రాజకీయాల్లోకి వినేశ్ ఫొగాట్.. హర్యానా అసెంబ్లీ ఎన్నికల్లో సోదరిపైనే పోటీ?

వినేశ్ ఫొగాట్. గత కొన్నిరోజులుగా దేశవ్యాప్తంగా మారుమోగుతున్న పేరు. పారిస్ ఒలింపిక్స్‌ 2024 లో మహిళల రెజ్లింగ్ విభాగంలో 100 గ్రాములు అధికంగా బరువు ఉన్న కారణంగా పతకానికి దూరమైన వినేశ్ ఫొగాట్‌ పట్ల దేశం మొత్తం తీవ్ర దిగ్భ్రాంతి చెందింది. ప్రధానమంత్రి నరేంద్ర మోదీ మొదలుకుని.. నెటిజన్ల వరకు అంతా వినేశ్ ఫొగాట్‌కు అండగా నిలిచారు. ఈ క్రమంలోనే 100 గ్రాములు ఎక్కువ బరువు ఉండడంతో చేతివరకు వచ్చిన పతకం చేజారిపోయింది. దీంతో సంచలన నిర్ణయం తీసుకున్న వినేశ్ ఫొగాట్.. రెజ్లింగ్‌ నుంచి రిటైర్మెంట్ తీసుకుంటున్నట్లు ప్రకటించి అందర్నీ ఆశ్చర్యానికి గురి చేశారు. అయితే ఆమె రాజకీయాల్లోకి వచ్చేందుకే ఈ నిర్ణయం తీసుకున్నట్లు తెలుస్తోంది. ఈ క్రమంలోనే వినేశ్ ఫొగాట్ సన్నిహిత వర్గాలు తాజాగా చెబుతున్న వివరాల ప్రకారం.. ఆమె ఈ హర్యానా అసెంబ్లీ ఎన్నికల్లోనే రాజకీయాల్లోకి అరంగేట్రం చేయనున్నారని సమాచారం.

మరికొన్ని రోజుల్లో జరగనున్న హర్యానా అసెంబ్లీ ఎన్నికల్లో వినేశ్‌ ఫొగాట్ పోటీ చేసే అవకాశాలున్నట్లు తెలుస్తోంది. అయితే ఆమె తన సోదరి బబిత ఫొగాట్‌పైనే బరిలోకి దిగేందుకు సన్నాహాలు జరుగుతున్నట్లు సమాచారం. వినేశ్ ఫొగాట్ రాజకీయ అరంగేంట్రం గురించి.. ఆమె కుటుంబానికి అత్యంత సన్నిహితంగా ఉండే కొందరు మీడియాకు కీలక విషయాలు వెల్లడించారు. వినేశ్ ఫొగాట్ రాజకీయాల్లోకి రానున్నారా అనే ప్రశ్నకు.. అవును అనే సమాధానం వచ్చింది. వినేశ్ ఫొగాట్.. రాజకీయాల్లోకి ఎందుకు రాకూడదని.. హర్యానా అసెంబ్లీ ఎన్నికల్లో పోటీ.. వినేశ్‌ ఫొగాట్ వర్సెస్‌ బబితా ఫొగాట్‌ అనే విధంగా ఉండొచ్చని మరింత స్పష్టతను ఇచ్చారు.

అయితే తాను రాజకీయాల్లోకి రాబోనని గతంలోనే వినేశ్ ఫొగాట్ ప్రకటించింది. అయితే.. ఇప్పటికే కొన్ని రాజకీయ పార్టీలు ఆమెను సంప్రదించి.. ఆ నిర్ణయాన్ని వెనక్కి తీసుకోమని.. సర్దిచెప్పే ప్రయత్నాలు చేస్తున్నాయి. అయితే వినేశ్ ఫొగాట్ ఏ పార్టీలో చేరతారు అనే దానిపై మాత్రం ఇప్పటివరకు స్పష్టత రాలేదు అని వినేశ్ ఫొగాట్‌ కుటుంబ సన్నిహిత వర్గాలు తెలిపాయి. ఇక మరో రెజ్లర్‌ బజ్‌రంగ్‌ పునియా కూడా హర్యానా అసెంబ్లీ ఎన్నికల్లో పోటీ చేసే అవకాశాలున్నాయని ఆ సన్నిహత వర్గాలు పేర్కొన్నాయి.

గతంలో హర్యానా అసెంబ్లీ ఎన్నికలకు ముందు 2019లో వినేశ్ ఫొగాట్ సోదరి బబితా ఫొగాట్.. బీజేపీలో చేరింది. అదే ఏడాది జరిగిన హర్యానా ఎన్నికల్లో దాద్రి స్థానం నుంచి పోటీ చేసిన బబితా ఫొగాట్ పరాజయం పాలయ్యారు. ఈ క్రమంలోనే త్వరలో జరగనున్న అసెంబ్లీ ఎన్నికల్లో మరోసారి ఆమెకు బీజేపీ.. టికెట్‌ ఇచ్చే అవకాశాలు ఉన్నట్లు ప్రచారం జరుగుతోంది. ఈ క్రమంలోనే దాద్రి నియోజకవర్గం నుంచి బబితా ఫొగాట్ పోటీ చేయడం ఖరారైతే.. ఆమె పైనే వినేశ్ ఫొగాట్ బరిలోకి దిగడం ఖాయమని తెలుస్తోంది. దీంతో ఈసారి హర్యానా అసెంబ్లీ ఎన్నికల్లో ఫొగాట్‌ సిస్టర్స్‌ పోరు దేశవ్యాప్తంగా ఆసక్తికరంగా మారనుందని రాజకీయ వర్గాలు అంచనా వేస్తున్నాయి. హర్యానా అసెంబ్లీకి అక్టోబరు 1వ తేదీన ఎన్నికలు జరగనున్నాయి. అదే నెల 4 వ తేదీన ఫలితాలు వెల్లడికానున్నాయి.