వేములవాడ భక్తులకు శుభవార్త.. ఇకపై తిరుమల తరహాలో, ఆ భక్తులకు ఫ్రీగా లడ్డూ..!

దక్షిణ కాశీగా పేరుపొందిన.. వేములవాడ శ్రీ రాజరాజేశ్వరస్వామిని దర్శించుకునేందుకు ఎక్కడెక్కడి నుంచో భక్తులు తరలివస్తుంటారు. రాజన్నను దర్శించుకునేందుకు.. సామాన్య భక్తులే కాదు.. వీఐపీలు కూడా పోటెత్తుతుండటం విశేషం. ఈ మధ్య వీఐపీ భక్తుల సంఖ్య గణనీయంగా పెరిగింది. ఈ క్రమంలోనే భక్తులకు ఆలయ అధికారులు శుభవార్త వినిపించారు. తిరుమల తరహాలోనే.. వేములవాడలోనూ బ్రేక్‌ దర్శనానికి ఆలయ అధికారులు శ్రీకారం చుట్టారు. శ్రావణమాసం తొలిరోజైన సోమవారం రోజు నుంచే ఈ బ్రేక్ దర్శనాన్ని ప్రభుత్వ విప్, వేములవాడ ఎమ్మెల్యే ఆది శ్రీనివాస్ ప్రారంభించారు.

అయితే.. ఈ బ్రేక్ దర్శనానికి ఒక్కొక్కరికి రూ. 300 టికెట్ ధరగా నిర్ణయించారు ఆలయ అధికారులు. బ్రేక్‌ దర్శనం చేసుకునే ప్రతి భక్తుడికి 100 గ్రాముల లడ్డూను ఉచితంగా అదించనున్నారు. ఈ బ్రేక్ దర్శనాన్ని ఉదయం 10 :15 గంటల నుంచి 11: 15 గంటల వరకు.. మళ్లీ సాయంత్రం 4 గంటల నుంచి 5 గంటల వరకు అనుమతించనున్నారు. ఈ బ్రేక్ దర్శనం కోసం.. ఈఓ కార్యాలయం ముందున్న ప్రస్తుత శీఘ్ర దర్శనం క్యూలైన్‌ను బ్రేక్‌ దర్శనానికి ఉపయోగించాలని అధికారులు నిర్ణయించారు. ఈ మార్గంలో ఆలయ ప్రధాన ద్వారం నుంచి స్వామివారి దర్శనానికి వెళ్లే విధంగా ఏర్పాట్లు చేశారు.

మరోవైపు.. బ్రేక్ దర్శనాన్ని ప్రారంభించిన అనంతరం ఆది శ్రీనివాస్.. స్వామివారిని దర్శించుకుని మొక్కులు చెల్లించుకున్నారు. ఈ సందర్భంగా మీడియాతో మాట్లాడిన ఆది శ్రీనివాస్.. రాజరాజేశ్వర ఆలయ అభివృద్ధిని తన బాధ్యతగా భావిస్తున్నట్లు తెలిపారు. వేములవాడ టెంపుల్‌ ఏరియా డెవలప్‌మెంట్‌ అథారిటీకి (VDTDA) గత ప్రభుత్వ హయాంలో మంజూరై.. వెనక్కి వెళ్లిన రూ. 20 కోట్లను తిరిగి తెప్పించానన్నారు. దీంతో పాటు ప్రస్తుత బడ్జెట్లో రూ. 50 కోట్లు కేటాయించినట్లు పేర్కొన్నారు.

ఆలయ అభివృద్ధి సూచనల కోసం శృంగేరి పీఠాన్ని సందర్శించినట్లు ఆది శ్రీనివాస్ తెలిపారు. ప్రస్తుతం రూ. 50 కోట్లతో చేపట్టే పనులకు అంచనాలను రూపొందించనున్నట్లు పేర్కొన్నారు. ఆలయ అభివృద్ధికి సీఎం రేవంత్ రెడ్డి, దేవాదాయ శాఖ మంత్రి కొండా సురేఖ కట్టుబడి ఉన్నారని స్పష్టం చేశారు. భక్తి భావం ఆధ్యాత్మికత ఉట్టి పడేవిధంగా రాజన్న ఆలయాన్ని అభివృద్ధి చేస్తామని ఆది శ్రీనివాస్ హామీ ఇచ్చారు.

మరోవైపు.. మాజీ సీఎం కేసీఆర్పై ఆది శ్రీనివాస్ తీవ్ర విమర్శలు చేశారు. మాజీ సీఎం కేసీఆర్ 2016 జూన్లో రాజన్నను దర్శించుకుని.. ఏటా ఆలయ అభివృద్ధికి బడ్జెట్‌లో 100 కోట్లు కేటాయిస్తామని హామీ ఇచ్చి విస్మరించారని ఆగ్రహం వ్యక్తం చేశారు. తన పెళ్లి వేములవాడలోనే జరిగిందని.. ఆలయాన్ని అభివృద్ధి చేస్తానంటూ కేసీఆర్ ఎన్నో మాటలు చెపి.. మాట తప్పారంటూ మండిపడ్డారు.