ఈ 4 ఫండ్స్‌లోకి భారీగా పెట్టుబడులు.. లిస్ట్‌లో SBI, ICICI.. ఒక్కనెలలో రూ.10 వేల కోట్లకుపైనే!

Investment: పెట్టుబడి పెట్టే విషయంలో గత కొంత కాలంగా ప్రజల ఆలోచన ధోరణి మారింది. రిస్క్ ఉన్నా సరే హైరిటర్న్స్ పొందాలని భావిస్తున్న వారు పెరుగుతున్నారు. అలాంటి వారంతా ఇప్పుడు మ్యూచువల్ ఫండ్స్ పెట్టుబడులవైపు మళ్లుతున్నారు. స్టాక్ మార్కెట్లతో పోలిస్తే రిస్క్ తక్కువగా ఉండడం, హైరిటర్న్స్ వస్తున్న క్రమంలో ఈక్విటీ ఫండ్స్‌లో భారీగా డబ్బులు పెడుతున్నారు. ప్రతి నెలా మ్యూచువల్ ఫండ్స్‌లోకి వేల కోట్ల రూపాయలు వచ్చి చేరుతున్నాయి. దాదాపు 43 మ్యూచువల్ ఫండ్స్ గత ఆగస్టు నెలలో ఏకంగా రూ.67.98 లక్షల కోట్ల పెట్టుబడులను అందుకున్నాయి. అది జులై నెలలో చూస్తే రూ.66.47 లక్షల కోట్లుగా ఉంది. అంటే ఒక్క నెలలోనే రూ.1.51 లక్షల కోట్లకుపైగా పెట్టుబడులు వచ్చాయి. అలాగే గత ఆగస్టు నెలలో రూ.10 వేల కోట్లకుపైగా పెట్టుబడులు అందుకున్న 4 ఫండ్స్ గురించి తెలుసుకుందాం.

ఐసీఐసీఐ ప్రుడెన్షియల్ మ్యూచువల్ ఫండ్..

ఐసీఐసీఐ ప్రుడెన్షియల్ మ్యూచువల్ ఫండ్ హౌస్ గత ఆగస్టు నెలలో ఏకంగా రూ.22,532 కోట్లు పెట్టుబడులను అందుకుంది. దీంతో ఈ ఫండ్ ఏఎంయూ విలువ రూ.8.89 లక్షల కోట్లకు చేరింది. అంతకు ముందు జులై నెలలో ఇది రూ.8.66 లక్షల కోట్లుగా ఉండేది.

ఎస్‌బీఐ మ్యూచువల్ ఫండ్..

ఎస్‌బీఐ మ్యూచువల్ ఫండ్ హౌస్ ఆగస్టు నెలలో ఏకంగా రూ.22,383 కోట్ల మేర పెట్టుబడులను స్వీకరించింది. దీంతో ఈ ఫండ్ హౌస్ మొత్తం ఏయూఎం విలువ రూ.11.14 లక్షల కోట్లకు పెరిగింది. అది జులై నెలలో రూ.10.91 లక్షల కోట్లుగా ఉండేది.

హెచ్‌డీఎఫ్‌సీ మ్యూచువల్ ఫండ్..

ఈ హెచ్‌డీఎఫ్‌సీ మ్యూచువల్ ఫండ్ హౌస్ గత నెలలో రూ.15,364 కోట్ల మేర పెట్టుబడులను అందుకోవడంతో ఆగస్టు నెలలో మొత్తం ఏయూఎం విలువ రూ.7.74 లక్షల కోట్లకు చేరింది. ఇది అంతుకు ముందు నెల జులైలో రూ.7.59 లక్షల కోట్లుగా ఉంది.

నిప్పాన్ ఇండియా మ్యూచువల్ ఫండ్

నిప్పాన్ ఇండియా మ్యూచువల్ ఫండ్ హౌస్‌లోని వివిధ ఈక్విటీ పథకాల్లోకి ఆగస్టు నెలలో రూ.11,503 కోట్ల మేర పెట్టుబడులు వచ్చాయి. దీంతో ఆగస్టు నాటికి సంస్థ మొత్తం ఏయూఎం విలువ రూ.5.61 లక్షల కోట్లకు పెరిగింది. ఇది జులై నెలలో రూ.5.49 లక్షల కోట్లుగా ఉంది.

మరోవైపు.. ఇతర మ్యూచువల్ ఫండ్ హౌస్‌ల ఈక్వీటీ పథకాలు ఆగస్టు నెలలో మంచి పెట్టుబడులనే అందుకున్నాయి. ఒక్కో ఫండ్ హౌస్ రూ.9.64 కోట్ల నుంచి రూ.8,438 కోట్ల వరకు పెట్టుబడులను అందుకున్నాయి.