ్చే ప్రమాదం ఉందని తల్లిదండ్రులు తీవ్ర ఆందోళన వ్యక్తం చేస్తున్నారు. మరోవైపు.. ఎమర్జెన్సీ వార్డులో బెడ్లు లేక నేలపైనే కూర్చొని.. పిల్లలను తమ ఒళ్లో పడుకోబెట్టుకుని మరి చికిత్స అందిస్తున్నారు కొందరు చిన్నారుల తల్లిదండ్రులు.

సీజనల్ వ్యాధులతో.. డెంగ్యూ, మలేరియాతో పాటు ఇతర వ్యాధులతో బాధపడుతున్న పిల్లలకు ఎమర్జెన్సీ వార్డులో బెడ్లు లేక ఒకే బెడ్డుపై ముగ్గురు నలుగురు పిల్లలను పడుకోబెడుతుండటంపై తల్లిదండ్రులు తీవ్ర ఆందోళన వ్యక్తం చేస్తున్నారు. దీనిపై వైద్యారోగ్యశాఖ ఈ విషయంపై దృష్టి పెట్టి ఎమర్జెన్సీ వార్డులో బెడ్లను సమకూర్చాల్సిందిగా చిన్నారుల తల్లిదండ్రులు కోరుకుంటున్నారు. అంతే కాకుండా.. ప్రస్తుతం పెరిగిపోతున్న కేసున నేపథ్యంలో.. మిగతా ఆస్పత్రుల్లోనూ చిన్నారుల కోసం ప్రత్యేక వార్డులు ఏర్పాటు చేసి.. చికిత్స అందించే విధంగా చర్యలు తీసుకోవాలని.. ప్రభుత్వాన్ని వేడుకుంటున్నారు.

ఇదిలా ఉంటే.. వర్షాకాలం నేపథ్యంలో వాతావరణ మార్పుల కారణంగా.. సీజనల్ వ్యాధులు విజృభిస్తున్నాయి. డెంగీ, మలేరియాతో చాలా మంది చిన్నారులు ఆస్పత్రుల పాలవుతున్నాయి. కొన్నిసార్లు సరైన వైద్యం అందక.. చిన్నారులు తమ ప్రాణాలు కోల్పోతున్నారు. ఇప్పటికే.. తెలంగాణలో పలువురు చిన్నారులు ప్రాణాలు వదిలిన విషాదకర ఘటనలు చోటుచేసుకున్నాయి కూడా.

ఇదిలా ఉంటే.. తెలంగాణలోని పలు జిల్లాల నుంచి పేదలు.. హైదరాబాద్‌లోని నీలోఫర్ ఆస్పత్రికే వస్తుంటారు. అయితే.. ప్రస్తుతం విపరీతంగా పెరిగిపోతున్న కేసులతో.. ఆస్పత్రిలో బెడ్లు సరిపోవటం లేదు. అలాకాదని ప్రైవేటు ఆస్పత్రులకు వెళ్తే.. వైద్యానికి లక్షల్లో ఖర్చవుతుందని చెప్పటంతో.. అంత కట్టే స్తోమత లేక.. మళ్లీ ప్రభుత్వ ఆస్పత్రి దారే పడుతున్నారు. దీంతో.. బాధిత తల్లిదండ్రులు తీవ్ర ఇబ్బందులు పడుతూ.. తమ కంటి మీద కునుకు లేకుండా కంటికి రెప్పలా కాపాడుకుంటున్నారు. ఇప్పటికైనా ప్రభుత్వం దృష్టిసారించి.. ప్రత్యామ్నాయ ఏర్పాట్లు చేస్తే బాగుంటుందని ఆకాంక్షిస్తున్నారు సామాన్య ప్రజలు.