వైసీపీ ఎంపీ విజయసాయిరెడ్డికి ఎదురు దెబ్బ.. అన్నంత పనిచేసిన చంద్రబాబు సర్కార్

వైఎస్సార్‌సీపీ ఎంపీ విజయసాయిరెడ్డికి చంద్రబాబు సర్కార్ షాకిచ్చింది. గతంలో టీడీపీ ఎమ్మెల్యేలు, నేతలు చెప్పినట్లుగానే జరిగింది. విశాఖపట్నం జిల్లా భీమిలిలో ఎంపీ విజయసాయిరెడ్డి కుమార్తె నేహారెడ్డి ఆక్రమించారనే ఆరోపణలు వస్తున్న స్థలంలో కాంక్రీట్ నిర్మాణాల కూల్చివేతలు మొదలయ్యాయి. ఈ మేరకు జీవీఎంసీ అధికారులు కూల్చివేతల్ని చేపట్టారు.. సీఆర్‌జడ్‌ నిబంధనలు ఉల్లంఘిస్తూ ఈ కాంక్రీట్ నిర్మాణాలు చేపట్టారని.. హైకోర్టు ఆదేశాలతో కూల్చివేస్తున్నట్లు చెబుతున్నారు.

భీమిలిలోని సర్వే నంబర్‌ 1516, 1517, 1519, 1523లోని స్థలంలో ఈ కాంక్రీట్‌ నిర్మాణాలు ఉన్నాయి. ఇవి అక్రమ కట్టడాలంటూ జనసేన పార్టీ కార్పొరేటర్‌ పీతల మూర్తియాదవ్‌ హైకోర్టులో పిల్‌ దాఖలు చేసిన సంగతి తెలిసిందే. ఈ క్రమంలో తాజాగా కోర్టు ఇచ్చిన ఉత్తర్వులతో జీవీఎంసీ అధికారులు నిర్మాణాలను తొలగిస్తున్నట్లు చెబుతున్నారు. గతంలోనే ఈ భూముల వ్యవహారంపై విమర్శలు వచ్చాయి.. విజయసాయిరెడ్డి కూడా క్లారిటీ ఇచ్చారు. తాజాగా హైకోర్టు ఆదేశాలతో ఈ నిర్మాణాలను కూల్చివేశారు.

భీమిలి బీచ్ దగ్గర సముద్రానికి అతి సమీపంలో సీఆర్‌జెడ్ (కోస్టల్ రెగ్యులేషన్ జోన్) ఉంది. అయితే నిబంధనలను ఉల్లంఘించి ఎంపీ విజయసాయిరెడ్డి కుమార్తె నేహా రెడ్డి సుమారు 249 మీటర్ల కాంక్రీట్ ప్రహరీ గోడ నిర్మించారని జనసేన పార్టీ కార్పొరేటర్ పీతల మూర్తి గతంలోనే ఫిర్యాదు చేశారు. ఆ తర్వాత హైకోర్టును ఆశ్రయించారు. దీనిపై హైకోర్టు ప్రధాన న్యాయమూర్తి జస్టిస్‌ ధీరజ్‌సింగ్‌ ఠాకూర్, జస్టిస్‌ చీమలపాటి రవిలతో కూడిన ధర్మాసనం విచారణ చేపట్టింది. కూల్చివేత విషయంలో ఎలాంటి చర్యలు తీసుకున్నారో వివరిస్తూ నివేదికను సమర్పించాలని హైకోర్టు జీవీఎంసీ అధికారులను ఆదేశిస్తూ తదుపరి విచారణను సెప్టెంబర్ 11కి వాయిదా వేసింది.

బీచ్‌లో ఎలాంటి కాంక్రీట్ నిర్మాణాలు చేపట్టడానికి వీల్లేదంటూ గతంలో హైకోర్టు ఆదేశాలున్నాయి. వీటన్నింటిని అతిక్రమించి నేహారెడ్డి ప్రహారీ కట్టడంపై ఉన్నత న్యాయస్థానం ఆగ్రహం వ్యక్తం చేయడంతో మేల్కోన్న జీవీఎంసీ అధికారులు సోమవారం ఆమెకు నోటీసులు జారీ చేశారు. 24 గంటల్లో ఆక్రమణలు తొలగించాలని.. లేదంటే తామే తొలగిస్తామని హెచ్చరించింది. ఆమె తరపు నుంచి ఎలాంటి స్పందన లేకపోవడంతో బుధవారం ఉదయం జేసీబీలతో అక్కడికి చేరుకున్న అధికారులు ప్రహారీ గోడను కూల్చివేశారు. గతంలో టీడీపీ నేతలు కూడా ఈ స్థలంలో నిర్మాణాలపై విమర్శలు చేశారు.. అక్కడితో ఆగకుండా కొత్తగా అధికారంలోకి వచ్చిన కూటమి ప్రభుత్వానికి కూడా ఫిర్యాదు చేశారు. ఇటీవల మంత్రి నారాయణ విశాఖపట్నం పర్యటనకు వచ్చిన సమయంలో కూడా అక్రమ నిర్మాణాల ప్రస్తావన వచ్చింది. చివరికి హైకోర్టు ఆదేశాలతో ఈ నిర్మాణాలను కూల్చివేశారు.. జీవీఎంసీ చేపట్టిన ఈ కూల్చివేతలపై ఎంపీ విజయసాయిరెడ్డి స్పందించాల్సి ఉంది.